မိူဝ်ႈၵၢင်လိူၼ်ၼူဝ်ႊဝႅမ်ႊပိူဝ်ႊၼႆႉ တူဝ်တႅၼ်းၾၢႆႇသိုၵ်းတဢၢင်း တင်း သိုၵ်းမၢၼ်ႈ ႁူပ်ႉဢုပ်ႇၵၼ်တီႈဝဵင်းလႃႈသဵဝ်ႈ ၵဵဝ်ႇၵပ်းလွင်ႈတေဢဝ်သၢႆသိုၵ်းတဢၢင်း ထွႆဢွၵ်ႇၸႄႈဝဵင်းမိူင်း ၵုတ်ႈ၊ ဝဵင်းမိူင်းမိတ်ႈ သိုၵ်းမၢၼ်ႈတေၶဝ်ႈၵုမ်းၶိုၼ်း ဝႃႈၼႆသေတႃႉ တေႃႇထိုင်ယၢမ်းလဵဝ် သိုၵ်းမၢၼ်ႈပႆႇမီးတိုဝ်ႉတၢင်းၶဝ်ႈယိုတ်းၶိုၼ်း။

ပၢင်ႁူပ်ႉထူပ်းဢုပ်ႇဢူဝ်းၵၼ်ၼႆႉ ၸတ်းႁဵတ်းၵႂႃႇ မိူဝ်ႈဝၼ်းတီႈ 12/11/2025 တင်းသွင်ၾၢႆႇ ဝၢင်းၽႅၼ် တေႁႂ်ႈ သၢႆသိုၵ်းတဢၢင်း ထွႆဢွၵ်ႇဝဵင်း ၼႂ်းႁၢင်လိူၼ်ၼူဝ်ႊဝႅမ်ႊပိူဝ်ႊၼႆႉ- ၼႆ ၵူၼ်းမိူင်းၼႂ်းၸႄႈ ဝဵင်းလႃႈသဵဝ်ႈ ၵေႃႉႁူႉႁၼ် ၸွမ်းလွင်ႈၼႆႉ လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“ၶဝ်မႃးႁူပ်ႉၵၼ်ပွၵ်ႈၼႆႉ ငိၼ်းဝႃႈ ပႃးလွင်ႈဢၼ်သိုၵ်းလွႆတေထွႆဢွၵ်ႇဝဵင်းပၼ်ၶိုၼ်းသိုၵ်းမၢၼ်ႈၼၼ်ႉ။ တေႁဵတ်းႁိုဝ်ထွႆ၊ တေဢွၵ်ႇမိူဝ်ႈလႂ်၊ သိုၵ်းမၢၼ်ႈသမ်ႉ တေၶဝ်ႈၶိုၼ်းမိူဝ်ႈလႂ်၊ တေဢဝ်လၢႆးလႂ်ၶဝ်ႈၼႆၸဵမ် ၸိူဝ်းၼႆႉ။ ၵူၺ်းၵႃႈ ႁူဝ်ယွႆႈတႅတ်ႈတေႃးမၼ်းတႄႉ ပႆႇလႆႈငိၼ်းသင်ၸွမ်း။”

ယွၼ်ႉမိူင်းၶႄႇ ယူႇၵၢင်ႁဵတ်းၶဵဝ်ပၼ်သေ ဝၼ်းတီႈ 27-28 လိူၼ်ဢွၵ်ႉထူဝ်ႊပိူဝ်ႊၼၼ်ႉ သိုၵ်းမၢၼ်ႈ တင်း သိုၵ်းတဢၢင်း (TNLA) ႁူပ်ႉထူပ်းဢုပ်ႇဢူဝ်းၵၼ် တီႈဝဵင်းၶုၼ်ႊမိင်ႊ ၼႂ်းမိူင်းၶႄႇ ပဵၼ်ၵမ်း ထူၼ်ႈ (9) သေ လႆႈၶေႃႈတူၵ်းလူင်းၵၼ်ဝႃႈ သိုၵ်းတဢၢင်း တေလႆႈထွႆဢွၵ်ႇဝဵင်းမိူင်းၵုတ်ႈၵူၺ်းဢမ်ႇၵႃး သၢႆသိုၵ်းတင်းသွင်ၾၢႆႇ ႁွတ်ႈထိုင်လႂ်ၵေႃႈ တေလႆႈၵိုတ်းဝႆႉတီႈၼၼ်ႉ ။

လွင်ႈၶေႃႈဢုပ်ႇဢူဝ်းၵၼ်တင်းသိုၵ်းမၢၼ်ႈ ဢၼ်ႁႂ်ႈသိုၵ်းတဢၢင်း (TNLA) ထွႆဢွၵ်ႇဝဵင်းမိူင်းၵုတ်ႈ၊ ဝဵင်းမိူင်းမိတ်ႈၼႆႉ ႁွင်ႈၵၢၼ်ပွင်ႇၶၢဝ်ႇ သိုၵ်းတဢၢင်း တႄႉ ပိုၼ်ၽၢဝ်ႇပဵၼ်တၢင်း ၵၢၼ်ဝႆႉဝႃႈ – ဝၼ်းတီႈ 29 လိူၼ်ဢွၵ်ႉထူဝ်ႊပိူဝ်ႊၼႆႉ တေဢဝ်သၢႆသိုၵ်း ထွႆထွၼ်ဢွၵ်ႇ ဝဵင်းမိူင်းၵုတ်ႈ လႄႈ မိူင်းမိတ်ႈ ၸွမ်းၼင်ႇတူၵ်းလူင်းၵၼ်ဝႆႉ – ဝႃႈၼႆဝႆႉ။

ၼႂ်းၸႄႈဝဵင်းမိူင်းမိတ်ႈ ၊ ၸႄႈဝဵင်းမိူင်းၵုတ်ႈၼႆႉ ၼွၵ်ႈလိူဝ်သိုၵ်းတဢၢင်း ယင်းမီးပႃး ၸုမ်းသိုၵ်းၵူၼ်းၼုမ်ႇမၢၼ်ႈ လၢႆလၢႆၸုမ်း ၵုမ်းၵမ်ဝႆႉပႃးၸွမ်းလႄႈ တႃႇသိုၵ်းမၢၼ်ႈတေၶဝ်ႈၵုမ်း ၶိုၼ်းလႆႈလီငၢမ်းၼၼ်ႉ ဢမ်ႇငၢႆႈလူမ် မိူၼ်ၼင်ႇၸႄႈဝဵင်းလႃႈသဵဝ်ႈ။

ပူၼ်ႉမႃး ဝၼ်းတီႈ 6 လိူၼ်ၼူဝ်ႊဝႅမ်ႊပိူဝ်ႊ ယၢမ်းၵၢင်ၶမ်ႈ 8 မူင်းၼၼ်ႉၵေႃႈ ၵူၼ်းမိူင်းၼႂ်းၸႄႈဝဵင်းမိူင်းၵုတ်ႈ ၵူႈပွၵ်ႉယွမ်ႇၽွမ်ႉၵၼ်တွႆႇၽၢင်လဵၵ်း၊ ပုင်းလဵၵ်းသေ ႁွင်ႉၽဵင်းၵႂၢမ်း “ၵတိသႅတ်ႉၸႃႇၵၢၼ်လုၵ်ႉၽိုၼ်ႉ” ၼႄၵၢင်ၸႂ်ဝႃႈ “ဢမ်ႇၽွမ်ႉလွင်ႈသိုၵ်းမၢၼ်ႈတေၶဝ်ႈယိုတ်းၵုမ်းဝဵင်းမိူင်းၵုတ်ႈၶိုၼ်း” ၼႆယဝ်ႉ။

တႃႇသိုၵ်းတဢၢင်းတေထွႆသၢႆသိုၵ်းဢွၵ်ႇၶိုၼ်း ၼႂ်းၸႄႈဝဵင်းမိူင်းၵုတ်ႈ၊ ဝဵင်းမိူင်းမိတ်ႈၼႆႉ တင်းသွင်ၾၢႆႇ တူၵ်းလူင်းၵၼ်မႃးႁိုင်ၶၢဝ်းတၢင်း ၽၢၵ်ႇလိူၼ်ၼိုင်ႈယဝ်ႉသေတႃႉ တေႃႇထိုင် မိူဝ်ႈၼႆႉ (20/11/2025) ပႆႇႁၼ်သိုၵ်းမၢၼ်ႈၶဝ်ႈၵုမ်းလႆႈလႄႈ သိုၵ်းတဢၢင်း တင်းသိုၵ်းၵူၼ်းၼုမ်ႇမၢၼ်ႈ (PDF) ၶဝ် တိုၵ်ႉႁူမ်ႈၵၼ်ပၼ်ႇၵၢၼ်ၽွင်းငမ်းဝႆႉယူႇ။