သိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် တီႈဝဵင်းၵူတ်ႉၶၢႆ ႁၢဝ်ႈႁႅင်း လွင်ႈမၢတ်ႇၸဵပ်းတၢင်းသွင်ၾၢႆႇတႄႉ ပႆႇႁူႉ။
မိူဝ်ႈဝႃး ဝၼ်းတီႈ 5/4/2022 ယၢမ်းၵၢင်ဝၼ်း မွၵ်ႈ 12 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၼမ်ႉၵူတ်ႉ ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ။
ၵူၼ်းၵူတ်ႇၶၢႆ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ သွင်ၾၢႆႇပဵၼ်ပၢင်တိုၵ်းၵၼ် ႁၢဝ်ႈႁႅင်း ၵႃးလူင်ၵႃးဢွၼ်ႇ လႆႈၵိုတ်းယင်ႉဝႆႉ ဢမ်ႇ ၸၢင်ႈၵႂႃႇမႃးၵမ်းၼိုင်ႈ။ ၵႃးၼႆႉ ၵိုတ်းဝႆႉ တႄႇဢဝ်တၢင်းၶဝ်ႈဝဵင်းၵူတ်းၶၢႆ ယၢဝ်းလူင်ၵႂႃႇ ႁိမ်းၵဵၵ်းဢေႊသျိူဝ်ႊဝေႃႊ ဢၼ်လုၵ်ႉသႅၼ်ဝီၶိုၼ်ႈမႃး ၼၼ်ႉ။ ၵူၺ်းၵႃႈ လွင်ႈမၢတ်ႇၸဵပ်း လူႉတၢႆသိုၵ်းတင်းသွင်ၾၢႆႇတႄႉ ဢမ်ႇလႆႈႁူႉၶႃႈ”- ဝႃႈၼႆ။
မိူဝ်ႈဝႃးဝၼ်းတီႈ 5 ယၢမ်းၵၢင်ၼႂ် ၵွၼ်ႇပႆႇပဵၼ်ပၢင်တိုၵ်းၵၼ်ၼၼ်ႉ သိုၵ်းတဢၢင်း TNLA ပႂ်ႉၵဵပ်းငိုၼ်းၸဝ်ႈၵႃးၵႂႃႇမႃး တီႈႁိမ်းဝၢၼ်ႈၼမ်ႉၶႆႉ ၵႃးလူင် 1 လမ်း လႆႈပၼ် 3 သႅၼ်ပျႃး၊ ၵႃးဢွၼ်ႇ 1 လမ်း 1 သႅၼ်ပျႃးလႄႈ ၵႃးႁိူၼ်းသုၼ်ႇတူဝ် 1 လမ်း 3 မိုၼ်ႇပျႃး။
ၼွၵ်ႈလိူဝ်ၼၼ်ႉ ပလိၵ်ႈမၢၼ်ႈ/ ၶွင်ႇသီႇသိုၵ်းမၢၼ်ႈ ယိုတ်းမိူင်း ႁူမ်ႈၵၼ်သေ ပႂ်ႉၵူတ်ႇထတ်းၵူၼ်းၵႂႃႇမႃး တီႈတၢင်းၽႄၵႂႃႇမိူင်းၸီးၼၼ်ႉ ႁၢဝ်ႈ ႁႅင်း သေ ၵဵပ်းပႃးငိုၼ်းတီႈၸဝ်ႈၵႃးထႅင်ႈ ဝႃႈၼႆ။
မိူဝ်ႈဝၼ်းတီႈ 4/4/2022 ၼၼ်ႉ တႄႇဢဝ် ယၢမ်းၵၢင်ၼႂ် တေႃႇထိုင် ၵၢင်ဝၼ်းမွၵ်ႈ 12 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်းတင်း သိုၵ်းၶႄႇၵဝ်ႈ ၵၢင်ႉ MNDAA ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းဢိူင်ႇမိူင်းပေႃႈ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ