သိုၵ်းမၢၼ်ႈဝႃႈ တၢင်းဝၢၼ်ႈၼပၢၼ်းၵျီး ဝဵင်းယႂႃႇငၢၼ်ႇ မီးသိုၵ်းၵူၼ်းၼုမ်ႇ PDF ၼႆသေ မိူဝ်ႈၼႆႉ 22/4/2022 ၵၢင်ၼႂ်ၸဝ်ႉ ယိုဝ်းၵွင်ႈလူင် ဢမ်ႇထၢတ်ႇ ။
သိုၵ်းမၢၼ်ႈထႅမ်ႁႅင်းသိုၵ်းၶိုၼ်ႈမႃးဢဝ်တီႈယူႇဝႆႉတီႈ ၵွင်းၽြႃးမုင်ႈယဵမ်ႈ (သိဝ်ႉၶိၼ်းတႃႇ) သေ ယိုဝ်းၵွင်ႈလူင် ၵႂႃႇတၢင်းတူၵ်းဝၢၼ်ႈ ၼပၢၼ်းၵျီး တင်ႈတႄႇၵၢင်ၼႂ် 7 မူင်းတေႃႇထိုင်ၵၢင်ဝၼ်းတဵင်ႈ။
“ၶဝ်မႃးယူႇၼိူဝ်ၵွင်းလွႆၽြႃးသေလၢမ်းလိမ်းယိုဝ်းၵွင်ႈလူင်ၵႂႃႇၵူႈတၢင်းဢေႃႈ ။ သဵင်လူင်မၼ်းလင်ဝႃႈလင်ၶႃႈ။ လိၼ်မိူင်းပေႃးသၼ်ႇဢေႃႈ။ ႁဝ်းၶႃႈယွၼ်းသူး ယႃႇႁႂ်ႈသိုၵ်း PDF ၶဝ်ယူႇလႃႈတၢင်းပုၼ်ႉၼႆယူႇဢေႃႈၼႆႉ။ ” – ၵူၼ်းဝၢၼ်ႈၼပၢၼ်းၵျီးလၢတ်ႈ။
တင်ႈဢဝ်ဝၼ်းတီႈ 18/4/2022 မႃးသိုၵ်းမၢၼ်ႈလႄႈ ၸုမ်းပိဝ်ႇၸေႃးထီး ဢၼ်ၸွႆႈသိုၵ်းမၢၼ်ႈ ထႅမ်ႁႅင်းသိုၵ်းၶိုၼ်ႈမႃးတၢင်းတူၵ်းဝၢၼ်ႈ ၼပၢၼ်းၵျီး။ ယွၼ်ႉပိူဝ်ႈဢဵၼ်ႁႅင်းဢမ်ႇငၢမ်ႇၵၼ် လႄႈသိုၵ်း PDF လႆႈပွႆႇပႅတ်ႈပၢင်သဝ်းဢၼ်ၼိုင်ႈ။
ၽွင်းၼၼ်ႉသိုၵ်းမၢၼ်ႈဢဝ်ၶိူင်ႈမိၼ်ယိုဝ်းသိုၵ်းဢၢၼ်းမႃးပိုတ်းယိုဝ်းၸုမ်း PDF ၵူၺ်းၵႃႈ ငဝ်းလၢႆး ၾိင်ႈၾႃႉဢမ်ႇၶႅမ်ႉ ၾူၼ်တူၵ်းႁႅင်းလႄႈ သိုၵ်းမၢၼ်ႈဢမ်ႇၸၢင်ႈယိုဝ်း ၊ ဢဝ်သိုၵ်း PDF လွတ်ႈၽေးၵႂႃႇလီငၢမ်း။
မိူဝ်ႈဝႃး ဝၼ်းတီႈ 21 ယၢမ်းၵၢင်ၶမ်ႈ 10 မူင်းၵေႃႈ သိုၵ်းမၢၼ်ႈလႄႈၸုမ်းပိဝ်ႇၸေႃးထီး ၵႃးသိုၵ်း 4 လမ်း ၶဝ်ႈမႃးၼႂ်းဝၢၼ်ႈၼပၢၼ်းၵျီး(ႁွင်ႇ)သေ မႃးသွၵ်ႈတဝ်ႁိူၼ်းၵူဝ်ႇတႅတ်ႉဢူး။ ဝၢႆးၼၼ်ႉ ၽဝ်ႁိူၼ်းပႅတ်ႈ -ၵူၼ်းမၢတ်ႇၸဵပ်းလူႉတၢႆတႄႉဢမ်ႇမီး၊ ယွၼ်ႉဝႃႈၵူၼ်းဝၢၼ်ႈပၢႆႈမူတ်းယဝ်ႉ ဝႃႈၼႆ။
သိုၵ်းၵူၼ်းၼုမ်ႇ PDF ဝဵင်းယႂႃႇငၢၼ်ႇ ယၢမ်းလဵဝ် ဢဵၼ်ႁႅင်းၵွင်ႈၵၢင်ႇ မၢၵ်ႇမိုဝ်ႈၸိုၼ်းယၢမ်း ဢႄႇမၢင်ဝႆႉ။ ယူႇတီႈၵူၼ်းမိူင်းတီႈၸမ်ၵႆ ၶႅၼ်းတေႃႈၶဝ်ႈႁူမ်ႈၵမ်ႉၸွႆႈမၢၵ်ႇမိုဝ်ႈၸိုၼ်းယၢမ်းပၼ်ဢိတ်းၼိုင်ႈ – ၸုမ်း PDF လၢတ်ႈၼင်ႇၼႆ။
ဝဵင်းယႂႃႇငၢၼ်ႇ ၼႃႈလိၼ်ၽွင်းငမ်းတူဝ်ၵဝ်ႇ ၸၢဝ်းၶိူဝ်းထၼု (ၸွမ်းၼင်ႇ ပိူင်ငဝ်ႈပိုင်းမိူင်း 2008) ၼႆႉပဵၼ်ၼႃႈလိၼ်ပိုၼ်ႉတီႈ တီႈဢၼ်ဢမ်ႇမီးတပ်ႉသိုၵ်းမၢၼ်ႈ လႄႈဢမ်ႇမီးသိုၵ်းၸၢဝ်းၶိူဝ်း။ ၵူၺ်းၵႃႈဢိင်ၼိူဝ်သိုၵ်းမၢၼ်ႈယိုတ်းမိူင်းၼႆႉ ႁၢႆႉမိူၵ်ႈလိူင်းၼိူဝ်ၵူၼ်းမိူင်းပူၼ်ႉတီႈလႄႈယၢမ်းလဵဝ် ၵူၼ်းၼုမ်ႇ ယႂႃႇငၢၼ်ႇ ဢွၼ်ၵၼ်ယိပ်းၵွင်ႈ တေႃႇသူႈပိုတ်းယိုဝ်းသိုၵ်းမၢၼ်ႈမႃးၶၢဝ်းတၢင်း 4-5 လိူၼ်။ ယွၼ်ႉပိူဝ်ႈပၢင်တိုၵ်းသေ ၾၢႆႇသိုၵ်းမၢၼ်ႈတၢႆယဝ်ႉ 9 ၵေႃႉ၊ ၾၢႆႇသိုၵ်းၵူၼ်းၼုမ်ႇ တၢႆ 4 ၵေႃႉ၊ ၵူၼ်းယႂႃႇငၢၼ်ႇ လဵၵ်ႉယႂ်ႇၼုမ်ႇထဝ်ႈ ၺႃးတီႉဝႆႉ 100 ပၢႆ လႆႈႁူႉၸွမ်းၶၢဝ်ႇ သိုၵ်းၵူၼ်းၼုမ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ