သိုၵ်းမၢၼ်ႈ ယိုတ်းမိူင်းလႄႈတူဝ်တႅၼ်းပႃႇတီႇမႂ်ႇသုင်ၸိုင်ႈတႆး    SSPP ဢုပ်ႇၵၼ်တီႈၼေႇပျီႇတေႃႇၼၼ်ႉ သိုၵ်းမၢၼ်ႈသင်ႇႁႂ်ႈ  SSPP ၸိူဝ်းတူင်ႉၼိုင်ယူႇသဝ်းၼႂ်းၸႄႈဝဵင်းလွႆလႅမ်၊ မိူင်းသူႈ၊ သီႇပေႃႉ မိူင်းၵိုင်   ထွႆထွၼ်ပွၵ်ႈမိူဝ်းယူႇၶိုၼ်းငဝ်ႈငုၼ်း သင်ဢမ်ႇထွႆ တေႁႅၼ်းသိုၵ်း လေႃႇ တိုၵ်းဝႃႈၼႆ။

ၾၢႆႇၼိုင်ႈ တႄႇဢဝ် ႁၢင်လိူၼ်မၢတ်ႊၶျ်မႃးတေႃႇထိုင်ယၢမ်းလဵဝ် ၶၢဝ်းတၢင်းဝူင်ႈပၢႆၼႆႉ  သိုၵ်းမၢၼ်ႈ ထႅမ်ႁႅင်းသိုၵ်း  မုင်ႈ ၸူး တၢင်းဝဵင်းလွၵ်ႉၸွၵ်ႇ၊ ၶိုၼ်ႈတူၼ်ႈတီးလူင်းမႃး တၢင်းပွတ်းသၼဵၼ်း ဝဵင်းပၢင်လူင် ၊ လွႆလႅမ် လူင်းၸူး ၼမ်ႉၸၢင်ဢမ်ႇထၢတ်ႇ။   

ၽူႈမီးၸၼ်ႉ SSPP ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ ပဵၼ်လွင်ႈတႄႉမၼ်းၶႃႈ သိုၵ်းမၢၼ်ႈ ၸႂ်ႉသိုၵ်းႁဝ်းၶႃႈ သုတ်ႉထွႆၶိုၼ်း ၼၼ်ႉ။  ၵူၺ်းၵႃႈ တႃႇႁဝ်းၶႃႈတေထွႆထွၼ်ၶိုၼ်းတႄႉ ဢမ်ႇမီးၶႃႈ။ သင်ဢမ်ႇထွႆၼႆ ၶဝ်တေဢဝ်ႁႅင်းသိုၵ်းလေႃႇတိုၵ်းႁဝ်း ၼႆၶႃႈ။ လွင်ႈဢဝ်ႁႅင်းသိုၵ်း သေ လေႃႇတိုၵ်းႁဝ်းၼႆႉ တေဢမ်ႇၸႂ်ႈသိုၵ်းမၢၼ်ႈ ၸုမ်းလဵဝ်ၵူၺ်း တေပႃးၸုမ်းပျီႇတူႉၸိတ်ႉၵႃလီႉ၊ မၢၵ်ႇၵႅင်း၊ S3 တူဝ်လႄႈ ပျီႇတူႉၸိတ်ႉပဢူဝ်း ၸိူဝ်းၼႆႉပႃးၼႆ ၵွၼ်ႇဢေႃႈ”- ဝႃႈၼႆ။

 ႁႂ်ႈ SSPP ထွႆႁႂ်ႈယဝ်ႉတူဝ်ႈဝၼ်းလႂ်ၼႆတႄႉ သိုၵ်းမၢၼ်ႈဢမ်ႇလၢတ်ႈပႃး၊ ဢၼ်ၸႂ်ႉထွႆထွၼ်ၼႆႉပဵၼ်ၸိူဝ်းတူင်ႉၼိုင်ၼႂ်းမိူင်းသူႈ၊ တၢင်ႉယၢၼ်း၊ မိူင်းယႆ ၸိူဝ်းၼႆႉ။ ပေႃးသိုၵ်း SSPP ထွႆပၼ် သိုၵ်းမၢၼ်ႈတေ မႃးယူႇတႅၼ်း ၊ ၵွပ်ႈၼႆ ယူႇၾၢႆႇ SSPP  တႄႉတိုၼ်းတေဢမ်ႇယွမ်းထွႆ ပၼ် – ၾၢႆႇ SSPP လၢတ်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ၸွမ်သိုၵ်းၸေႃႇမိၼ်းထုၼ်း ၽူႈၶၢၼ်ပၢၵ်ႇသိုၵ်းမၢၼ်ႈယိုတ်းမိူင်းလၢတ်ႈတီႈ VOA ဝႃႈ ၸႂ်ႉသိုၵ်း SSPP ထွႆၼႆႉပဵၼ်တႃႇလူတ်းယွၼ်ႇပၼ်ႁႃ ဝႃႈၼႆ။

“ဢၼ်ႁဝ်းႁွင်ႉဢုပ်ႇၵၼ်ၼႆႉၵေႃႈ ပိူင်လူင်ပဵၼ်လွင်ႈၼႆႉယဝ်ႉ။ သူၶဝ်ၵေႃႈယိၼ်းၶၢဝ်ႇမၼ်းယူႇၼႃႇ  ႁဝ်းၸႂ်ႉၶဝ်ထွႆ ။ ၶဝ်ဝႃႈၶဝ်တေဢမ်ႇထွႆ  ။ ဢၼ်ႁဝ်းၸႂ်ႉထွႆၼႆႉတႄႉ ပဵၼ်ယွၼ်ႉ ၼႂ်းမိူင်းတႆးပွတ်းၸၢၼ်း ၶဝ်ယိုဝ်းၵၼ်တင်း RCSS ၼႃႇ။ ၵမ်းၼႆႉ SSPP ၵေႃႈလူင်းမႃးယူႇၼႂ်းမိူင်းတႆးပွတ်းၸၢၼ်း။ မိူၼ်ၼင်ႇ RCSS ၵေႃႈၶိုၼ်ႈၵႂႃႇယူႇတၢင်းမိူင်းတႆး ပွတ်းႁွင်ႇ ၵေႃႈမီး။ ၵွပ်ႈၼႆ ႁႂ်ႈၼႃႈတီႈၵတ်းယဵၼ်ၼႆသေ ႁဝ်းၸင်ႇႁႂ်ႈၶဝ်ထွႆထွၼ်ၶိုၼ်းတီႈယူႇၽႂ်မၼ်းၼၼ်ႉၼႃႇ။ ပိူင်လူင်ႁဝ်း ၶႆႈလူတ်းယွၼ်ႇပၼ်ႁႃ ဢၼ်ဢမ်ႇတၢၼ်ႇလီပဵၼ်ၼၼ်ႉ ယႃႇႁႂ်ႈလႆႈပဵၼ်မႃးထႅင်ႈၼႆၼၼ်ႉၼႃႇ ”– ၸွမ်သိုၵ်း ၸေႃႇမိၼ်းထုၼ်း လၢတ်ႈၼင်ႇၼႆ။

သိုၵ်းမၢၼ်ႈလၢတ်ႈဝႃႈၼၼ်ယူႇသေတႃႉ မိူဝ်ႈၼႆႉဝၼ်းတီႈ 5/4/2022 ၼႆႉသိုၵ်းမၢၼ်ႈႁႅၼ်းၵူၼ်းသိုၵ်းလႄႈ ၶိူင်ႈၵွင်ႈၵၢင်ႇမႃးထိုင်ၼမ်ႉၸၢင် ၵႃးသိုၵ်းမွၵ်ႈ 3 လမ်းႁူဝ်ၵူၼ်းမွၵ်ႈ 50 ပၢႆ မႃးမီးတီႈတၢင်းၽႄႈဝၢၼ်ႈၼွင်ႁီး။ တေသိုပ်ႇၵႂႃႇတၢင်းလႂ်ထႅင်ႈၵေႃႈဢမ်ႇႁူႉ ၵူၼ်းၼမ်ႉၸၢင်ၵေႃႉၼိုင်ႈလၢတ်ႈ။

ၽူႈမီးၸၼ်ႉ SSPP သိုပ်ႇလၢတ်ႈထႅင်ႈဝႃႈ –  “ယၢမ်းလဵဝ် တီႈသၼဵၼ်း ဝဵင်းပၢင်လူင်ၼႆႉ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း ႁူမ်ႈၵၼ် ဢိူမ်ႈၸမ်ႁဝ်းဝႆႉ ဢဵၼ်ႁႅင်းၶဝ် တေမီးမွၵ်ႈ 300  ၼႆႉ။ ပၢင်တိုၵ်း  တေယႂ်ႇဢမ်ႇယႂ်ႇ ဢၼ်ဝႃႈၼၼ်ႉ မီးတီႈသိုၵ်းမၢၼ်ႈၵူၺ်း။ ႁဝ်းၵေႃႈ လၢတ်ႈဝႆႉယဝ်ႉ ယႃႇဢဝ်သၢႆသိုၵ်းသူ မႃးဢိူမ်ၸမ်သိုၵ်း ႁဝ်းႁႅင်း ။ ပေႃးဢိူမ်ႈၸမ်ႁႅင်းၵေႃႈ သဵင်ၵွင်ႈၼႆႉ မၼ်းတိုၼ်းၸၢင်ႈတႅၵ်ႇ ”- ၼင်ႇၼႆ။

ဢိင်ၼိူဝ် လွင်ႈၼႆႉ ယူႇတီႈၽူႈတွႆႇႁွၵ်ႈ ၶတ်းၸႂ်ၵပ်းၸူး ၽူႈၶၢၼ်ပၢၵ်ႇ SSPP လၢႆလၢႆၵမ်းၵေႃႈ ဢမ်ႇႁပ်ႉၾူၼ်းလႄႈဢမ်ႇၸၢင်ႈထၢမ်။

မိူဝ်ႈဝၼ်းတီႈ 31/3/2022 ပူၼ်ႉမႃးၼႆႉ SSPP သူင်ႇတူဝ်တႅၼ်းၵႂႃႇႁူပ်ႉထူပ်း NSPNC ၸုမ်းငမ်းယဵၼ်ၶွင် ၶွင်ႇသီႇသိုၵ်းမၢၼ်ႈ တီႈၼေႇပျီႇ တေႃႇ။ ၾၢႆႇ NSPNC ပဵၼ်ၸွမ်သိုၵ်းယႃႇပျေႉဢွၼ်ႁူဝ်၊ ၾၢႆႇ SSPP တႄႉပဵၼ် ၵႅမ်ႁူဝ်ပဝ်ႈ 2 ၸဝ်ႈၶုၼ်သႅင်၊ ၽူႈၼမ်းၼႂ်း 2 ၸဝ်ႈသု ၊ ၶွမ်ႊမ တီႊငဝ်ႈငုၼ်း ၸဝ်ႈၼေႃႇလဵၵ်း၊ ၸဝ်ႈတၢၼ်းဢွင်ႇ ၶဝ်ႁူပ်ႉထူပ်းၵၼ်။