ၼုမ်ႇၸၢႆး  ၸဝ်ႈၵႃး ဢၼ်လုၵ်ႉတၢင်း ဝဵင်းပၢင်သၢင်း ၼႃႈတီႈသိုၵ်းဝႃႉ  UWSA ၵုမ်းၵမ် တေႃႉၶႅၵ်ႇ ၵူၼ်းဢွၵ်ႇၶၢဝ်း တၢင်းၵႂႃႇတၢင်း ဝဵင်းလၢဝ်ႇၵၢႆး(ၵၢတ်ႇၵဝ်ႇ) ၼႃႈတီႈသိုၵ်းၵဝ်ႈၵၢင်ႉ (MNDAA) ၵုမ်းၵမ်ၼၼ်ႉ ႁၢႆလၢႆဝႆႉႁိုင်ၶၢဝ်းတၢင်း မွၵ်ႈၽၢၵ်ႇလိူၼ်ယဝ်ႉ ၸင်ႇထူပ်းႁၼ် တူဝ်တၢႆၶိုၼ်း ၼႆယဝ်ႉ။

ၼုမ်ႇၸၢႆးၵေႃႉၺႃးၶႃႈတၢႆၼႆႉ ပဵၼ်ၵူၼ်းၵိၼ်ၸၢင်ႈႁေႃႈၵႃး ၸိုဝ်ႈႁွင်ႉ ဢၢႆႈယီႇ ဢႃႇယု 25 ပီ မိူဝ်ႈလိူၼ်ဢႄႊပရႄႊ ဝၼ်းတီႈ 2 ၼၼ်ႉ မၼ်းၸၢႆး လုၵ်ႉတၢင်းဝဵင်းပၢင်သၢင်း မႃးသူင်ႇၶႅၵ်ႇတၢင်း ဝဵင်းလၢဝ်ႇၵၢႆးသေ ၵိုင်ႉၵၢင်ႉတိတ်းတေႃႇဢမ်ႇလႆႈပႅတ်ႈၼႆ ၵူၼ်းၼႂ်းမုင်ႉႁေႃႁိူၼ်းမၼ်းၸၢႆး လၢတ်ႈၼႄၼင်ႇၼႆ။

“ထူပ်းႁၼ်တူဝ်တၢႆမၼ်းၸၢႆး တီႈတၢင်းငွၵ်း ၵႄႈၵၢင်သဵၼ်ႈတၢင်းၵႂႃႇ ဝဵင်းၼမ်ႉၽႃႈ (ၶျိၼ်ႊသူၺ်ႇႁေႃႊ) လႄႈ ဝဵင်းလၢဝ်ႇၵၢႆးၼၼ်ႉ။ မိူဝ်ႈမၼ်းလုၵ်ႉတၢင်း ပၢင်သၢင်းၵႂႃႇၼႆႉ မၼ်းတၢင်ႇၵူၼ်းၵႂႃႇၸွမ်း 2 ၵေႃႉ။ ၺႃးၵူၼ်းသွင်ၵေႃႉၼၼ်ႉႁႅမ်မၼ်းတၢႆၸွမ်းတၢင်း။ တေႃႇထိုင်မိူဝ်ႈလဵဝ်ၵေႃႈ ဢမ်ႇတီႉၺွပ်းလႆႈၵူၼ်းဢၼ်ၶႃႈမၼ်းတၢႆ။”

မုင်ႉႁေႃႁိူၼ်း ၼုမ်ႇၸၢႆးၵေႃႉၺႃးၶႃႈတၢႆၼႆႉ ယူႇသဝ်းဝႆႉတီႈၸႄႈဝဵင်းလႃႈသဵဝ်ႈသေ လႆႈဢဝ်လိူင်ႈၼႆႉ တိူင်ႇလၢတ်ႈဝႆႉတီႈၸုမ်းပလိၵ်ႈ သိုၵ်းၵဝ်ႈၵၢင်ႉသေတႃႉ ႁၢၼ်ႉတေႃႇထိုင်ယၢမ်းလဵဝ် (လိူၼ်သႅပ်ႊထႅမ်ႊပိူဝ်ႊ) ၼႆႉၵေႃႈ ဢမ်ႇပႆႇတီႉၺွပ်းပၼ်လႆႈ ၵူၼ်းၵေႃႉၶႃႈႁႅမ် ၵူၼ်းတၢႆၼၼ်ႉ ၼႆယဝ်ႉ။

မိူၼ်ၼႆ မိူဝ်ႈႁူဝ်လိူၼ်သႅပ်ႊထႅမ်ႊပိူဝ်ႊၼႆႉၵေႃႈ ၼုမ်ႇၸၢႆး ၸိုဝ်ႈႁွင်ႉ ၶိူဝ်းလႅင်း ဢႃႇယု 24 ပီ ပဵၼ်ၵူၼ်းၵိၼ်ၸၢင်ႈႁေႃႈၵႃးၵေႃႉၼိုင်ႈ ဢၼ်လုၵ်ႉတၢင်း ဝဵင်းၵုၼ်လူင် ၵႂႃႇတၢင်း ဝဵင်းလႃႈသဵဝ်ႈ ႁၢႆဝႆႉ ႁၢၼ်ႉတေႃႇထိုင်ဝၼ်းမိူဝ်ႈၼႆႉ (5/9/2025) ၵေႃႈ ပႆႇထူပ်းႁၼ်တူဝ် ဢမ်ႇလႆႈႁူႉၶၢဝ်ႇငၢဝ်းသင်ၸွမ်း ၼႆယဝ်ႉ။

ဝၢႆးလင်ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ၽွင်းၸုမ်းယိပ်းၵွင်ႈၵၢင်ႇၸၢဝ်းၶိူဝ်းသၢမ်ၸုမ်း ၵုမ်းၵမ်ဝဵင်းဝႆႉၼႆႉ ၵႆႉၵႆႉၵိူတ်ႇလိူင်ႈ ၼုမ်ႇၸၢႆး၊ ၼုမ်ႇယိင်း ၼႂ်းပိုၼ်ႉတီႈႁၢႆ ဢမ်ႇၸၢင်ႈၵပ်းသိုပ်ႇတိတ်းတေႃႇၵၼ် ၼႆယဝ်ႉ။

တႅမ်ႈ- ၽူၺ်းၼုမ်ႇ