ႁႅင်းၵၢၼ်တႆး ၼၢင်းယိင်းၼုမ်ႇ ၵေႃႉၼိုင်ႈ ၽႅၼ်ၶေႃးတၢႆ တီႈၼႂ်းႁွင်ႈၶၢတ်ႈ(သဝ်း) မၼ်းၼၢင်း တီႈဝဵင်းၵဵင်းမႆႇ ၸိုင်ႈထႆး။
ပူၼ်ႉမႃး မိူဝ်ႈဝၼ်းတီႈ 27/4/2022 ယၢမ်းၵၢင်ၼႂ် ၼၢင်းပႅင်း ဢႃယု 30 ပၢႆ ၽႅၼ်ၶေႃးတၢႆ ၼႂ်းႁွင်ႈၶၢတ်ႈ မၼ်းၼၢင်း တီႈ ၸႄႈဝဵင်းႁၢင်ၻူင်း ၸႄႈတွၼ်ႈၵဵင်းမႆႇ ၸိုင်ႈထႆး ၊ ဢူၺ်းၵေႃႉၸမ်ၸႂ်မၼ်းၼၢင်းလၢတ်ႈဝႃႈ မီးပၼ်ႁႃလွင်ႈယူႇသဝ်းၵိၼ်သၢင်ႈသေဢမ်ႇၵႃးမီးပၼ်ႁႃၼႃႈႁိူၼ်းပႃးထႅင်ႈလႄႈ ပဵၼ်ၵႂႃႇႁိုဝ်ႈဝႃႈၼႆ။
ဢူၺ်းၵေႃႉ ၸမ်ၸႂ် ၼၢင်းပႅင်း လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မၼ်းၼၢင်းလႅပ်ႈတေၽႅၼ်ၶေႃးတၢႆ မိူဝ်ႈယၢမ်းၶမ်ႈ ဝၼ်းတီႈ 26 ၶႃႈ ယူဝ်ႉ။ ဝၼ်းတီႈ 27 ယၢမ်းၵၢင်ၼႂ် ၸင်ႇထူပ်းႁၼ် မၼ်းပေႃးတၢႆယဝ်ႉ။ တေဝူၼ်ႉၼမ် လွင်ႈၼႃႈၵၢၼ်တႃႇငၢၼ်း လွင်ႈၼႃႈႁေႃ တေႃႇႁိူၼ်းႁိုဝ် ဢမ်ႇႁူႉ။ ၸႂ်ဢမ်ႇလီၸွမ်းတႄႉၶႃႈ လွင်ႈပဵၼ်ၵႂႃႇၸိူင်ႉၼႆ”- ဝႃႈၼႆ။
ၼၢင်းပႅင်းၼႆႉ ပဵၼ်လုၵ်ႈယိင်း လုင်းဢုင်ႇလႄႈ ပႃႈသႃႇ ၵူၼ်းဝၢၼ်ႈၼႃးပၢင်ႇ ဢိူင်ႇႁႃႈဝၢၼ်ႈ ၸႄႈဝဵင်းၵေးသီး ၸႄႈတွၼ်ႈလွႆလႅမ် ၸိုင်ႈတႆး ပွတ်းၸၢၼ်း။ မီးလုၵ်ႈဢွၼ်ႇလဵၵ်ႉဝႆႉ ၵေႃႉၼိုင်ႈ ဢႃယုတေမီးမွၵ်ႈ 8 ၶူပ်ႇ ယၢမ်းလဵဝ် လုၵ်ႈဢွၼ်ႇၼႆႉ ယူႇဝႆႉၸွမ်းမႄႈထဝ်ႈ ဝႃႈၼႆ။
မိူဝ်ႈဝၼ်းတီႈ 29/4/2022 ၼၼ်ႉၵေႃႈ ႁႅင်းၵၢၼ်တႆး ၼၢင်းထူၺ်းလိုၼ်း ဢႃယု 28 ပီ လႆႈလူႉတၢႆၵႂႃႇ တီႈႁူင်းယႃ ၸႄႈဝဵင်းႁၢတ်ႇယႂ်ႇ ၸႄႈ တွၼ်ႈသူင်ၶလႃ ၼႂ်းၸိုင်ႈထႆး ။ ၼၼ်ႉၵေႃႈ ဝူၼ်ႉၼမ်ၶမ်ၸႂ်လၢႆလွင်ႈသေ ၵိၼ်ၼမ်ႉယႃလၢင်ႉႁွင်ႈၼမ်ႉ ၶႃႈတူဝ်တၢႆ မိူၼ်ၵၼ်။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ