ၶၢဝ်းတၢင်းၸမ် 20 ဝၼ်းၼႆႉ ၼႂ်းၸႄႈဝဵင်းၵဵင်းတုင် ႁၼ်ၵူၼ်းၸပ်းၸိူဝ်ႉမႅင်း တၢင်းပဵၼ်ၶူဝ်ႊဝိတ်ႉ 19 – 3 ၵေႃႉ။
မိူဝ်ႈၼႆႉ ဝၼ်းတီႈ 19/5/2022 ၼႂ်းၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ၵူတ်ႇထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ထႅင်ႈၵေႃႉၼိုင်ႈ ပဵၼ်ဢွၼ်ႇၸၢႆးၼုမ်ႇ ဢႃယု 23 ပီ ၼႆယဝ်ႉ။
ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၵူတ်ႇထတ်းႁၼ် ထႅင်ႈၵေႃႉၼိုင်ႈ မိူဝ်ႈၼႆႉ ပဵၼ်ၽူႈၸၢႆး ဢႃယု 23 ပီ ပဵၼ်ၵူၼ်းဢွၵ်ႇ တၢင်း ၵူၼ်းၸႃႇတီႇမိူင်းယၢင်းၼႆၶႃႈဝႃႇ”- ဝႃႈၼႆ။
တႄႇဢဝ် ဝၼ်းတီႈ 1-19/5/2022 ၼႆႉ ၼႂ်းၸႄႈဝဵင်းၵဵင်းတုင် ၵူတ်ႇထတ်းႁၼ် ၵူၼ်းတိတ်းၸပ်းၶူဝ်ႊဝိတ်ႉ 19 တင်းမူတ်း 3 ၵေႃႉ။ မိူဝ်ႈဝၼ်း တီႈ 14 ၼၼ်ႉ ၵူတ်ႇထတ်းႁၼ် 2 ၵေႃႉ၊ မိူဝ်ႈၼႆႉ ဝၼ်းတီႈ 19 သမ်ႉ ၵူတ်ႇထတ်းႁၼ်ထႅင်ႈ ၵေႃႉၼိုင်ႈ ၼႆယဝ်ႉ။
ၼႂ်းၸႄႈဝဵင်းၵဵင်းတုင်ၼႆႉ ၵူတ်းထတ်းႁၼ် ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 တင်ႈတႄႇ ဝၼ်းတီႈ 29/6/2021 ထိုင် 16/5/ 2022 ၼႆႉ မီးၵူၼ်းတိတ်းၸပ်း တင်းမူတ်း 6,199 ၵေႃႉ၊ ယႃၶႅၼ်း 6,099 ၵေႃႉလႄႈ လူႉတၢႆ 97 ၵေႃႉ သိုဝ်ႉၶၢဝ်ႇၼႂ်းပိုၼ်ႉတီႈ ၵဵင်းတုင် ဢွၵ်ႇဝႆႉ ၼင်ႇၼႆ။