ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆးSHRF ဝႃႈ ၵူၼ်းၼုမ်ႇတႆး TYN သွင်ၵေႃႉဢၼ်တၢႆတီႈမူႇၸေႊ ပဵၼ်ယွၼ်ႉသိုၵ်းမၢၼ်ႈတီႉၺွပ်းၶျေႃးၵႃး ၵွပ်ႈပိူဝ်ႈၼႆ သိုၵ်းမၢၼ်ႈ တၵ်းတေလႆႈဢဝ်ပုၼ်ႈၽွၼ်း ၸွႆႈထႅမ်ပီႈၼွင်ႉၸိူဝ်ႉၶိူဝ်း ၶဝ်-ဝႃႈၼႆ။
မိူဝ်ႈၼႆႉ ဝၼ်းတီႈ 9/5/2022 ယူႇတီႈၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆး ၽိုၼ်ၼိုင်ႈ၊ ၸီႉၸမ်ႈဝႆႉဝႃႈ ၶွင်ႇသီႇသိုၵ်းမၢၼ်ႈ ယိုတ်းမိူင်း တၵ်းလႆႈတူၺ်းလူၶိုၼ်းၵူၼ်းႁိူၼ်းၵူၼ်းၼုမ်ႇၵျွၵ်ႉမႄး 2 ၵေႃႉၼၼ်ႉ ၊ ႁႂ်ႈလႆႈ လွင်ႈၽဵင်ႇပဵင်း/ ပဵၼ်ထမ်း ဝႃႈၼႆ။
ၸၢႆးႁေႃသႅင် ၽူႈၶၢၼ်ပၢၵ်ႇ SHRF လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈႁၼ်ဝႃႈ မၼ်းပဵၼ်ၵၢၼ် တဵၵ်းၸႂ်ႉႁႅင်းလၢႆၵၼ်ၵေႃႈၸႂ်ႈ ဢဝ်ၵူၼ်းမိူင်း ႁဵတ်းႁူဝ်ႉၶႄတူဝ်ၵေႃႈပဵၼ် ၊ ပူၼ်ႉပႅၼ်သုၼ်ႇလႆႈၵၼ် ၵေႃႈပႃး။ သိုၵ်းမၢၼ်ႈႁဵတ်းၼႆမႃး လၢႆပီလၢႆပၢၼ်ယဝ်ႉ။ တဵၵ်းၸႂ်ႉႁၢပ်ႇၶျေႃးလႄႈသင်၊ ၶျေႃး ရူတ်ႊ/ၵႃး ၵူၼ်းဝၢၼ်ႈၵူၼ်းမိူင်းလႄႈသင်ၸိူဝ်းၼႆႉ ထိုင်မိူဝ်ႈလဵဝ်ၵေႃႈ ၶဝ်တိုၵ်ႉယင်းၸႂ်ႉယူႇ” – ဝႃႈၼႆ။
လွင်ႈၼႆႉ သိုၵ်းမၢၼ်ႈတၵ်းလႆႈဢဝ်ပုၼ်ႈၽွၼ်း ၸွႆႈထႅမ်ပီႈၼွင်ႉၸိူဝ်ႉၶိူဝ်းၵူၼ်းၼုမ်ႇ သွင်ၵေႃႉၼၼ်ႉ။ ၵွပ်ႈပိူဝ်ႈသိုၵ်းမၢၼ်ႈတီႉၶျေႃးၵႃးလႄႈ ၵူၼ်းၼုမ်ႇ 2 ၵေႃႉၼၼ်ႉ ၸင်ႇထိုင်တီႈလႆႈလူႉတၢႆ။ ၵွပ်ႈၼႆ ႁႂ်ႈသိုၵ်းမၢၼ်ႈ တူၺ်းလူပၼ်ၶိုၼ်းၵူၼ်းႁိူၼ်းယေးၵူၼ်းၼုမ်ႇ 2 ၵေႃႉ၊ ႁႂ်ႈလႆႈပဵၼ်လွင်ႈ ၽဵင်ႇပဵင်းတႃႇၶဝ်လႄႈ ပီႈၼွင်ႉၸိူဝ်ႉၶိူဝ်း ၸိူဝ်းၵိုတ်းတၢင်းလင် ၸၢႆးႁေႃသႅင်လၢတ်ႈၼင်ႇၼႆ။
မိူဝ်ႈဝၼ်းတီႈ 4/5/2022 ယၢမ်းႁူဝ်ၶမ်ႈ 5 မူင်းပၢႆ ၽွင်းၵႃးၵူၼ်းၼုမ်ႇ ၸမ်ႁွတ်ႈတီႈဝၢၼ်ႈမေႃႈတွင်း ဢိူင်ႇၼႃးမူၼ်းၼၼ်ႉ သိုၵ်းတ ဢၢင်း TNLA ငွႆး ယိုဝ်းမၢၵ်ႇလူင်သႂ်ႇ။ ၵႃးၵူၼ်းၼုမ်ႇ ပိၼ်ႈတူၵ်းတၢင်း၊ ၸၢၵ်ႇမၢၵ်ႇတိူဝ်ႉၺႃးဢူၵ်း၊ ပဵမ်ႉ၊ ၶႃလႄႈမိုဝ်း ၊ ပုမ်၊ ႁူဝ်လႄႈၶႅၼ် ၶဝ်လူႉတၢႆတင်း 2 ။ သိုၵ်းမၢၼ်ႈဢၼ်ၶီႇမႃးၸွမ်းၵေႃႈတၢႆဢမ်ႇ ယွမ်းသိပ်းၵေႃႉ။
ၵူၼ်းၼုမ်ႇတႆးသွင်ၵေႃႉ ဢၼ်လႆႈလူႉတၢႆၵႂႃႇၼႆႉ ပဵၼ်ၵူၼ်းၵျွၵ်ႉမႄး။ ၸၢႆးၸၢမ်ႇလႃႉၼႆႉ ဢဝ်ပုၼ်ႈၽွၼ်း ပႃးဝႆႉၼႂ်းၸုမ်းဢွၼ်ႁူဝ် ၵေႃႁူမ်ႈသၢင်ႈ ၵူၼ်းၼုမ်ႇတႆး (TYN) လႄႈပႃးဝႆႉၼႂ်း ၸုမ်းၽူႈၼမ်းၼႂ်း ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU)။ ၸၢႆးသႅင်ႁၢၼ်ၵေႃႈ ပဵၼ်ၵူၼ်းဢၼ် ၸွႆႈႁူမ်ႈ ႁဵတ်းသၢင်ႈ ၸွမ်းမၼ်းၸၢႆး ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ