မိူဝ်ႈၼႆႉ ဝၼ်းတီႈ 10/3/2022 Mr. Sasakawa ၽူႈတၢင်တူဝ်မိူင်းၵျပၼ်ႊ ၵဵဝ်ႇၵပ်းမိူင်းမၢၼ်ႈ လႄႈ ႁူဝ်ပဝ်ႈ ၼီႊပုၼ်ႊၾွင်ႊတေႊသျိၼ်ႊ ႁွတ်ႈထိုင်ဝဵင်းၵဵင်းမႆႇ မိူင်းထႆး သေ
ႁူပ်ႉထူပ်း ၽူႈယႂ်ႇၵူၼ်းလူင် ၼႂ်းၸုမ်း RCSS/SSA လႄႈ ၸုမ်းယိပ်းၵွင်ႈၵၢင်ႇၸိူဝ်းပၵ်းလႅၼ်လိၼ်ထႆး။
ဢၼ်ႁူပ်ႉ မိတ်ႉသတိူဝ်ႊသႃႊသႃႊၵႃႊဝႃႊၼၼ်ႉတႄႉ ၸွမ်သိုၵ်းလူင် မူႇတူးသေးၽူဝ်း ႁူဝ်ပဝ်ႈလူင် ၸုမ်းသိုၵ်းယၢင်းၽိူၵ်ႇ KNU/KNLA ၊ ၶူႇဢူးရႄႇ ႁူဝ်ပဝ်ႈ တပ်ႉသိုၵ်းယၢင်းလႅင် KNPP/KA တင်းၽူႈယႂ်ႇၵူၼ်းလူင် ၼႂ်းၶွင်ႇသီႇဢဝ်ၶိုၼ်း ၸိုင်ႈတႆးတပ်ႉသိုၵ်းၸိုင်ႈ RCSS/SSA။ ၽူႈမီးပုၼ်ႈၽွၼ်း တူဝ်တႅၼ်း ၸုမ်းလူင်းလၢႆးမိုဝ်း NCAs ၵေႃႈ မၼ်းၸၢႆး ႁပ်ႉႁူပ်ႉႁင်းၶေႃၶေႃ။
ၵဵဝ်ႇၵပ်းလွင်ႈၼႆႉသေ ၽူႈမီးပုၼ်ႈၽွၼ်း ၼႂ်းၸုမ်းယၢင်းၽိူၵ်ႇ KNU/KNLA လၢတ်ႈဝႃႈ လႆႈဢုပ်ႇလွင်ႈပၼ်ႁႃ ၊ ဢမ်ႇလႆႈႁူပ်ႉဢုပ်ႇၵၼ်လွင်ႈၵၢၼ်မိူင်း၊ ဢၼ်ဢုပ်ႇၵၼ်တႄႉ ပဵၼ်လွင်ႈ ၵၢၼ်ပူၵ်းပွင်ၼႂ်းပိုၼ်ႉတီႈၵူၺ်းဝႃႈၼႆ။
Mr. Sasakawa ၽူႈတၢင်တူဝ် မိူင်းၵျပၼ်ႊ ၵဵဝ်ႇၵပ်းမိူင်းမၢၼ်ႈ လႄႈ ႁူဝ်ပဝ်ႈ ၼီႊပုၼ်ႊၾွင်ႊတေႊသျိၼ်ႊ ၼႆႉ မိူဝ်ႈဝၼ်းတီႈ 5/3/2022 ၼၼ်ႉၵေႃႈ ႁူပ်ႉဢုပ်ႇ ၸိၵ်းၸွမ်သိုၵ်းမၢၼ်ႈ ၸုမ်းယိုတ်းဢႃႇၼႃႇၸွမ်သိုၵ်းလူင်မိၼ်းဢွင်ႇလၢႆႇ တၢင်း ဢွၼ်ႊလၢႆႊ။ ၵွပ်ႈၼၼ် ၽူႈလဵပ်ႈႁဵၼ်း ၵၢၼ်မိူင်းၶဝ် လၢတ်ႈဝႃႈ မၼ်းၸၢႆး ၸၢင်ႈတေႃႉ ၵႂၢမ်းၾၢၵ်ႇ ၸွမ်သိုၵ်းလူင် မိၼ်းဢွင်ႇလၢႆႇ မႃးလၢတ်ႈဢုပ်ႇ တင်း ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း ၸိူဝ်းၼႆႉဝႃႈၼႆ။
Mr. Sasakawa ၽူႈတၢင်မိူင်းၵျပၼ်ႊ ၵဵဝ်ႇၵပ်းမိူင်းမၢၼ်ႈ လႄႈ ႁူဝ်ပဝ်ႈ ၼီႊပုၼ်ႊၾွင်ႊတေႊသျိၼ်ႊၼႆႉ ၸွႆႈထႅမ် ၵၢၼ်ငမ်းယဵၼ်မိူင်းမၢၼ်ႈ – မိူၼ်ၼင်ႇ ၸွႆႈႁႂ်ႈ ၸုမ်းသိုၵ်းရၶႅင်ႇ တင်း သိုၵ်းမၢၼ်ႈ ၵိုတ်းတိုၵ်းၵၼ်၊ၸွႆႈထႅမ်ၵၢၼ် ငမ်းယဵၼ် NCA ၸိူဝ်းၼႆႉဢမ်ႇၵႃး ၸွႆႈထႅမ်ပႃး ၵၢၼ်ပူၵ်းပွင်၊ ၸွႆႈထႅမ် ၵၢၼ်သၢင်ႈႁူင်းႁဵၼ်း ႁူင်းယႃ ဝၢၼ်ႈၼွၵ်ႈ ၼႃးပၢင်ႇ။ ၼႂ်းမိူင်းတႆးၵေႃႈ ဢၼ်မႃးၸွႆႈထႅမ် ပၼ်မီးလၢႆလၢႆလင်။
