ၼႂ်းၶၢဝ်းတၢင်း 4-5 လိူၼ်မႃးၼႆႉသိုၵ်းမၢၼ်ႈပႂ်ႉၸွမ်းတၢင်းၵူတ်ႇထတ်းၸဝ်ႈရူတ်ႉၸဝ်ႈၵႃး ၸိူဝ်းတၢင်ႇၶူဝ်းၶွင်ၵိၼ်ယမ်ႉဢၼ်တေၸွႆႈထႅမ်ၵူၼ်းပၢႆႈၽေးသိုၵ်း၊ ဢမ်ႇပၼ်ၵႂႃႇမႃးတေႃႇသူင်ႇလွတ်ႈလႅဝ်းယဝ်ႉလႄႈ ၵူၼ်းပၢႆႈၽေးသိုၵ်းတီႈမိူင်းၵူဝ်းမီး 800 ပၢႆၼၼ်ႉလူဝ်ႇတၢင်းၸွႆႈထႅမ်။
ၵူၼ်းပၢႆႈၽေးသိုၵ်း တႃႇ 7 ဝၢၼ်ႈ ႁူဝ်ၵူၼ်း 800 ပၢႆ ဢၼ်ပၢႆႈသွၼ်ႈဝႆႉယူႇ ၸွမ်းၵျွင်းၶရိတ်ႉယၢၼ်ႇလႄႈ ၵျွင်းမုၼ်ၸဝ်ႈ တီႈဝဵင်းမိူင်းၵူဝ်း ၸႄႈ တွၼ်ႈမူႇၸေႊ ၸိုင်ႈတႆး ပွတ်းႁွင်ႇ လႅၼ်လိၼ်တႆး – ၶႄႇ ဢွၼ် ၵၼ်ထူပ်းတၢင်းယၢပ်ႇၽိုတ်ႇ ၶဝ်ႈၼမ်ႉတၢင်းၵိၼ် မၢင်ဝၼ်း လႆႈၵိၼ် ၶဝ်ႈသွင်တႃႇၵူၺ်းၵေႃႈမီး ၼႆယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈမိူင်းၵူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေးသိုၵ်း တၢင်းမိူင်းၵူဝ်း ၼႆႉ ၶၢတ်ႇၶဝ်ႈၼမ်ႉတၢင်းၵိၼ်ႁၢဝ်ႈႁႅင်း ၶႂ်ႈဝႃႈ ၶၢတ်ႇၵူႈတီႈယဝ်ႉၶႃႈ။ မၢင်ဢွင်ႈတီႈ ၼိုင်ႈဝၼ်း လႂ် လႆႈၵိၼ်ၶဝ်ႈ သွင်တႃႇၼႆႉၵူၺ်း”- ဝႃႈၼႆ။
ယွၼ်ႉသိုၵ်းမၢၼ်ႈ တင်ႈၵဵၵ်ႉသေ ပႂ်ႉၵူတ်ႇထတ်း ၊ ပေႃးပဵၼ်ၶဝ်ႈၼမ်ႉတၢင်းၵိၼ်တႃႇၸွႆႈၵူၼ်းပၢႆႈၽေးသိုၵ်းၼႆ ယိင်ႈၶႅၼ်းထဵတ်ႈထၢမ် ၊ပိူင်လူင်ၶဝ်ၵူဝ်ၵူၼ်းမိူင်းၵႂႃႇၸွႆႈထႅမ် ၸုမ်းသိုၵ်းလုၵ်ႉၽိုၼ်ႉ၊ ႁဵတ်းႁႂ်ႈၸုမ်းပရႁိတ ၵႂႃႇမႃးၸွႆႈထႅမ်ယၢပ်ႇၽိုတ်ႇ လုၵ်ႈၸုမ်း ၸုမ်းပရႁိတ ၸိုင်ႈတႆးပွတ်းႁွင်ႇၸုမ်းၼိုင်ႈလၢတ်ႈၼင်ႇၼႆ။
မၼ်းၸၢႆး လၢတ်ႈတီႈၽူႈတွႆႇႁွၵ်ႈဝႃႈ – “ဝၼ်းတီႈ 26 ၼႆႉ ၸုမ်းႁဝ်းၶႃႈဢဝ်ၶူဝ်း ၸဝ်ႈတႃႇၼမႃး ဢၢၼ်း တေၵႂႃႇၸွႆႈ ၵူၼ်းပၢႆႈၽေးသိုၵ်းတီႈမိူင်းၵူဝ်း၊ ၺႃးသိုၵ်းမၢၼ်ႈ ၵူတ်ႇထတ်း ႁၢဝ်ႈႁႅင်း၊ ၽိူဝ်ႇႁူႉပဵၼ်ၶူဝ်းၸွႆႈၵူၼ်းပၢႆႈၽေးသိုၵ်း ၶဝ်ယိင်ႈၶႅၼ်းႁိုတ်းႁၢတ်ႇၸၢတ်ႇသႂ်ႇႁဝ်းၶႃႈ၊ မိူၼ်ၶဝ်ၶႂ်ႈလွၵ်ႇငိုတ်ႈႁဝ်း ႁႂ်ႈႁဝ်းၵူဝ်။ ၵူတ်ႇထတ်းၼႂ်းၵႃး ၵူႈလမ်း ၊ ပိုတ်ႇတူၺ်းၶူဝ်း ၵူႈဢၼ်။ ယဝ်ႉၵေႃႈဢမ်ႇၶိုၼ်းမတ်ႉၶိုၼ်းႁူမ်ႇပၼ် မူဝ်းၵႃႇၵႃးၶိုၼ်းလီလီ ”- ဝႃႈၼႆ။
ၵူၼ်းပၢႆႈၽေးသိုၵ်း တီႈမိူင်းၵူဝ်းၼႆႉ ၵမ်ႈၼမ် ပဵၼ်ၵူၼ်းႁဵတ်းၵိၼ်ၵၢၼ်သူၼ်ဢွႆႈ။ ပီၼႆႉတၢင်းၾင်ႇမိူင်းၶႄႇသမ်ႉ ဢမ်ႇႁပ်ႉသိုဝ်ႉဢွႆႈလႄႈ ႁဵတ်းႁႂ်ႈဢမ်ႇမီးငိုၼ်းၶဝ်ႈ၊ ၵိၼ်းၸႂ်တႃႇယူႇတႃႇၵိၼ်။ ၵမ်ႈၼမ် ပဵၼ်ပီႈၼွင်ႉၸၢဝ်းၶၢင်၊ တဢၢင်း ၸိူဝ်းၼႆႉ”- ဝႃႈၼႆ။
တႄႇဢဝ် ႁၢင်လိူၼ်ဢေႃႊၵတ်ႊသ် 2021 ပူၼ်ႉမႃး သိုၵ်းၶႄႇၵဝ်ႈၵၢင်ႉ MNDAA တင်း ၶွင်ႇသီႇသိုၵ်းမၢၼ်ႈ ယိုတ်းမိူင်း ပဵၼ်ပၢင်တိုၵ်း ၵၼ် ႁၢဝ်ႈႁႅင်း တၢင်းမိူင်းၵူဝ်း ။ ႁၢၼ်ႉတေႃႇထိုင်ယၢမ်းလဵဝ် တင်းသွင်ၾၢႆႇ တိုၵ်ႉ ၶဵင်ႈၶႅင်ၵၢၼ်သိုၵ်းၵၼ်သေ ယူႇယူႇယိုဝ်းၵၼ်ယူႇတိၵ်းတိၵ်း ။ ၵူၼ်းပၢႆႈၽေးသိုၵ်းမွၵ်ႈ 7 ဝၢၼ်ႈ သွၼ်ႈယူႇဝႆႉၸွမ်းၵျွင်းၶရိတ်ႉယၢၼ်ႇလႄႈ ဝတ်ႉမုၼ်ၸဝ်ႈ ၵေႃႈ ပႆႇၸၢင်ႈပွၵ်ႈၶိုၼ်းႁိူၼ်းယေး။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ