ၵူၼ်းပၢႆႈၽေးသိုၵ်း တီႈဢိူင်ႇၵဵင်းၶမ်း ၸႄႈဝဵင်းလွၵ်ႉၸွၵ်ႇ ႁူဝ်ၵူၼ်း 30 ပၢႆ လူဝ်ႇတၢင်းယၢပ်ႇၽိုတ်ႇ လွင်ႈၶဝ်ႈၼမ်ႉတၢင်းၵိၼ် ႁၢဝ်ႈႁႅင်း။
ၵူၼ်းပၢႆႈၽေးသိုၵ်းဝဵင်းၵျွၵ်ႉမႄး ဢၼ်ပၢႆႈမႃးသွၼ်ႈဝႆႉ တီႈဝတ်ႉမၢၵ်ႇမိုဝ်း ဝၢၼ်ႈၵဵင်းၶမ်း ဢိူင်ႇၵဵင်းၶမ်း ၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း ႁူဝ်ၵူၼ်း 30 ပၢႆ လင်ႁိူၼ်း 9 လင်ၼၼ်ႉ ယၢမ်းလဵဝ် ဢွၼ်ၵၼ်ထူပ်းတၢင်းယၢပ်ႇၽိုတ်ႇ ၶဝ်ႈၼမ်ႉတၢင်းၵိၼ် လႄႈ တႃႇၵေႃႇသၢင်ႈ ႁိူၼ်းယေးတီႈယူႇ ၊ ဢွင်ႈတီႈတႃႇၽုၵ်ႇသွမ်ႈႁႃၵိၼ်လဵင်ႉတွင်ႉ ၸိူဝ်းၼႆႉ။
ၸၢႆးဢွင်ႇမိၼ်ႉဢူးၵူၼ်းၼုမ်ႇ ပႃႇတီႇႁူဝ်သိူဝ်/ ငဝ်ႈငုၼ်းတီႇမူဝ်ႇၶရေႇၸီႇၸိူဝ်ႉၶိူဝ်းတႆး SNLD လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပၢႆႈၽေးသိုၵ်း ဢၼ်မီးဝႆႉတီႈဝတ်ႉမၢၵ်ႇမိုဝ်းၼၼ်ႉ ယၢမ်းလဵဝ် လူဝ်ႇတၢင်းၸွႆႈထႅမ် ၶဝ်ႈၼမ်ႉတၢင်းၵိၼ်တင်းၼမ်။ ယွၼ်ႉဝႃႈ ဢွင်ႈတီႈၼၼ်ႉ ၵႆဝဵင်းႁႅင်းၼႃႇ ၵႆမွၵ်ႈ 18 လၵ်း၊ သဵၼ်ႈတၢင်းၵႂႃႇယၢပ်ႇ။ လွင်ႈၵႂႃႇမႃး ဢမ်ႇပေႃးမီးလွင်ႈႁူမ်ႇလူမ်ႈလႄႈ ဢမ်ႇပေႃးမီးၽႂ်ႁတ်းၵႂႃႇၸွႆႈထႅမ်ထိုင်တီႈ။ ၵွပ်ႈၼႆ ၵူၼ်းပၢႆႈၽေး ႁဝ်းၶႃႈ ဢွၼ်ၵၼ်ထူပ်းတၢင်းယၢပ်ႇၽိုတ်ႇၵိၼ်းၸႂ်ၵၼ်ႁႅင်း။ ယူႇတီႈႁဝ်းၶႃႈသေ လႆႈၵႂႃႇၸွႆႈထႅမ်မႃး မီး 2 ပွၵ်ႈပႃးၼႆႉၶႃႈ”- ဝႃႈ ၼႆ။
ၵူၼ်းပၢႆႈၽေးသိုၵ်း ဢၼ်မီးဝႆႉတီႈဝတ်ႉမၢၵ်ႇမိုဝ်းၼၼ်ႉ ၵမ်ႈၼမ် လုၵ်ႈဢွၼ်ႇ၊ ၼၢင်းယိင်းလႄႈ ၵူၼ်းထဝ်ႈ ၸိူဝ်းၼႆႉ။ မိူဝ်ႈၼႂ်းလိူၼ် ၾႅပ်ႊပိဝ်ႊရီႊပူၼ်ႉမႃး RCSS လႄႈ SSPP ပိုတ်းယိုဝ်းၵၼ်ၼႂ်းၸႄႈဝဵင်းလွၵ်ႉၸွၵ်ႇႁၢဝ်ႈႁႅင်း၊ ၵူၼ်းဝၢၼ်ႈပၢႆႈၽေးသိုၵ်း လူင်းမႃးယူႇတၢင်းဢိူင်ႇၵဵင်းၶမ်း 500 ပၢႆ ၊ ပၢင်တိုၵ်းၸွမ်းသိုပ်ႇပဵၼ်လႄႈ ၸိူဝ်းၶဝ်လႆႈသိုပ်ႇပၢႆႈမႃးတၢင်းဝဵင်းႁူဝ်ပူင်း၊ လိုၼ်းသုတ်း ပၢႆႈထိုင်ဝဵင်းတူၼ်ႈတီး ။
ၼႂ်းၵူၼ်း 500 ပၢႆၼၼ်ႉ မီးၵူၼ်း 30 ပၢႆ တႃႇလင်ႁိူၼ်း 9 လင် ဢမ်ႇသိုပ်ႇပၢႆႈၵႂႃႇၸွမ်းၸုမ်းထိုင်တူၼ်ႈတီးသေ သိုပ်ႇယူႇဝႆႉတီႈ ဢိူင်ႇၵဵင်းၶမ်း တေႃႇထိုင်ယၢမ်းလဵဝ် ။
“ၵူၼ်းပၢႆႈၽေးဝႃႈ ၶဝ်ၶၢၼ်ႉသိုပ်ႇပၢႆႈထႅင်ႈယဝ်ႉလႄႈ ၶိုၼ်းယူႇဝႆႉတီႈဝတ်ႉၵဵင်းၶမ်းၼႆႉဢေႃႈ။ တွၼ်ႈတႃႇၶဝ်တေၵႂႃႇတႅပ်းမႆႉမႃးႁဵတ်းသုမ်ႉသွင်းႁိူၼ်းယေးၵေႃႈပႆႇငၢႆႈၶႃႈ ၊ ပၢင်တိုၵ်းပႆႇၶႂ်ႈယဵၼ်လီဢေႃႈ။ ၵမ်ႈၼမ် သမ်ႉပဵၼ်ၼၢင်းယိင်း၊ လုၵ်ႈဢွၼ်ႇလႄႈ ၵူၼ်းထဝ်ႈ ၶႃႈၼေႈ။ ၵူၼ်းၼုမ်ႇ ၽူႈၸၢႆး ဢမ်ႇပေႃးမီး ၶႃႈ။ ၼမ်ႉၵိၼ်ၼမ်ႉၸႂ်ႉၵေႃႈယၢပ်ႇၽိုတ်ႇၶႃႈဢေႃႈ။ တႃႇသိုပ်ႇယူႇၵႂႃႇမိူဝ်းၼႃႈသမ်ႉ လူဝ်ႇႁဵတ်းလွင်ႈၽုၵ်ႇသွမ်ႈႁႃၵိၼ် ဢေႃႈ။ လွင်ႈၼႆႉၵေႃႈ လူဝ်ႇတၢင်းၸွႆႈထႅမ်ၶိူင်ႈမႆႉၶိူင်ႈမိုဝ်းၶႃႈဢေႃႈ ”- ၸၢႆးဢွင်ႇမိၼ်ႉဢူး သိုပ်ႇလၢတ်ႈၼႄၼင်ႇၼႆ။
ၵွပ်ႈၼႆလႄႈ ၸုမ်းၵူၼ်းၼုမ်ႇ ၸုမ်းၸွႆႈထႅမ် တိုၵ်းသူၼ်းထိုင် ၽူႈမီးၼမ်ႉၸႂ်ၸေႇတၼႃႇ တီႈၸမ်ၵႆ ႁႂ်ႈႁူမ်ႈမိုဝ်း ၸွႆႈထႅမ် ၵူၼ်းပၢႆႈၽေးသိုၵ်း တၢင်းလွၵ်ႉၸွၵ်ႇ ၵဵင်းၶမ်းၼႆႉၽွင်ႈ၊ ၼင်ႇႁိုဝ် ၸိူဝ်းၶဝ်ပေႃးတေလႆႈမီးတၢင်းၵိၼ်ယႅမ်ႉလႄႈ ယူႇသဝ်းၵႂႃႇလႆႈၶၢဝ်းယၢဝ်း ၸၢႆးဢွင်ႈမိၼ်ႉဢူးလၢတ်ႈ။
