မိူဝ်ႈၼႆႉ ဝၼ်းတီႈ 8/4/2022 တႄႇဢဝ် ယၢမ်းၵၢင်ၼႂ်မွၵ်ႈ 10 မူင်း သိုၵ်းတဢၢင်း TNLA ဢဝ်ၵႃးသိုၵ်းၶဝ်မႃးပႂ်ႉ ၵဵပ်းၶွၼ်ႇတီႈၸဝ်ႈၵႃး ၼိူဝ်သဵၼ်ႈတၢင်းလူင် ၼႂ်းၵႄႈၼမ်ႉၵူတ်ႉ – ၼွင်သူၺ် ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၼႆ ယဝ်ႉ။
ၵူၼ်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ၶဝ်ပႃးၵွင်ႈၸေးမိုဝ်းသေ ႁႄႉရူတ်ႉၵႃးၵိုတ်း ယွၼ်းငိုၼ်း ၸဝ်ႈၵႃးၵႂႃႇမႃး တႄႇဢဝ် ၵၢင်ၼႂ် 10 မူင်းၼႆႉၵႂႃႇ မၢင်ၵေႃႉ ၵႂႃႇပွႆးလူႇတၢၼ်း တီႈလွႆသၢမ်သိပ်းၵူၺ်းၵေႃႈ မႆႈၸႂ်တႃႇတေပွၵ်ႈႁိူၼ်းၶိုၼ်း”- ဝႃႈၼႆ။
ပေႃးပဵၼ်ၵႃးလူင်ၼႆ TNLA ၵဵပ်း 1 လမ်း 3 သႅၼ်ပျႃး။ ပေႃးမႃးပႂ်ႉၵဵပ်း 1 ၵမ်း ၵူၼ်းသိုၵ်းၶဝ်ပႃးမႃး 3-4 ၵေႃႉ ပႃးၵွင်ႈၸေးမိုဝ်းၵူႈၵေႃႉ။
“ပေႃးၶဝ်ယွၼ်း ဢမ်ႇပၼ်ဢမ်ႇလႆႈၶႃႈလူင် လႆႈၵူဝ်ၶႃႈဢေႃႈ။ ၵူၼ်းၶဝ်ပႃးၵွင်ႈၸေးမိုဝ်းလႄႈ ၶဝ်ယွၼ်းၵႃႈႁိုဝ်ၵေႃႈ ၵႃႈလႆႈပၼ်။ သင်ဝႃႈ ၸဝ်ႈၵႃး ဢမ်ႇမီးငိုၼ်းဢမ်ႇပႃးငိုၼ်းမႃးပၼ်ပႃးၸွမ်းၼႆ ပဵၼ်ဢၼ်ယၢပ်ႇၽိုတ်ႇႁႅင်းတႄႉၶႃႈဢေႃႈ ၼၼ်ႉ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။
မိူဝ်ႈဝၼ်းတီႈ 5 ၼၼ်ႉၵေႃႈ သိုၵ်းတဢၢင်း TNLA ၼႆႉၵူၺ်းၼင်ႇၵဝ်ႇ ပႂ်ႉၵဵပ်းၶွၼ်ႇ ၼိူဝ်သဵၼ်ႈတၢင်းလူင်ၼႆႉမႃးယဝ်ႉ ၵမ်းၼိုင်ႈ။
ၼႂ်းၸႄႈဝဵင်းၵူတ်ႉၶၢႆၼႆႉ မီးဝႆႉ ၸုမ်းယိပ်းၵွင်ႈၵၢင်ႇတူင်ႉၼိုင် ယူႇဝႆႉ မိူၼ်ၼင်ႇ ၶွင်ႇသီႇသိုၵ်းမၢၼ်ႈ ယိုတ်းမိူင်း၊ သိုၵ်းတဢၢင်း TNLA သိုၵ်းၶၢင် KIA လႄႈ သိုၵ်းဝၢၼ်ႈႁႆး SSPP ၸိူဝ်းၼႆႉ။
