ၼႂ်းဝဵင်းလႃႈသဵဝ်ႈ မီးၵူၼ်း ယိပ်းမိတ်ႈ/ လႅဝ်း ပႂ်ႉၸွမ်းတၢင်း လမ်းၸူၼ်ႁိမ်လိပ်း ဢဝ်ရူတ်ႉၶိူင်ႈ ၵူၼ်းၵႂႃႇမႃး ၶိူဝ်းယႂ်း ႁဵတ်းႁႂ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ မႆႈၸႂ်တႃႇၵႂႃႇမႃးႁႃၵိၼ်လဵင်ႉတွင်ႉ။
မိူဝ်ႈဝႃး ဝၼ်းတီႈ 26/4/2022 ယၢမ်းၵၢင်ၼႂ် မွၵ်ႈ 6 မူင်း ၵူၼ်း 3 ၵေႃႉ ယိပ်းတၢင်းမိတ်ႈ/ လႅဝ်းသေ ၶီႇရူတ်ႉၶိူင်ႈသွၼ်ႉမႃးၸွမ်းၵၼ် လမ်းၸူၼ်ဢဝ်ရူတ်ႉၶိူင်ႈ ၼၢင်းယိင်းၵေႃႉၼိုင်ႈ ၶီႇမႃးၵေႃႉလဵဝ် ၊ တီႈပွၵ်ႉ 4 ၼႂ်းၸႄႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ ။
ၵူၼ်းမိူင်း လႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၵူၼ်းႁၢႆႉ 3 ၵေႃႉၼၼ်ႉ ၶီႇရူတ်ႉၶိူင်ႈ သွၼ်ႉၵၼ်မႃးသေ ႁိမ်ဢဝ် ရူတ်ႉၶိူင်ႈၼၢင်း ယိင်း ၶီႇမႃးၵေႃႉလဵဝ်ၼၼ်ႉ။ ၵူၼ်းႁၢႆႉၼၼ်ႉ ယိပ်းပႃးမိတ်ႈလႅဝ်းသေ ၽတ်ႉသႂ်ႇၸဝ်ႈရူတ်ႉၶိူင်ႈၼၼ်ႉထႅင်ႈၵွၼ်ႇၶႃႈ။ ၵူၺ်းၵႃႈ ဢမ်ႇတၼ်းတိူဝ်ႉၶႃႈ၊ ၸူၼ်လိပ်းၸူၼ်လႅင် ဢဝ်ၵႂႃႇၸိူင်ႉၼၼ်ၵမ်းလဵဝ်ၶႃႈ”- ဝႃႈၼႆ။
ၼႂ်းဝၼ်းလဵဝ်ၵၼ်ၵူၺ်းၼင်ႇၵဝ်ႇ တီႈဝဵင်းလႃႈသဵဝ်ႈၼႆႉၵူၺ်း ရူတ်ႉၶိူင်ႈ ၵူၼ်းမိူင်း လမ်းၼိုင်ႈဢၼ်ၵိုတ်းဝႆႉ တီႈၼႃႈႁိူၼ်းၼၼ်ႉၵေႃႈ ၽူႈ ၸၢႆးသွင်ၵေႃႉ သွၼ်ႉရူတ်ႉၶိူင်ႈမႃးၸွမ်းၵၼ်သေ လၵ်ႉဢဝ်ၵႂႃႇ ၸဝ်ႈၶွင်ရူတ်ႉတၼ်းႁၼ်သေ ၼႅတ်ႈလႅၼ်ႈဢွၵ်ႇမႃး ဢမ်ႇတၼ်းၶိုတ်း ၵူၼ်းလၵ်ႉ ၼၼ်ႉ ႁေႃႈလႅၼ်ႈပၢႆႈ ဝႃႈၼႆ။
“တီႈလႃႈသဵဝ်ႈၼႆႉ ၽူႈလၵ်ႉၵူၼ်းၸူၼ် ၼမ်မႃးတင်ႈတႄႇသိုၵ်းမၢၼ်ႈ ယိုတ်းမိူင်းၼၼ်ႉမႃးယဝ်ႉ ၵူၺ်းၵႃႈ ဢၼ်ပဵၼ်ႁၢဝ်ႈႁႅင်း ပႂ်ႉၸူၼ်ရူတ်ႉၶိူင်ႈ ၵူၼ်းၵႂႃႇမႃး ၸွမ်းတၢင်း ၸိူင်ႉၼႆ တႄႇပဵၼ်မႃး ဝၢႆးသွၼ်းၼမ်ႉလိူၼ်ႁႃႈၼႆႉဢေႃႈ။ ၵွၼ်ႇၼႃႈၼၼ်ႉၵေႃႈ ပဵၼ်ယူႇ ၵူၺ်းၵႃႈ ဢမ်ႇပဵၼ်ႁႅင်း မွၵ်ႈ ၼႆႉ။ လွင်ႈႁူမ်ႇလူမ်ႈၵူၼ်းမိူင်းတႄႉ ယႃႇထၢမ်လႃႈ မၼ်းဢမ်ႇမီးသင်သေဢိတ်းယဝ်ႉ”- ၵူၼ်းလႃႈသဵဝ်ႈ သိုပ်ႇလၢတ်ႈ ၼင်ႇၼႆ။
ဝၢႆးလိူၼ်ႁႃႈသွၼ်းၼမ်ႉ ပူၼ်ႉမႃးၼႆႉ တီႈႁိမ်းဝၢၼ်ႈၸၢင်ႉၽႅတ်း မီးၵူၼ်းပႂ်ႉၸူၼ်ရူတ်ႉၶိူင်ႈၵူၼ်းဝၢၼ်ႈၵႂႃႇမႃးယဝ်ႉ ၵမ်းၼိုင်ႈယဝ်ႉ။ တီႈႁိမ်းဝၢၼ်ႈ ၼွင်မွၼ်ၼၼ်ႉၵေႃႈ ပဵၼ်မႃးယဝ်ႉ ၵမ်းၼိုင်ႈ ။
ဝၢႆးသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း ပီပၢႆၼႆႉ ၼႂ်းမိူင်းတႆး ပွတ်းႁွင်ႇ လၢႆၸႄႈဝဵင်း မိူၼ်ၼင်ႇ လႃႈသဵဝ်ႈ၊ မူႇၸေႊ၊ ၼမ်ႉၶမ်း ၸိူဝ်းၼႆႉ ၵႆႉမီး ၵူၼ်းႁၢႆႉ ပႂ်ႉၸူၼ်ႁိမ်ဢဝ် ရူတ်ႉၶိူင်ႈ၊ ထူင်ငိုၼ်း/ ၶမ်း လႄႈ ၾူၼ်း ၵူၼ်းမိူင်းပိုၼ်ႉတီႈ ၵႂႃႇမႃး ၸွမ်းတၢင်း ၸိူဝ်းၼႆႉ ႁၢဝ်ႈႁႅင်း မႃးလိူဝ်ၵဝ်ႇ။ ပလိၵ်ႈမၢၼ်ႈ/ သိုၵ်းမၢၼ်ႈ ဢမ်ႇတွၼ်ႈတီႉၺွပ်းလႆႈ တူဝ်ၵူၼ်းလၵ်ႉ ၵူၼ်းၸူၼ်မႃးသေပွၵ်ႈ။
လိူဝ်ၼၼ်ႉ ပၢင်တေႃႇလွင်းၵေႃႈ ပိုတ်ႇတေႃႇလဵၼ်ႈမႃးလွတ်ႈလွတ်ႈလႅဝ်းလႅဝ်း ဢမ်ႇမီးၽႂ်မႃးႁၢမ်ႈသီးလႆႈ လႄႈဢမ်ႇၸၢင်ႈဢဝ်လိူင်ႈၵၼ်လႆႈ၊ မၢင်တီႈပိုတ်ႇ ၼႂ်းႁိူၼ်းယေး ၵမ်းသိုဝ်ႈၵေႃႈမီး၊ ဢၼ်ပိုတ်ႇလဵၼ်ႈၼႂ်းႁူင်းပလိၵ်ႈ ၵေႃႈယင်းမီး။