ၶၢဝ်းမႆႈၵူႈပီပူၼ်ႉမႃး တီႈဝဵင်းပၢင်လွင်း ၸိုင်ႈတႆးပွတ်းၸၢၼ်းယၢပ်ႇၽိုတ်ႇၼမ်ႉၵိၼ်ၼမ်ႉၸႂ်ႉလိူဝ်ႁႅင်း ပီၼႆႉသမ်ႉ မီးၵူၼ်းမိူင်းယၢင်းလႅင် ပၢႆႈၽေးသိုၵ်းမႃးသွၼ်ႈယူႇၸွမ်းထႅင်ႈ 4 ႁဵင်ပၢႆလႄႈ ၸဝ်ႈႁိူၼ်းပႃးၸဵမ်ၸဝ်ႈၶႅၵ်ႇ ဢွၼ်ၵၼ်ယၢပ်ႇၽိုတ်ႇလွင်ႈၼမ်ႉၵိၼ်ၼမ်ႉၸႂ်ႉ၊ ထိုင်တီႈလႆႈသိုဝ်ႉဢဝ်။
ၼၢင်းယိင်း ၵူၼ်းယူႇၼႃႈတၢင်းၸၢၼ်းဝဵင်းပၢင်လွင်းၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ ယၢပ်ႇၽိုတ်ႇႁႅင်းၶႃႈ လွင်ႈၼမ်ႉၵိၼ်/ ၸႂ်ႉၼႆႉ။ ၸိူဝ်းယူႇ တၢင်းၾၢႆႇၸၢၼ်းဝဵင်းၼႆႉ။ ဢမ်ႇမီးၼမ်ႉႁွင်ႈလႆ၊ ၼမ်ႉမေႃႇၵေႃႈဢမ်ႇမီး၊ လႆႈ တေႃႇလွတ်ႇသေဢဝ် ၼမ်ႉႁူၺ်ႈ/ လွႆ မႃးၸႂ်ႉၵူၺ်း။ ၵမ်းၼႆႉ ၼမ်ႉႁူၺ်ႈ/ လွႆ သမ်ႉႁႅင်ႈ။ ၵူႈပီၵေႃႈၼမ်ႉယၢပ်ႇယူႇယဝ်ႉ တီႈပၢင်လွင်းၼႆႉ။ ပီၼႆႉသမ်ႉယိင်ႈၶႅၼ်းၵိၼ်း လိူဝ်ႁႅင်းဢေႃႈ ”- ဝႃႈၼႆ။
ဝၢၼ်ႈဢၼ်ယၢပ်ႇၽိုတ်ႇၼမ်ႉၵိၼ်ၼမ်ႉၸႂ်ႉ ဢၼ်မီး ၾၢႆႇၸၢၼ်းဝဵင်းပၢင်လွင်းၸိူဝ်းၼၼ်ႉပဵၼ် ဝၢၼ်ႈပၢင်ၵႅင်၊ ပႃႇၵႃႉ၊ ၵုင်းတုၼ်ႇ၊ ၼမ်ႉၽိူၵ်ႇ ၸိူဝ်းၼႆႉ။
“ယၢမ်းလဵဝ် ၵူၼ်းပိုၼ်ႉတီႈၵူၺ်းဢမ်ႇၵႃး ၵူၼ်းပၢႆႈၽေးၵေႃႈ ယၢပ်ႇၽိုတ်ႇပႃးၶႃႈ။ ယွၼ်ႉဝႃႈ တီႈပၢင်လွင်းၼႆႉ မီးၵူၼ်း ပၢႆႈၽေးမႃးယူႇ မႃးသွၼ်ႈဝႆႉ ၶႂ်ႈဝႃႈမီးၵူႈႁိူၼ်းဢေႃႈၼႆႉ ။ ၼမ်ႉႁႅင်ႈလႄႈ မၢင်ႁိူၼ်း ပေႃးလႆႈသိုဝ်ႉၸႂ်ႉဢဝ်ဢေႃႈ။ ပေႃးပဵၼ်ၼႆၵႂႃႇၶၢဝ်းႁိုင်တႄႉ တေပႃးၵၼ်ယၢပ်ႇၽိုတ်ႇတႄႉယဝ်ႉဢေႃႈ။ ယၢမ်းလဵဝ် ၵႃႈၼမ်ႉၵိၼ်/ ၸႂ်ႉ ၵႃးၼိုင်ႈလမ်း လႆႈပၼ် 25,000 ပျႃး။ ယွၼ်ႉၼမ်ႉမၼ်းရူတ်ႉၶိုၼ်ႈသေ ၵႃႈၼမ်ႉၵေႃႈၶိုၼ်ႈၼႆဢေႃႈ”- ၵူၼ်း ပိုၼ်ႉတီႈ ပၢင်လွင်း သိုပ်ႇလၢတ်ႈၼႄၼင်ႇၼႆ။
မိူဝ်ႈၵူႈပွၵ်ႈ ၼႂ်းၸႄႈဝဵင်းပၢင်လွင်း ၵႃးတၢင်ႇၼမ်ႉ 1 လမ်း(12 ပီႇပႃႇ) လႆႈပၼ် 15,000 ပျႃး။ ယၢမ်းလဵဝ် လႆႈပၼ် 25,000 ပျႃး။ ၼမ်ႉၵိၼ်သမ်ႉ ၼမ်ႉသႅၼ်ႈသႂ် (1 ဢုမ်) မိူဝ်ႈၵူႈပွၵ်ႈ 500 ပျႃး ယၢမ်းလဵဝ် ၶိုၼ်ႈပဵၼ် 800 ပျႃးယဝ်ႉ ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း တီႈဝဵင်းပၢင်လွင်း လၢတ်ႈတီႈၽူႈတွႆႇႁွၵ်ႈဝႃႈ – “ၵူႈပွၵ်ႈတႄႉ တႃႇၵူၼ်းပၢႆႈၽေးၼႆ မီးၸဝ်ႈ တႃႇၼ ၶဝ် မႃးၸွႆႈ လွင်ႈၵိၼ်ယႅမ်ႉ ၼမ်ႉသႅၼ်ႈသႂ် ၸိူဝ်းၼႆႉ။ ဝၢႆးလင်ၼႆႉမႃး ဢမ်ႇမီးယဝ်ႉ။ တႃႇႁႃၵိၼ်လဵင်ႉတွင်ႉ ၽႂ်မၼ်း ၵေႃႈယၢပ်ႇ၊ တႃႇၵႂႃႇမႃးႁႃၵၼ်ၵေႃႈ ဢမ်ႇလွတ်ႈလႅဝ်း ဢမ်ႇငၢႆႈၵႅမ်ႈမိူၼ်ၵူႈပွၵ်ႈယဝ်ႉၶႃႈလူး။ ၵူၼ်းပၢႆႈၽေးတႄႉ ပိူၼ်ႈလုၵ်ႉတီႈမႆႈ မႃးယူႇတီႈၵတ်းလႄႈ ၵႃႈလႆႈတူၺ်းထိုင်ၵၼ်ဢေႃႈ။ ၶဝ်ၵေႃႈ ဢမ်ႇယူႇလၢႆပႂ်ႉၵိၼ်ၶူဝ်းၸွႆႈၵွၺ်း ။ ၵမ်ႈၽွင်ႈ ၵႂႃႇၵိၼ်ၸၢင်ႈ ၸွမ်းဝၼ်း ပေႃးပဵၼ်ၽူႈၸၢႆး ႁဵတ်းၵေႃႇ သၢင်ႈ၊ ၽူႈယိင်း ႁဵတ်းသူၼ်ၸိူဝ်းၼႆႉဢေႃႈ။ ၵူၼ်းပိုၼ်ႉတီႈၵေႃႈ ၵႃႈလႆႈၸွႆႈၶဝ်ၶႃႈဢေႃႈ ”- ဝႃႈၼႆ။
သိုၵ်းမၢၼ်ႈႁႅၼ်းသိုၵ်းလေႃႇတိုၵ်းသိုၵ်းၵႅတ်ႇၶႄၵူၼ်းမိူင်း PDF ႁၢဝ်ႈႁႅင်းလႄႈ ႁူဝ်လိူၼ်မၢတ်ႉၶျ်ၼႆႉ ၵူၼ်းမိူင်းလွႆၶေႃ မိူင်းပၢႆး ၾၢႆၶုၼ် တီႊမူဝ်ႊသူဝ်ႊ ပၢႆႈၽေးသိုၵ်း မႃးသွၼ်ႈယူႇသဝ်းဝႆႉတီႈၸႄႈဝဵင်းပၢင်လွင်းၼႆႉ တင်းမူတ်းမီး 4 ႁဵင်ပၢႆ ။ ၵမ်ႈၼမ် ယူႇၸွမ်း ႁိူၼ်းယေး ပီႈၼွင်ႉၽႂ်မၼ်း။ ၼႂ်းဝူင်ႈဝၢင်ႈၼႆႉ ၵူၼ်းမိူင်းပွတ်းလွႆၶေႃပွၵ်ႈမိူဝ်းၶိုၼ်းၵေႃႈမီး ယူႇဢိတ်းဢွတ်း၊ ၵူၺ်းၵႃႈဢၼ်ပၢႆႈမႃးမႂ်ႇ မီးၼမ်ၶႂ်ႈဝႃႈၵူႈဝၼ်း။ ပဵၼ်ၵူၼ်းမိူင်းတၢင်း ၸႄႈဝဵင်း တီႊမူဝ်ႊသူဝ်ႊ ၊ ၼမ်ႉမႄႈၶုၼ်ႇ၊ လွႆၸၢင်ႉ၊ မိူင်းပၢႆး ၸိူဝ်းၼႆႉ။
