ၶၢဝ်းတၢင်းၸမ်ပီမႃးၼႆႉ ၼႂ်းၸႄႈဝဵင်းၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်းၶူဝ်ႊဝိတ်ႉ 19 မီးၵႂႃႇ 6,200 ပၢႆ ဝႃႈၼႆ။
တႄႇဢဝ် ဝၼ်းတီႈ 29/6/2021 – 22/5/2022 ၼႆႉ ၼႂ်းၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်းမူတ်း 6,201 ၵေႃႉ၊ ယႃၶႅၼ်း 6,099 ၵေႃႉ၊ လူႉတၢႆ 97 ၵေႃႉ တိုၵ်ႉယူတ်းယႃဝႆႉ 5 ၵေႃႉ သိုဝ်ႇၶၢဝ်ႇပိုၼ်ႉတီႈ ၵဵင်း တုင် ဢွၵ်ႇဝႆႉၼင်ႇၼႆ။
ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “တၢင်းပဵၼ်ၼႆႉ မၼ်းပဵၼ်ဢၼ်ယူဝ်းၵႂႃႇယဝ်ႉႁိုဝ်ဢမ်ႇႁူႉ တီႈၵဵင်းတုင်ၼႆႉ ဢမ်ႇပေႃးၵူဝ်ၵၼ်ယဝ်ႉ ၵူၼ်းမိူင်းၵေႃႈ ၵႂႃႇမႃးမိူၼ်ၵဝ်ႇၵူၺ်း မိူၼ်ဝႃႈ တၢင်းပဵၼ်ၼႆႉ ဢမ်ႇမီးယဝ်ႉ ၼႆၸိူင်ႉၼႆဢေႃႈ။ ၵူၼ်းမိူင်းၵမ်ႈၼမ်တႄႉဝႃႈ ပေႃးၵူဝ်ၼႆၵေႃႈ ဢမ်ႇ ၸၢင်ႈႁဵတ်းၵၢၼ်သင်ယဝ်ႉ ၵုမ်ႇလွၵ်ႉတွင်းယူႇတိၵ်းတိၵ်းၵူၺ်းဢိူဝ်ႈ လူဝ်ႇဢိုပ်းၶဝ်ႈၵၼ်ၵူၺ်းယဝ်ႉ”- ဝႃႈၼႆ။
ၼႂ်းလိူၼ်မေႊၼႆႉ ၸႄႈဝဵင်းၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်းၶူဝ်ႊဝိတ်ႉ 4 ၵေႃႉ မိူဝ်ႈဝၼ်းတီႈ 14/5/2022 ထူပ်းႁၼ် 2 ၵေႃႉ၊ ဝၼ်း တီႈ 19 သမ်ႉ 1 ၵေႃႉလႄႈ ဝၼ်းတီႈ 21 ၼႆႉ ထူပ်းႁၼ် 1 ၵေႃႉ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ