ၼႂ်းၸႄႈဝဵင်းၼမ်ႉၸၢင် ၼႂ်းၼႃႈတီႈပျီႇတူႉၸိတ်ႉ ၵုမ်းၵမ်ၼၼ်ႉ  ပိုတ်ႇပၢင်တေႃႇလွင်းမႃးဢမ်ႇထၢတ်ႇၶၢဝ်းတၢင်းၸမ်ပီ၊  ၼိုင်ႈတီႈလႂ် ၸတ်းႁဵတ်း ၼပ်ႉႁူဝ်လိူၼ်။

ဝၢႆးၶွင်ႇသီႇသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်းပီပၢႆၼႆႉ ၼႂ်းၸႄႈဝဵင်းၼမ်ႉၸၢင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ပိုတ်ႇပၢင်တေႃႇ လွင်း ဝၢၼ်ႈၼိုင်ႈယဝ်ႉ ဝၢၼ်ႈၼိုင်ႈ ၼိုင်ႈတီႈလႂ် ၶၢဝ်းတၢင်းႁိုင် 1 လိူၼ်တေႃႇထိုင် 2 လိူၼ် ၵမ်ႈၼမ် ပဵၼ်ၼႂ်းၼႃႈတီႈပျီႇတူႉၸိတ်ႉ ၵုမ်းၵမ် မိူၼ်ၼင်ႇ ပျီႇတူႉၸိတ်ႉၼႃးယႆး၊ ပၢင်ႇလႅင်းသႂ်လႄႈ S S S    ၸိူဝ်းၼႆႉ။

ၵူၼ်းၼမ်ႉၸၢင် လၢတ်ႈတီႈၽူႈတွႆႇႁွၵ်ႈဝႃႈ – “တေႃႈလဵဝ် ဢၼ်ၸတ်းႁဵတ်းဝႆႉယူႇၼႆႉ တီႈပွၵ်ႉ 4 ႁိမ်းႁၢၼ်ႉၶၢႆၶဝ်ႈၽၵ်းၼွင်ပႃၼႃးၼႆး။ တီႈၼၼ်ႈ ၶဝ်ပိုတ်ႇမႃး တေမီးမွၵ်ႈ 2 လိူၼ်ၼႆႉယဝ်ႉ။ ပဵၼ်ပျီႇတူႉၸိတ်ႉ S 3 ဢွၼ်ႁူဝ်ပိုတ်ႇဝႆႉ။   တီႈၼႂ်းၼႃႈတီႈ ပျီႇတူႉၸိတ်ႉၼႃးယႆး ၊ တီႈၼႂ်းၼႃႈတီႈပျီႇတူႉၸိတ်ႉပၢင်ႇလႅင်းသႂ် ၸိူဝ်းၼႆႉ ႁဵတ်းလူင်ၵႂႃႇတီႈၼိုင်ႈယဝ်ႉတီႈၼိုင်ႈ”- ဝႃႈၼႆ။

ပၢင်တေႃႇလွင်းၼႆႉ   မၢင်တီႈပိုတ်ႇႁိုင် 1 လိူၼ်ထိုင် 2 လိူၼ် ၸင်ႇတေၶၢႆႉၵႂႃႇ ႁဵတ်းထႅင်ႈၼိုင်ႈ ၼႆၸိူဝ်းၼႆႉ။ ယၢမ်းလဵဝ် ပၢင်တေႃႇလွင်းတီႈၼမ်ႉၸၢင် ယင်းၸၢင်ႈ ၽူႈႁွင်ႉၵႂၢမ်းမၢၼ်ႈ လုၵ်ႉမိူင်းမၢၼ်ႈမႃး ႁွင်ႉမူၼ်ႈၸႂ်ပၼ်ပႃးထႅင်ႈ။

“ပၢင်တေႃႇလွင်းတီႈၼမ်ႉၸၢင်ၼႆႉ ပေႃးဝႃႈသိုၵ်းမၢၼ်ႈ ယိုတ်းမိူင်းယဝ်ႉၼႆၵေႃႈ ၶဝ်တႄႇၸတ်း  မွၵ်ႈၽွင်းဢွၵ်ႇဝႃႇၼႆႉၶႃႈၼေႈ။   ယၢမ်းလဵဝ် သမ်ႉပေႃးတေၶဝ်ႈဝႃႇၶိုၼ်းယဝ်ႉ။ ဢၼ်ၶဝ်ဢမ်ႇႁဵတ်းၼႆႉ ၼႂ်းဝႃႇ 3 လိူၼ်ၵူၺ်း”- ၵူၼ်းၼမ်ႉၸၢင် သိုပ်ႇလၢတ်ႈၼင်ႇၼႆ။

ပၢင်တေႃႇလွင်းၼႆႉ   ပိုတ်ႇဝႆႉ 24 ၸူဝ်ႈမူင်း ၵႂႃႇလဵၼ်ႈလႆႈၵူႈၶၢဝ်း။  ၵူၼ်းၼုမ်ႇၵူၼ်းထဝ်ႈ ၸဵမ်ၸၢႆးၸဵမ်ယိင်းဢယၼ်ၵၼ်ၵႂႃႇတေႃႇလဵၼ်ႈ  မုင်ႈမွင်းတႃႇလႆႈငိုၼ်း။

“ပၢင်တေႃႇလွင်း ဢၼ်ၶဝ်ပိုတ်ႇဝႆႉၼၼ်ႉ တၼ်းၶၢဝ်းလႂ် ၵႂႃႇလဵၼ်ႈၶၢဝ်းၼၼ်ႉၵေႃႈလႆႈ ဢမ်ႇဝႃႈ ၵၢင်ဝၼ်းၵၢင်ၶိုၼ်း ၵူၼ်းၵိုၼ်းၶွၼ်ႈယူႇသေႇ သေႇ ပေႃးပဵၼ်တီႈဝဵင်းတႄႉ။ မိူၼ်ၼင်ႇ တၢင်းသၢႆဝၢၼ်ႈၼွၵ်ႈၼႃးပၢင်ႇသမ်ႉ တေၵိုၼ်းၼႂ်းဝၼ်းလိူၼ်လပ်း လိူၼ်မူၼ်း ၸိူင်ႉၼႆၶႃႈဢေႃႈ။ သိုၵ်း မၢၼ်ႈ ပလိၵ်ႈ/ ယေး ၶဝ်ပိုတ်ႇပၼ်ၵူၼ်းမိူင်းလွတ်ႈလႅဝ်းလီၼႃႇယဝ်ႉ ယၢမ်းလဵဝ်ၼႆႉ။ ပၢင်တေႃႇလွင်းၼႆႉ ၸဵမ်သိုၵ်းမၢၼ်ႈ/ ပလိၵ်ႈ/ ပျီႇတူႉၸိတ်ႉ ၸိူဝ်းၼႆႉ ၶဝ်ႁူမ်ႈၵၼ် ႁဵတ်းၶႃႈယဝ်ႉ။ ယဝ်ႉၵေႃႈ လွတ်ႈလႅဝ်းထၢင်ႇႁၢင်ႈလီၼႃႇ ယွၼ်ႉသိုၵ်းမၢၼ်ႈပလိၵ်ႈ ၶဝ်ပၼ်ဢၶႂၢင်ႉလီၼႃႇယဝ်ႉ”- ဝႃႈၼႆ။

ၼႂ်းပၢင်တေႃႇလွင်း ဢၼ်ပိုတ်ႇလဵၼ်ႈတီႈၼမ်ႉၸၢင်ၼႆႉ တေပဵၼ်ၽၢႆႉၵိဝ်း၊ မၢၵ်ႇၵိင်ႈလွႆ၊ လေးၵွင်ႇၵိၼ်ႇ ၸိူဝ်းၼႆႉ။