ဝဵင်းပၢင်သၢင်း ၸိုင်ႈတႆးပွတ်းဢွၵ်ႇ ၼၼ်ႉ မီးၵူၼ်းတိတ်းၸပ်းတၢင်းပဵၼ်ၶူဝ်ႊဝိတ်ႉ မႃးၶိုၼ်းၼႆသေ ၾၢႆႇၽွင်းငမ်းဝႃႉ ပိုၼ်ၽၢဝ်ႇတေ ပိၵ်ႉဢိုတ်း Lockdown ဝဵင်းတႃႇ 14 ဝၼ်း ဝႃႈၼႆ။
တႄႇဢဝ် ဝၼ်းတီႈ 25/3/2022 ယၢမ်းၵၢင်ၶိုၼ်း 10 မူင်း တေႃႇထိုင် ဝၼ်းတီႈ 8/4/2022 ယၢမ်းၵၢင်ၶိုၼ်း 10 မူင်း ႁၢမ်ႈၵူၼ်းမိူင်း ဝဵင်းပၢင်သၢင်း(ပၢင်ၶမ်း) ၼႃႈလိၼ်ၽွင်းငမ်းတူဝ်ၵဝ်ႇဝႃႉ (ဢၼ်သိုၵ်းမၢၼ်ႈမၵ်းမၼ်ႈဝႆႉ ၼႂ်းပိူင်ငဝ်ႈပိုင်းမိူင်း 2008 ) ဢွၵ်ႇၼွၵ်ႈပွၵ်ႉယွမ်ႇ ဝၢၼ်ႈ ဝဵင်း၊ တႃႇႁႂ်ႈတၢင်းပဵၼ်ၶူဝ်ႊဝိတ်ႉၼေဢမ်ႇၽႄႈလၢမ်းတိတ်းၸပ်းၸူးၵၼ် – ၾၢႆႇၵႅတ်ႇ ၶႄႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ပိုၼ်ၽၢဝ်ႇဢွၵ်ႇမႃးမိူဝ်ႈဝႃးဝၼ်းတီႈ 24/3/2022 ။
ၾၢႆႇပၢႆးယူႇလီ ဝဵင်းပၢင်သၢင်း တေၸီးတမ်ၶူႈၼင်ၵူတ်ႇထတ်းတၢင်းပဵၼ်ပၼ်ၵူၼ်းမိူင်းၵူႈၵေႃႉ ၼႂ်းဝၼ်းတီႈ 26-28/3/2022 ဝႃႈၼႆ။
ၵွပ်ႈၼႆလႄႈတႃႇၵၵ်းတူဝ်ယူႇၼႂ်းႁိူၼ်းယေးၽႂ်မၼ်းၼၼ်ႉ ႁႂ်ႈၵူႈၵေႃႉ ႁၢင်ႈႁႅၼ်းသိုဝ်ႉတၢင်းၵိၼ်ယမ်ႉဝႆႉ။ ၵူၼ်းၶၢႆၶူဝ်းၵုၼ်ႇၵိၼ်ယမ်ႉၵေႃႈတေဢမ်ႇလႆႈဢဝ်တိုဝ်ႉတၢင်းၼႆႉသေ ၶိုၼ်ႈၵႃႈၶၼ်ၵုၼ်ႇ ဝႃႈၼႆဝႆႉ။
သင်ဝႃႈ ၵူၼ်းမိူင်းလႄႈ သိုၵ်းႁၢၼ် ဢမ်ႇႁဵတ်းၸွမ်းၶေႃႈၸီႉသင်ႇၸိုင် တေဢဝ်လိူင်ႈ ပၼ်တူတ်ႈတၢမ်ႇၵႂႃႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ