ၵူၼ်း ဢၼ်ၶဝ်ႈၸူၼ်ၼႂ်းပၢၼ်ႇ/ ယေးငိုၼ်း KBZ တီႈဝဵင်းသီႇပေႃႉ ၺႃးတီႉၺွပ်းလႆႈတူဝ် တင်းမူတ်း 6 ၵေႃႉ လႆႈၶိုၼ်းငိုၼ်း 1,100 သႅၼ်ပျႃးပၢႆ။
မိူဝ်ႈဝႃး ဝၼ်းတီႈ 6/3/2022 ယၢမ်းၵၢင်ၼႂ် မွၵ်ႈ 7 မူင်းပၢႆ ပလိၵ်ႈ ၸွမ်းသွၵ်ႈတီႉလႆႈ ၵူၼ်း 6 ၵေႃႉ တီႈဝဵင်းလိူဝ်ႇ/ မၼ်းတလေးသေပိုၼ်ၽၢဝ်ႇဝႃႈပဵၼ်ၵူၼ်း ဢၼ်ၶဝ်ႈၸူၼ် ဢဝ်ငိုၼ်းတီႈပၢၼ်ႇ/ ယေးငိုၼ်း ၵမ်ႇပေႃးၸ KBZ တီႈဝဵင်းသီႇပေႃႉ ၸိုင်ႈတႆးပွတ်းႁွင်ႇ မိူဝ်ႈ ဝၼ်းတီႈ 28 ပူၼ်ႉမႃးၼၼ်ႉဝႃႈၼႆ။
ၵူၼ်း သီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ ပလိၵ်ႈ တီႉလႆႈတင်းမူတ်း 6 ၵေႃႉ။ တီႉလႆႈမိူဝ်ႈဝႃး ယၢမ်းၵၢင်ၼႂ် 7 မူင်းပၢႆသေ မွၵ်ႇ ႁူဝ်ၶမ်ႈၼႆႉ သူင်ႇတူဝ်မႃးႁွတ်ႈထိုင်တီႈၵျွၵ်ႉမႄး တင်းမူတ်း။ မိူဝ်ႈၼႆႉ သူင်ႇတူဝ်မႃးတီႈသီႇပေႃႉ မႃးပိုတ်ႇလိူင်ႈ ၸွႆးတြႃးၶဝ်ၶႃႈဢေႃႈ။ ယေး ဝႃႈ ၶဝ် 3 ၵေႃႉ ၵႂႃႇၼွၼ်းတီႈႁူင်းႁႅမ်းၵျွၵ်ႉမႄးၼၼ်ႉသေ လႆႈမၢႆၾၢင်၊ ႁူႉၸိုဝ်ႈၶဝ် ယဝ်ႉၵေႃႈ လႆႈဢဝ်ဝႆႉ ၶႅပ်းႁၢင်ႈၼႃႈၶဝ် တီႈၼႂ်းၵွင်ႈ CCTV ၼၼ်ႉသေ ၸွမ်းၶႆႈငိူၼ်ႈၶဝ် ႁၢၼ်ႉတေႃႇပေႃးတီႉလႆႈ တီႈမၼ်းတလေးၼၼ်ႉ တင်းမူတ်း 6 ၵေႃႉၶႃႈ ၸုမ်း ၶဝ်ၼၼ်ႉ”- ဝႃႈၼႆ။
ၵူၼ်းၸူၼ် 6 ၵေႃႉၼၼ်ႉ ပဵၼ်ၽူႈၸၢႆး 4 ၵေႃႉ၊ ၼၢင်းယိင်း 2 ၵေႃႉ။ ၼႂ်းၶဝ် 6 ၵေႃႉၼၼ်ႉ ပဵၼ်ၵူၼ်းၼွင်ၶဵဝ် 3 ၵေႃႉ၊ ၵူၼ်းၼမ်ႉသၼ်ႇ 1 ၵေႃႉ၊ ၵူၼ်းမၼ်းတလေး/ ဝဵင်းလိူဝ်ႇ 1 ၵေႃႉလႄႈ ၵူၼ်းတၼ်ႉသႄ 1 ၵေႃႉ(ၵူၼ်းမိူင်းမၢၼ်ႈလိၼ်ထုင်ႉပဵင်း) ၸိူဝ်းၼႆႉ။
ပူၼ်ႉမႃး မိူဝ်ႈဝၼ်းတီႈ 28/2/2022 ဝၢႆးဝၼ်းမွၵ်ႈ 3 မူင်းပၢႆ မီးၵူၼ်း 3 ၵေႃႉ ၶဝ်ႈၸူၼ် ၼႂ်းယေးငိုၼ်း/ ပၢၼ်ႇၵမ်ႇပေႃးၸ KBZ တီႈပွၵ်ႉၸၢင်ႈ ၶမ်း ဝဵင်းသီႇပေႃႉ ၸိုင်ႈတႆးပွတ်းႁွင်ႇ လႆႈငိုၼ်းၵႂႃႇ တင်းမူတ်း 1,900 သႅၼ်ပၢႆ။
ၽူႈတူင်ႉၼိုင် ၼႂ်းတူင်ႇဝူင်းၵူၼ်း ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းၼၼ်ႉ ၵူၼ်းၸူၼ်ၼႆႉ လႆႈၵႂႃႇငိုၼ်း 1,900 သႅၼ်ပျႃး ပၢႆ။ ထိုင်တီႉၺွပ်းလႆႈတူဝ်ၶဝ်မႃးသေ လႆႈၶိုၼ်းငိုၼ်း 1,100 သႅၼ်ပၢႆၼႆၶႃႈဢေႃႈ”- ဝႃႈၼႆ။
ၵူၼ်းၸူၼ် 6 ၵေႃႉ ဢၼ်တီႉၺွပ်းၵုမ်းတူဝ်လႆႈမႃးၼႆႉ ယူႇတီႈၽူႈမီးပုၼ်ႈၽွၼ်း ၼႂ်းၸႄႈဝဵင်းသီႇပေႃႉ ပိုတ်ႇလိူင်ႈၸွႆးတြႃးၵႂႃႇ ၸွမ်းၼင်ႇပၵ်း ပိူင်မၢႆမီႈဝၢၼ်ႈမိူင်းမီးဝႃႈၼႆသေတႃႉ ၵူၼ်းပိုၼ်ႉတီႈတႄႉလၢတ်ႈဝႃႈ ၵူႈပွၵ်ႈ လွင်ႈၵူၼ်းၸူၼ်ၵူၼ်းႁၢႆႉၼႂ်းဝဵင်းသီႇပေႃႉၵျွၵ်ႉမႄး ၊ ပလိၵ်ႈဢမ်ႇတွၼ်ႉသႂ်ႇၸႂ် လမ်းတီႉၺွပ်းပၼ်ႁႂ်ႈလႆႈသေပွၵ်ႈ သေၵမ်း။ ၵမ်းၼႆႉသမ်ႉ မႃးတီႉၺွပ်းၵူၼ်းၸူၼ်သေပိုၼ်ၽၢဝ်ႇၼႄၸိူင်ႉၼႆ ပဵၼ်လၢႆးလဵၼ်ႈသိုၵ်းမၢၼ်ႈႁဵတ်းၼႄၵူၼ်းမိူင်းႁိုဝ်ၵူၼ်းသီႇပေႃႉလၢတ်ႈၼင်ႇၼႆ။
ၸူဝ်ႈသိုၵ်းမၢၼ်ႈ ယိုတ်းမိူင်းမႃးၼႆႉ မိူဝ်ႈပီ 2021 တီႈဝဵင်းသီႇပေႃႉ မီးၵူၼ်းႁၢႆႉၶဝ်ႈၸူၼ် ၼႂ်းႁၢၼ်ႉၶမ်း ပွၵ်ႈၼိုင်ႈ။ မိူဝ်ႈၼၼ်ႉတႄႉ သိုၵ်းမၢၼ်ႈဢမ်ႇပိုၼ်ၽၢဝ်ႇဝႃႈ တီႉလႆႈၵူၼ်းၸူၼ်ၸိူင်ႉၼႆ။