ၵူၼ်းဝၢၼ်ႈ ဢၼ်ယူႇၼႂ်းဝဵင်းလွႆၶေႃ ပၢႆႈၽေးသိုၵ်းမႃးသွၼ်ႈယူႇသဝ်းၼႂ်းၸိုင်ႈတႆးပွတ်းၸၢၼ်းၼၼ်ႉ ၺႃးယႃႉႁိူၼ်းယေး ဢဝ်ၶူဝ်းၶွင်ဢၼ်မီးၵႃႈၶၼ်ၵႂႃႇပႃးၸွမ်း။
ပဵၼ်ႁိူၼ်းၵူၼ်းဝၢၼ်ႈ မူင်ႇပျႃႇ ဢၼ်မီးၾၢႆႇတူၵ်းဝၢၼ်ႈ တေႃးဢူးၶူႇ ၼႂ်းဝဵင်းလွႆၶေႃ ၊ ႁၢင်ႇယၢၼ်ဝဵင်းမွၵ်ႈ 3 လၵ်း။ ဢိင်ၼိူဝ်သိုၵ်းမၢၼ်ႈလႄႈသိုၵ်းၵႅတ်ႇၶႄၵူၼ်းမိူင်း PDF ပိုတ်းယိုဝ်းၵၼ်မိူဝ်ႈႁူဝ်လိူၼ် ၵျၼ်ႊၼိဝ်ႊရီႊ ပူၼ်ႉမႃးသေ ၵူၼ်းဝၢၼ်ႈမူင်ႇပျႃႇ ဢွၼ်ၵၼ်ပၢႆႈၶဝ်ႈဝဵင်း ၊ ပၢႆႈၵႂႃႇယူႇတၢင်းမိူင်းတႆးပွတ်းၸၢၼ်း။ ႁိုင်မႃးၶၢဝ်းတၢင်း 4 လိူၼ် ၽိူဝ်ႇၵူၼ်းဝၢၼ်ႈပွၵ်ႈၶိုၼ်းတူၺ်းငဝ်းလၢႆးၼႂ်းဝၢၼ်ႈ ၊ ႁိူၼ်းယေးၵူၼ်းဝၢၼ်ႈၺႃးယႃႉသွၵ်ႈတဝ်ဢဝ်ၶူဝ်းၶွင်ၵႂႃႇ ၶႂ်ႈဝႃႈၵူႈႁိူၼ်း။
ၵူၼ်းဝၢၼ်ႈမူင်ႇပျႃႇ ၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ -“ တီႈႁိူၼ်းႁဝ်းၶႃႈၼၼ်ႉ ဢမ်ႇၵိုတ်းသင်သေမဵဝ်း၊ ႁူဝ်ၸၢၵ်ႈဝႃႇ၊ ၾူၼ်း မိုဝ်းထိုဝ်ဝႃႇ၊ တူႈယဵၼ်ဝႃႇၸိူဝ်းၼႆႉ ဢၼ်မီးၵႃႈၶၼ်ၼၼ်ႉႁၢႆမူတ်း။ ပေႃးပဵၼ်ႁိူၼ်းဢၼ်ၶတ်းသေႃးဝႆႉလီလီၼၼ်ႉ ယိင်ႈၶႅၼ်းၺႃးယႃႉတဝ်။ ယႃႉမၢၼ်ႇၽၵ်းတူႁူးလႅင်းသေၶဝ်ႈသွၵ်ႈၵွၼ်ႇဢေႃႈ။ ပဵၼ်သိုၵ်းမၢၼ်ႈႁိုဝ် ပဵၼ်ၽူႈလၵ်ႉႁိုဝ်ၵေႃႈဢမ်ႇႁူႉၶႃႈၼႃး။ ၶွင်ပိူဝ်ႈ ၵူၼ်းဝၢၼ်ႈတႄႉ ၸဵမ်မိူဝ်ႈပဵၼ်ပၢင်တိုၵ်းသေၵေႃႈ ဢွၼ်ၵၼ်ပၢႆႈမူတ်းယဝ်ႉၶႃႈၼႃႇ။ ပေႃးၵူၼ်းဝၢၼ်ႈဢမ်ႇယူႇ သိုၵ်းမၢၼ်ႈသမ်ႉၶဝ်ႈမႃးယူႇတႅၼ်းၼႂ်းဝၢၼ်ႈၼၼ်ႉၶႃႈၼႃႇ”- ဝႃႈၼႆ။
တီႈဝၢၼ်ႈမူင်ႇပျႃႇၼၼ်ႉ မီးလင်ႁိူၼ်းမွၵ်ႈ 300 ။ ယၢမ်းလဵဝ် ၵူၼ်းဝၢၼ်ႈၸိူဝ်းပၢႆႈၽေးသိုၵ်းၵႂႃႇမီးၼႂ်းဝဵင်းလွႆၶေႃ လႄႈ တၢင်းဝဵင်းမိူင်းပၢႆး -ၾၢႆၶုၼ် လႅၼ်လိၼ်တႆး-ယၢင်းလႅင်ၸိူဝ်းၼၼ်ႉ ပႆႇႁတ်းပွၵ်ႈႁိူၼ်းယေးၶိုၼ်း။ ၵူၼ်းၸိူဝ်းပွၵ်ႈမိူဝ်းၸႂ်းႁိူၼ်းယေးၵေႃႈ လႆႈဢဝ်လိၵ်ႈၵမ်ႉတီႈ ၵူၼ်းလူင်ဝၢၼ်ႈသေ လႆႈၵႂႃႇႁၢႆးငၢၼ်းတီႈ ပၢင်သဝ်းသိုၵ်းမၢၼ်ႈ ဢၼ်မႃးပၵ်းၼႂ်းဝၢၼ်ႈ ၽွင်းၶဝ်ႈဝၢၼ်ႈ ဢွၵ်ႇဝၢၼ်ႈၵူႈၵမ်း။
“သိုၵ်းမၢၼ်ႈမႃးပၵ်းယူႇသဝ်းၼႂ်းဝၢၼ်ႈလႄႈ ပေႃးတေဢွၵ်ႇ တေၶဝ်ႈဝၢၼ်ႈမိူဝ်ႈလႂ်ၵေႃႈ လႆႈၵႂႃႇႁၢႆးငၢၼ်းတီႈၶဝ်ယူႇၵူႈၵမ်း။ ပေႃးၶဝ် ယူႇၼႂ်းဝၢၼ်ႈဝႆႉၼႆ ပၢင်တိုၵ်း သမ်ႉ ၸၢင်ႈပဵၼ်ၵူႈမိူဝ်ႈလႄႈ ႁဝ်းၶႃႈၵေႃႈ မိူဝ်းယူႇႁိူၼ်းယူႇၵေႃႈ ဢမ်ႇမီးလွင်ႈႁူမ်ႇလူမ်ႈၶႃႈၼႃႇ။ ၶဝ်ၵေႃႈဝႃႈဢေႃႈ ပေႃးၸုမ်းသိုၵ်းလုၵ်ႈဢွၼ်ႇမႃးယိုဝ်းၶဝ်တႄႉ ၶဝ်ၵေႃႈ တေလႆႈယိုဝ်းၵႅတ်ႇၶႄတူဝ်ၶိုၼ်းၼႆၶႃႈလူး။ ” ၵူၼ်းဝၢၼ်ႈမူင်ႇပျႃႇ သိုပ်ႇလၢတ်ႈထႅင်ႈၼင်ႇၼႆ။
ၵူၼ်းဝၢၼ်ႈမူင်ႇပျႃႇၼႆႉမိူဝ်ႈၵွၼ်ႇ ႁဵတ်းၵၢၼ်ၽုၵ်ႇသွမ်ႈ၊ ၵၢၼ်ၵေႃႇသၢင်ႈ၊ ၵၢၼ်ၵႃႉၶၢႆ။ ၽိူဝ်ႇပဵၼ်ပၢင်တိုၵ်းမႃး ၵူၼ်းဝၢၼ်ႈဢွၼ်ၵၼ်ဢဝ်ၶူဝ်းဢၼ်မီးၵႃႈၶၼ် ဢၼ်ဢဝ်ငၢႆႈသေ ဢွၵ်ႇပၢႆႈ။ ဢမ်ႇလႆႈႁဵတ်းၵၢၼ်သင် ၼင်ႈၵိၼ်ၶူဝ်းၵဝ်ႇဢၼ်မီးဝႆႉၼၼ်ႉမႃး 3-4 လိူၼ် ၸမ်တေမူတ်းယဝ်ႉလႄႈ ယၢမ်းလဵဝ် ႁူပ်ႉတင်းယၢပ်ႇၽိုတ်ႇ။ တေပွၵ်ႈႁိူၼ်းၵေႃႈဢမ်ႇၸၢင်ႈ ၊ တေသိုပ်ႇပၢႆႈၽေးသိုၵ်းဝႆႉယူႇၵေႃႈဢမ်ႇမီးၵၢၼ်၊ ၸိူဝ်းဢမ်ႇယူႇတီႈၵျွင်းမုၼ်ၸဝ်ႈ သမ်ႉဢမ်ႇလႆႈလွင်ႈၵမ်ႉၸွႆႈသင်။
“တေပွၵ်ႈမိူဝ်းယူႇတီႈဝၢၼ်ႈၵေႃႈ ဢမ်ႇၸၢင်ႈႁဵတ်းၵိၼ်ၵၢၼ်သင်။ ဢမ်ႇမီးငိုၼ်းတႃႇလူင်းတိုၼ်းလၢင်းယဝ်ႉ။ ဢၼ်မီးၵေႃႈၵိၼ်မူတ်းယဝ်ႉ။ တေမိူဝ်းႁဵတ်းၵၢၼ်သူၼ် သိုၵ်းမၢၼ်ႈသမ်ႉမႃးပၵ်းပၢင်သဝ်းၶဝ်ယူႇဝႆႉတၢင်းသူၼ်ႁဝ်း။ ပေႃးၵႂႃႇႁဵတ်းၵၢၼ် ၵေႃႈၵူဝ်ဢမ်ႇလွတ်ႈၽေး တေႁဵတ်းႁိုဝ်ပေႃးဢမ်ႇႁူႉယဝ်ႉၶႃႈၼႆႉ ။ ၸႂ်ၵေႃႈၸႂ်ထိုင်ႁိူၼ်းၼႃႇယဝ်ႉ”- မၼ်းၼၢင်း ၶၢင်းပွင်ႉပိုတ်ႇဢူၵ်းပိုတ်ႇၸႂ်မၼ်းၼင်ႇၼႆ။
သိုၵ်းမၢၼ်ႈ ၸႂ်ႉၶိူင်ႈမိၼ်ယိုဝ်းသိုၵ်း ၼၼ်ႉ ပိုတ်းယိုဝ်း သိုၵ်းၽွမ်ႉႁူမ်ႈ သိုၵ်းၵႅတ်ႇၶႄၵူၼ်းမိူင်း PDF တင်း သိုၵ်းယၢင်းလႅင် KNDF ၊ သိုၵ်းမၢၼ်ႈ ဢမ်ႇဝႄႈႁိူၼ်းၵူၼ်း ဢမ်ႇဝႄႈဝၢၼ်ႈဢိူင်ႇသေ ယိုဝ်းလူင်းတိူဝ်ႉသႂ်ႇႁိူၼ်းယေးၵူၼ်းဝၢၼ်ႈလႄႈ ၵူၼ်းဝၢၼ်ႈဢွၼ်ၵၼ်ပၢႆႈၽေးသိုၵ်း။ ၶၢဝ်းတၢင်းသိုၵ်းမၢၼ်ႈယိုတ်းမိူင်းမႃး ပီပၢႆၼႆႉ ၵူၼ်းမိူင်းယၢင်းလႅင် ဢၼ်မီးႁိမ်းၸမ် 3 သႅၼ်ၼၼ်ႉ လႆႈပၢႆႈၽေးသိုၵ်းမွၵ်ႈၶိုင်ႈပၢႆ။ ၵမ်ႈၽွင်ႈပၢႆႈၸူးလႅၼ်လိၼ်ထႆး ၵမ်ႈၽွင်ႈမႃးတင်းလႅၼ်လိၼ်တႆး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ