မိူဝ်ႈၼႆႉ ဝၼ်းတီႈ 11/4/2022 ယၢမ်းႁူဝ်ၶမ်ႈ မွၵ်ႈ 6 မူင်းပၢႆ   ၽူႈၸၢႆးသွင်ၵေႃႉ ပႃးၵွင်ႈပႃးလႅဝ်းသေ ၶဝ်ႈၸူၼ် ႁိူၼ်းယေးၵူၼ်း ဝၢၼ်ႈ တီႈပွၵ်ႉၸၢၼ်း ဝဵင်းမူႇၸေႊ ၸိုင်ႈတႆးပွတ်းႁွင်ႇ ၸူၼ်လႆႈၵႂႃႇတိူၵ်ႈငိုၼ်းသွင်တိူၵ်ႈ ၼႆယဝ်ႉ။

ၵူၼ်းပိုၼ်ႉတီႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်ၵႂႃႇမိူဝ်ႈၵႆႈ ယၢမ်း 6 မူင်းပၢႆၼႆႉၵူၺ်း။ ၶဝ်မႃးၸွမ်းၵၼ် ၵႃးသွင်လမ်း ။  ၽူႈၸၢႆး 2 ၵေႃႉ လူင်းၵႃးမႃး၊  ၵေႃႉၼိုင်ႈယိပ်းၵွင်ႈ၊ ၵေႃႉၼိုင်ႈယိပ်းလႅဝ်းသေ  ၶဝ်ႈႁိူၼ်းၵႂႃႇ။ ၼႂ်းႁိူၼ်းၼၼ်ႉသမ်ႉ မီးဝႆႉလုၵ်ႉပႂ်ႉၶဝ်လႄႈ လၢၼ်ႇ ဢွၼ်ႇၶဝ်ၵူၺ်း။ မိူဝ်ႈၵူၼ်းႁၢႆႉသွင်ၵေႃႉ ၶဝ်ႈၵႂႃႇၼၼ်ႉ လုၵ်ႉပႂ်ႉၶဝ်ႁွင်ႈသႅၼ်ႇ ၊  ၵူၼ်းႁၢႆႉၼၼ်ႉ ၵႂႃႇၺွပ်းလုၵ်ႈဢွၼ်ႇသေ လႅပ်ႈတေၵွင်ႈၸမ်ႈႁိုဝ်ဢမ်ႇႁူႉ ဢဝ်သဵင်ႁွင်ႉလုၵ်ႈပႂ်ႉၶဝ်ယဵၼ်ၵႂႃႇ။ ယူႇၵမ်းၼိုင်ႈၵေႃႈၵူၼ်းႁၢႆႉယွင်ႈတိူၵ်ႈငိုၼ်းဢွၵ်ႇမႃး 2 တိူၵ်ႈ။တၢင်ႇၵႃးသေ သွင်ႉပၢႆႈၵႂႃႇၶႃႈဢေႃႈ”- ဝႃႈၼႆ။

ငိုၼ်းၼႂ်းတိူၵ်ႈၼၼ်ႉတေပႃးၵႂႃႇၵႃႈႁိုဝ်ၵေႃႈဢမ်ႇပႆႇႁူႉႁူဝ်ယွႆႈတႅတ်ႈတေႃး။ ၵူၼ်းႁၢႆႉ 2 ၵေႃႉၼၼ်ႉပဵၼ်ၽႂ်ၵေႃႈဢမ်ႇႁူႉ။  ယၢမ်းလဵဝ် ပၢႆႈလွတ်ႈဝႆႉ။ ယူႇတီႈပလိၵ်ႈ/ ယေးမၢၼ်ႈၶဝ်တႄႉ တိုၵ်ႉၵူတ်ႇထတ်း လွင်ႈတၢင်းပိူင်ပဵၼ်မၼ်းဝႆႉယူႇ ဝႃႈၼႆ။

“ ၽွင်းပလိၵ်ႈလႄႈသိုၵ်းမၢၼ်ႈမႃးၸႅတ်ႈမႃးထၢမ်တူၺ်းၼၼ်ႉ ၸွမ်းၼႃႈႁိူၼ်းၶဝ်ၵေႃႈမီးဝႆႉ ပျီႇတူႉၸိတ်ႉ ပေႃးတဵမ်လူင်ဝႆႉ ၶႃႈဢေႃႈ။ ႁိူၼ်းလင်ၼႆႉ တေပဵၼ်ၸၢဝ်းၶႄႇ တေလႅပ်ႈၵွင်ႉၵၢႆႇၵၼ် တင်းၸုမ်းပျီႇတူႉၸိတ်ႉဝႆႉယူႇ။  ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

 သိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း ပီပၢႆၼႆႉ ၼႂ်းၸႄႈဝဵင်းမူႇၸေႊ ၵႆႉမီးလွင်ႈၸူၼ်ၵၼ်၊ ယိုဝ်းၵၼ်တၢႆမႃးၶိူဝ်းယႂ်း။ ဢိင် ၼိူဝ်လွင်ႈၼႆႉယူႇတီႈသိုၵ်းမၢၼ်ႈ/ ပလိၵ်ႈမၢၼ်ႈ ဢမ်ႇတွၼ်ႉတီႉၺွပ်း ၵုမ်းတူဝ်လႆႈၵူၼ်းႁၢႆႉမႃးသေပွၵ်ႈ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 10/3/2022 ၼၼ်ႉၵေႃႈ ယၢမ်းႁူဝ်ၶမ်ႈ 5 မူင်းပၢႆ ၵူၼ်းလႅၵ်ႈငိုၼ်းၶႄႇ တီႈပွၵ်ႉၵၢတ်ႇ ၵၢင်ဝဵင်းမူႇၸေႊ ထုၵ်ႇၵူၼ်းႁၢႆႉ ၶဝ်ႈ ၸူၼ် ၼႂ်းႁိူၼ်း လႆႈၵႂႃႇငိုၼ်းၶႄႇ ထူင်ၵျၢၼ်ႇၵျွင်းပဵၼ် 4-5 ထူင် ၼၼ်ႉၵေႃႈ လႆႈလူႉသုမ်းတင်းၼမ်လၢႆ မိူၼ်ၵၼ်ႇ။