မိူဝ်ႈဝႃးဝၼ်းတီႈ 17/12/2025 ၼႆႉ သိုၵ်းမၢၼ်ႈလႄႈပျီႇတူႉၸိတ်ႉပဢူဝ်း ထႅမ်ႁႅင်းသိုၵ်းၶဝ်ႈၼႂ်းဝၢၼ်ႈ ၸလူင်ႈတႂ်ႈ ( တောင်စလုံး ) ၸႄႈဝဵင်းပၢင်လွင်း- ၾၢႆၶုၼ်သေ ၽဝ်ႁိူၼ်းယေးၵူၼ်းဝၢၼ်ႈလူႉၵွႆထႅင်ႈ ။

တီႈဝၢၼ်ႈၸလူင်ႈတႂ်ႈဢၼ်သိုၵ်းမၢၼ်ႈၶဝ်ႈၽဝ်ၼႆႉ ၵူၼ်းဝၢၼ်ႈတႄႉ ပၢႆႈၽေးသိုၵ်းမူတ်းယဝ်ႉလႄႈ ဢမ်ႇမီးလွင်ႈတုမ်ႉတိူဝ်ႉမၢတ်ႇၸဵပ်း။ ယွၼ်ႉသိုၵ်းမၢၼ်ႈၵႆႉထႅမ်ႁႅင်းသိုၵ်းၶဝ်ႈမႃးသေ ၵႆႉၽဝ်ႁိူၼ်းယေး ၵူၼ်းဝၢၼ်ႈ ၵမ်းလင် သွင်လင်ႁဵတ်းၼႆတိၵ်းတိၵ်းလႄႈ  ႁဵတ်းႁႂ်ႈၵူၼ်းပၢႆႈၽေးသိုၵ်း ဢမ်ႇႁတ်းပွၵ်ႈၶိုၼ်း ႁိူၼ်းယေး ။ ပၢႆႈၽေးသိုၵ်းဝႆႉယူႇတေႃႇထိုင်ဝၼ်းမိူဝ်ႈၼႆႉမီး 3 လိူၼ်ပၢႆ ယဝ်ႉဝႃႈၼႆ။

လုၵ်ႈၸုမ်း PDF မိူင်းတႆးပွတ်းၸၢၼ်းၵေႃႉၼိုင်ႈလၢတ်ႈၽူႈတွႆႇႁွၵ်ႈဝႃႈ –“ၼႂ်းၵႄႈဝၢၼ်ႈၸလူင်ႈတႂ်ႈလႄႈ ဝၢၼ်ႈၸလူင်ႈၼိူဝ်ၼၼ်ႉ သိုၵ်းမၢၼ်ႈပၵ်းတပ်ႉယူႇဝႆႉ ၊ မိူဝ်ႈဝႃးၵေႃႈၶဝ် ၶဝ်ႈၽဝ် ၼႂ်းဝၢၼ်ႈၸလူင်ႈတႂ်ႈထႅင်ႈ ၊ ႁၼ်တႄႉလႆႈႁၼ်ယူႇ ၵူၺ်းဢမ်ႇႁူႉဝႃႈ မႆႈၵႂႃႇလၢႆလင် ၊ ၶဝ်ႁဵတ်းမိူၼ်ၼင်ႇၵႂၢတ်ႇလၢင်ႉၼႃႈတီႈၸိူင်ႉၼၼ် ”– ဝႃႈၼႆ ။

မိူၼ်ၼင်ႇၼႆ ၼႂ်းဝၼ်းတီႈ 2/12/2025 ၼၼ်ႉၵေႃႈ သိုၵ်းမၢၼ်ႈၶဝ်ႈ ၽဝ်ႁိူၼ်းၵူၼ်းဝၢၼ်ႈ ၸလူင်ႈတႂ်ႈထႅင်ႈ ႁဵတ်းႁႂ်ႈႁိူၼ်းၵူၼ်းပိုၼ်ႉတီႈ မႆႈသုမ်းၵႂႃႇတင်းၼမ် ၼႆယဝ်ႉ ။

ယၢမ်းလဵဝ် တီႈတၢင်းဝၢၼ်ႈၸလူင်ႈတႂ်ႈ ၸလူင်ႈၼိူဝ်ၼၼ်ႉ လႅင်းၾူၼ်း လႅင်းဢိၼ်ႊတိူဝ်ႊၼႅတ်ႊ ၶၢတ်ႇဝႆႉသေ သိုၵ်းမၢၼ်ႈတင်းပျီႇတူႉၸိတ်ႉပဢူဝ်း လႄႈ ၸုမ်းလုၵ်ႉၽိုၼ်ႉ PDF ၵႆႉတုမ်ႉတိူဝ်ႉ ပဵၼ်ပၢင်တိုၵ်းတၢင်းဝႆႉၼႆ လုၵ်ႈၸုမ်း PDF ၼႂ်းပိုၼ်ႉတီႈၼၼ်ႉလၢတ်ႈၼင်ႇၼႆ ။

ၵူၼ်းၸၢႆးဝဵင်းပၢင်လွင်းလၢတ်ႈၽူႈတွႆႇႁွၵ်ႈဝႃႈ -“တၢင်းဝၢၼ်ႈၼၼ်ႉတႄႉ ၶဝ် (သိုၵ်းမၢၼ်ႈ ) ၵႆႉဢဝ်ၾႆးၽဝ်ၼႃႇ ၊ ၵူၼ်းပၢႆႈၽေးသိုၵ်းၸိူဝ်းမႃးမီးတၢင်းပၢင်လွင်းၼႆႉၶႂ်ႈမိူဝ်းႁိူၼ်းၵေႃႈ ဢမ်ႇၸၢင်ႈပွၵ်ႈႁိူၼ်းယဝ်ႉ ႁိူၼ်းၶဝ်ထုၵ်ႇၾႆးၽဝ်မူတ်းယဝ်ႉ ”- ဝႃႈၼႆ ။

ၼႂ်းဝၼ်းတီႈ 7/10 /2025  သိုၵ်းမၢၼ်ႈတင်းပျီႇတူႉၸိတ်ႉပဢူဝ်း လႄႈ ၸုမ်းလုၵ်ႉၽိုၼ်ႉ PDF ပဵၼ်ပၢင်တိုၵ်းၵၼ်ၶိုၼ်းလႄႈ ၵူၼ်းဝၢၼ်ႈ လူင်ပႅၼ်ႈ ၊ ၼမ်ႉၼဵင်ႈ ၊ ၵေႃမႆႉသၢင်း ၊ ဝၢၼ်ႈၸလူင်ႈတႂ်ႈ ၸလူင်ႈၼိူဝ် ႁူဝ်ၵူၼ်း 4 ႁဵင်ပၢႆ လႆႈငိူင်ႉပၢႆႈၽေးသိုၵ်း သေ ၼႂ်းဝၼ်းတီႈ 10/10 /2025 သိုၵ်းမၢၼ်ႈႁူမ်ႇပျီႇတူႉၸိတ်ႉ ပဢူဝ်းၶဝ်  ၽဝ်ႁိူၼ်း ၵူၼ်းဝၢၼ်ႈ ၸလူင်ႈၼိူဝ် ႁဵတ်းႁႂ်ႈႁိူၼ်းၵူၼ်းပိုၼ်ႉတီႈလူႉၵွႆတင်းၼမ် ။

ၶေႃႈတူၵ်းလူင်း ၵျီႊတီႊဝႃႊ ၶွၼ်ႊဝႅၼ်ႊသျိၼ်ႊ မတ်ႉတႃ 14 ၶေႃႈတူၵ်းလူင်းၽိူမ်ႉထႅမ် 2 ၼၼ်ႉပႃးဝႆႉဝႃႈ – သိုၵ်းၼႆႉ ႁၢမ်ႈယႃႉၶူဝ်းၶွင်လမ်ႇလွင်ႈၵူၼ်းမိူင်း ဢၼ်ဢမ်ႇမီးဢမ်ႇပဵၼ် မိူၼ်ၼင်ႇ ႁိူၼ်းယေး လိၼ်သူၼ်ႁႆႈၼႃး ဢၼ်ၽုၵ်ႈသွမ်ႈဝႆႉမၢၵ်ႇၶဝ်ႈတဝ်ႈၼမ်ႉ၊ သူၼ်-ၶွၵ်ႈလဵင်ႉသတ်း ၊ ႁူဝ်ၼမ်ႉၵိၼ်ၼမ်ႉၸႂ်ႉ၊ ၵၢၼ်တေႃႉသူင်ႇၶူဝ်းၶွင်ၵူၼ်းမိူင်း ၸိူဝ်းၼႆႉလႃးလႃး။