ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF သၢၼ်ၶတ်းလွင်ႈသိုၵ်းမၢၼ်ႈပေႃႉထုပ်ႉၵူၼ်းမိူင်းၵျွၵ်ႉမႄးထိုင်တီႈလူႉတၢႆ ဝၢႆးလင်မၢၵ်ႇတႅၵ်ႇတီႈလုမ်းၾၢႆႇလိူမ်ႈလႆႇ ဝဵင်းၵျွၵ်ႉမႄး၊ လွင်ႈၼႆႉ  မီးလွင်ႈၽဵင်ႇပဵင်း ပဵၼ်ထမ်း တႃႇပီႈၼွင်ႉၸိူဝ်ႉၶိူဝ်း ၵေႃႉဢၼ်လူႉတၢႆလႄႈမၢတ်ႇၸဵပ်း။

မိူဝ်ႈၼႆႉ ဝၼ်းတီႈ 5/4/2022  ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး SHRF ဢွၵ်ႇၽိုၼ်တၢမ်းငဝ်းလၢႆးၽိုၼ်ၼိုင်ႈ  ၸီႉၸမ်ႈဝႆႉ လွင်ႈ သိုၵ်းမၢၼ်ႈဢမ်ႇတွင်ႈဢမ်ႇထၢမ်သင်သေ ပေႃႉထုပ်ႉၵူၼ်းမိူင်းထိုင်တၢႆၼၼ်ႉ သိုၵ်းမၢၼ်ႈတၵ်းလႆႈ ႁပ်ႉ  ပုၼ်ႈၽွၼ်း  ဝႃႈၼႆ။

ၸၢႆးႁေႃသႅင် ၵဝ်ႉငဝ်ႈသုၼ်ႇလႆႈၵူၼ်း ၸိုင်ႈတႆး လၢတ်ႈတီႈၽူႈတွႆႇႁွၵ်ႈဝႃႈ – “ ယူႇတီႈ သုၼ်ႇလႆႈၵူၼ်းႁဝ်းၶႃႈ ႁၼ်ဝႃႈ ၵၢၼ်ႁဵတ်းႁၢႆႉမိူၵ်ႈၸိူင်ႉၼႆ မၼ်းလိူင်းၸိူင်း၊ ၶဝ် ဝႆႉၵူၼ်းမိူင်းမိူၼ်မူတ်ႉ မိူၼ်မႅင်းၵူၺ်း။ ၶဝ်ၶႂ်ႈႁဵတ်းသင်ႁဵတ်း ဢဝ်ၵမ်ႉၸႂ် ၶဝ်ဝႃႈ။ သိုၵ်း/ ၸဝ်ႈၼႃႈတီႈ ဢမ်ႇႁဵတ်းၸွမ်း ၼႃႈတီႈပုၼ်ႈၽွၼ်း။  ဢၼ်လူဝ်ႇဢဝ်လွင်ႈ ႁူမ်ႇလူမ်ႈပၼ် ၵူၼ်းမိူင်း ပဵၼ်လွင်ႈယႂ်ႇ။ ၼႆႉသမ်ႉ ယႃႇဝႃႈတေမေႃဢီးလူၵူၼ်းမိူင်း ၊ သမ်ႉမႃး ယူႇၼိူဝ်ပၵ်းပိူင်ၶဝ်ၼၼ်ႉသေ ပေႉၵိၼ် ၵူၼ်းမိူင်း။ ယဝ်ႉၵေႃႈ ဢမ်ႇမီးလွင်ႈႁပ်ႉဢဝ်ပုၼ်ႈၽွၼ်း ဢၼ်ၶဝ်ႁဵတ်းၽိတ်းၼၼ်ႉသင်။ ႁဝ်းၶႃႈ သၢၼ်ၶတ်းလွင်ႈၼႆႉ တုၵ်းယွၼ်း ႁႂ်ႈ မီးလွင်ႈၽဵင်ႇပဵင်း ပဵၼ်ထမ်း တႃႇပီႈၼွင်ႉၸိူဝ်ႉၶိူဝ်း ၵူၼ်းဝၢၼ်ႈသွင်ၵေႃႉၼႆႉ။ သိုၵ်းမၢၼ်ႈတၵ်းလႆႈႁပ်ႉပုၼ်ႈၽွၼ်း ၸွႆႈထႅမ်  ”– ဝႃႈၼႆ။

မိူဝ်ႈဝၼ်းတီႈ 29/3/2022  ဝၢႆးလင်မၢၵ်ႇတႅၵ်ႇတီႈလုမ်းၾၢႆႇလိူမ်ႈလႆႇဝဵင်းၵျွၵ်ႉမႄးသေ ထိုင်မႃးယၢမ်းဝၢႆးဝၼ်း 4 မူင်း ၸၢႆးပီး ဢႃယု 43 ပီလႄႈ လၢၼ်ၸၢႆးမၼ်း ၸၢႆးဢွင်ႇၵျေႃႇဢူး ဢႃယု 28 ပီ  သွၼ်ႉရူတ်ႉၶိူင်ႈၵၼ်သေ ၵႂႃႇသိုဝ်ႉၽၵ်း တီႈပွၵ်ႉ 9 မႃး၊  တေပွၵ်ႈမိူဝ်းႁိူၼ်း ဝၢၼ်ႈၼွင်ပိင်ၼၼ်ႉ ထုၵ်ႇသိုၵ်းမၢၼ်ႈ ဢဵၼ်ႁႅင်း 20 ပၢႆ ႁႄႉၶဝ်ၵိုတ်းတီႈပွၵ်ႉ 6 ၼၼ်ႉသေ  ပေႃႉထုပ်ႉၶဝ်တင်းသွင်ႁၢဝ်ႈႁႅင်း။ ၶဝ်သွင်ၵေႃႉ လႆႈမၢတ်ႇၸဵပ်းႁၢဝ်ႈႁႅင်း လိုမ်းတူဝ်ၵႂႃႇ၊ သိုၵ်းမၢၼ်ႈ ဢဝ်တူဝ် ၸၢႆးဢွင်ႇၵျေႃႇဢူး ၵႂႃႇတီႈႁူင်းပလိၵ်ႈ။ ၸၢႆးပီးသမ်ႉ ဢဝ် ၵႂႃႇတီႈႁူင်းယႃ ၵျွၵ်ႉမႄးသေ ၵႂႃႇတၢႆတီႈႁူင်းယႃ။

“ၸၢႆးပီး ဢၼ်တၢႆၵႂႃႇၼၼ်ႉ မၼ်းပဵၼ်ၵူၼ်းဝၢၼ်ႈၵူၺ်း၊  ဢမ်ႇၵဵဝ်ႇၶွင်ႈ ၸွမ်းၵၢၼ်ဝၢၼ်ႈၵၢၼ်မိူင်းသင်၊ ပဵၼ်ၵူၼ်း မိူင်း ၽၵ်းၵႃႇ ဢၼ်ႁဵတ်းႁႃလဵင်ႉတွင်ႉ လူၺ်ႈလၢႆး ထုၵ်ႇမႅၼ်ႈၵူၺ်း။ ထႅင်ႈလွင်ႈၼိုင်ႈၵေႃႈ ၶႂ်ႈၾၢင်ႉထိုင်ၵူၼ်းမိူင်းႁဝ်းၶႃႈ လွင်ႈၵႂႃႇမႃး ၽွင်းယၢမ်း ဝၢၼ်ႈမိူင်း သုၵ်ႉယုင်ႈ  ဢမ်ႇမီးပၵ်းပိူင်သင်ႁူမ်ႇငမ်းၼႆႉ လူဝ်ႇၾၢင်ႉ လွင်ႈၵႂႃႇတႂ်ႈမိူဝ်းၼိူဝ် ၽွင်ႈ ၶႃႈ”- ၸၢႆးႁေႃသႅင် သိုပ်ႇလၢတ်ႈၼႄၼင်ႇၼႆ။

ထိုင်မႃးဝၼ်းတီႈ 30/3/2022 မွၵ်ႈၶၢဝ်းယၢမ်း 1 မူင်းဝၢႆးဝၼ်း ပီႈၼွင်ႉ ၸၢႆးပီး လုၵ်ႉပုင်ႇဝူဝ်းမႃးဢဝ်တူဝ်တၢႆၸၢႆးပီး တီႈႁူင်းယႃ၊ ယင်းလႆႈပၼ်ထႅင်ႈၵႃႈၽႃႇ တတ်း  54,000 ၵျၢပ်ႈ ၸင်ႇလႆႈတူဝ်တၢႆဢဝ်မိူဝ်းၽဝ် တီႈပႃႇႁဵဝ်ႈ ၵျွၵ်ႉမႄး မွၵ်ႈၶၢဝ်းယၢမ်း 2 မူင်းဝၢႆးဝၼ်း။

ၵႃႈလုမ်းလႃးၶၢပ်ႈတူဝ်တၢႆ/ ပၢင်ၸႃႉ (မႃႇသႃႇ) ၼၼ်ႉ တင်းမူတ်း တူၵ်းမႅၼ်ႈ 500,000 ပျႃး။ ၵူၺ်းၵႃႈ သိုၵ်းမၢၼ်ႈ ဢမ်ႇၸွႆႈထႅမ် သၢႆႈတႅၼ်း သင်သေၸိူဝ်ႉသေပိူင်  ။  

 ၸၢႆးပီးၼႆႉ မီးပီႈၼၢင်း 5 ၵေႃႉ၊ ပဵၼ်လုၵ်ႈၵေႃႉလဵၵ်ႉသုတ်းသေ ႁဵတ်းၵၢၼ်မႄးရူတ်ႉၵႃး ႁႃငိုၼ်းလဵင်ႉပီႈၼၢင်းမၼ်း။

  ၸၢႆးဢွင်ႇၵျေႃႇဢူးဢၼ်ပဵၼ်လၢၼ်ၸၢႆးမၼ်းၼၼ်ႉတႄႉ ၶိုၼ်းမႃးယူႇႁိူၼ်းယူတ်းယႃတူဝ် ႁွႆးမၢတ်ႇၸဵပ်းဢၼ်သိုၵ်းမၢၼ်ႈပေႃႉထုပ်ႉၼၼ်ႉယူႇ ဝႃႈၼႆ။