ၼႂ်းၸႄႈဝဵင်းမိူင်းမိတ်ႈ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉမႅင်း တၢင်းပဵၼ်ဢူဝ်ႊမၢႆႊၶရွၼ်ႊ 3 ၵေႃႉယဝ်ႉ ၵူၼ်းပိုၼ်ႉတီႈလၢတ်ႈ။
ၼႂ်းမိူင်းမိတ်ႈၼႆႉ ၶိုၼ်းတႄႇၵူတ်ႇထတ်းႁၼ် ၵူၼ်းပဵၼ်ၶူဝ်ႊဝိတ်ႉ ၸိူဝ်ႉၽၼ်းဢူဝ်ႊမၢႆႊၶရွၼ်ႊ မိူဝ်ႈဝၼ်းတီႈ 22/2/2022 ယၢမ်းလဵဝ် ယူတ်းယႃတူဝ်ယူႇဝႆႉ တီႈႁူင်းယႃမိူင်းမိတ်ႈ။
ၵူၼ်း မိူင်းမိတ်ႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝၼ်းတီႈ 22 ၼၼ်ႉ ၵူတ်ႇထတ်း 5 ၵေႃႉ ၼႂ်းၼၼ်ႉ ထူပ်းႁၼ် 3 ၵေႃႉ။ ပဵၼ်တၢင်း ပဵၼ်မႂ်ႇဢူဝ်ႊမၢႆႊၶရွၼ်ႊၼႆၶႃႈ။ ယိင်းလၢႆၵေႃႉ ၸၢႆးလၢႆၵေႃႉတႄႉ ဢမ်ႇလႆႈႁူႉၶႃႈ။ ယၢမ်းလဵဝ်တႄႉ ယူတ်းယႃတူဝ် ဝႆႉ တီႈႁူင်းယႃ မိူင်းမိတ်ႈ ၼႆႉဢေႃႈ”- ဝႃႈၼႆ။
ဝၢႆးလင်ၵူတ်ႇထတ်းႁၼ်ၵူၼ်းၸပ်း ဢူဝ်ႊမၢႆႊၶရွၼ်ႊသေ ၵူၼ်းမိူင်းမိတ်ႈ တူၵ်းၸႂ်ၵူဝ်ႁႄ၊ ပေႃးထိုင်မႃး ဝၼ်းတီႈ 25 (မိူဝ်ႈၽုၵ်ႈ) ၼႆႉ တေၶိုၼ်းပိၵ်ႉၵၢတ်ႇလူင် ဝဵင်းမိူင်းမိတ်ႈ ဝႆႉၶိုၼ်းထႅင်ႈၵမ်းၼိုင်ႈ၊ ၼင်ႇႁိုဝ်တေႁႄႉၵင်ႈတၢင်းပဵၼ်ၼႆႉလႆႈ ဝႃႈၼႆ။
“လႆႈငိၼ်းဝႆႉတႄႉ မိူဝ်ႈၽုၵ်ႈၼႆႉ တီႈၵၢတ်ႇမိူင်းမိတ်ႈ တေပိၵ်ႉဢိုတ်းဝႆႉၼႆၶႃႈ။ ယဝ်ႉၵေႃႈ တေဢမ်ႇလႆႈ ၶွၼ်ႈတုမ်ၵၼ် ၼမ် ပေႃးၵႂႃႇဢွၵ်ႇတၢင်း ၼွၵ်ႈၵေႃႈ ႁႂ်ႈသႂ်ႇၽႃႈတူမ်းသူပ်း ၵူႈၵေႃႉၼႆၶႃႈဝႃႇ။ သင်ဝႃႈ တၢင်းပဵၼ်ၼႆႉ ၸပ်းၽႄႈၼမ်လိူဝ် ၼႆႉ ထႅင်ႈၸိုင် လွင်ႈၵႂႃႇမႃးၵေႃႈ တေယၢပ်ႇ ။ လွင်ႈၵူတ်ႇထတ်းၵၼ်ၵေႃႈ တေၸၢင်ႈမီးၼမ်မႃး ”- ၵူၼ်းၼုမ်ႇ မိူင်းမိတ်ႈ လၢတ်ႈတီႈၽူႈတွႆႇႁွၵ်ႈၼင်ႇၼႆ။
ၼႂ်းပိုၼ်ႉတီႈ လၢႆလၢႆၸႄႈဝဵင်း လၢတ်ႈဝႃႈထူပ်းႁၼ်ၵူၼ်းပဵၼ်ၶူဝ်ႊဝိတ်ႉ ဢၼ်မႂ်ႇထႅင်ႈ ၶိုၼ်းၼမ်မႃး ဝႃႈၼႆ သေတႃႉ သိုဝ်ႇၶၢဝ်ႇမီႊတီႊယႃႊ ၶွင်ၸုမ်းသိုၵ်းမၢၼ်ႈတႄႉ ပိုၼ်ၽၢဝ်ႇ မိူဝ်ႈဝႃး ဝၼ်းတီႈ 23 ဝႃႈ ၾၢႆႇပၢႆးယူႇလီ မိူင်းႁူမ်ႈတုမ် ပိုၼ်ၽၢဝ်ႇၼႂ်းၸႄႈဝဵင်း မိူင်းမိတ်ႈ ႁၼ်ၵူၼ်းတိတ်းၸပ်းၶူဝ်ႊဝိတ်ႉ 19 တင်းမူတ်း 7 ၵေႃႉ။ ၼႂ်းမိူင်းတႆး 27 ၸႄႈဝဵင်း ၵူတ်ႇထတ်းႁၼ် 395 ၵေႃႉ လူႉတၢႆ 1 ၵေႃႉ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ