သိုၵ်းမၢၼ်ႈ ယိုဝ်းၵွင်ႈလူင်သႂ်ႇၼႂ်းဝၢၼ်ႈ ၼႂ်းဝဵင်းမိူင်းပၢႆး လႅၼ်လိၼ် တႆး လႄႈ ယၢင်းလႅင် ၸိုင်ႈတႆးပွတ်းၸၢၼ်း တိူဝ်ႉသႂ်ႇၵူၼ်းမိူင်း လူႉတၢႆ 1 ၵေႃႉ မၢတ်ႇၸဵပ်း 2 ၵေႃႉ။
မိူဝ်ႈၼႆႉ ဝၼ်းတီႈ 23/2/2022 ယၢမ်းၵၢင်ၼႂ် မွၵ်ႈ 8 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်း ဢၼ်ပၵ်းဝႆႉတီႈဝဵင်းမိူင်းပၢႆး ၸႄႈဝဵင်းၾၢႆၶုၼ် ၸိုင်ႈ တႆး ပွတ်းၸၢၼ်း မၢႆတပ်ႉ 422 ၼၼ်ႉ တင်ႈၸႂ် လၢမ်းလိမ်းယိုဝ်းၵွင်ႈလူင် ၵႂႃႇၵူႈႁူးၵူႈတၢင်း တိူဝ်ႉသႂ်ႇ ႁိူၼ်းယေးၵူၼ်းဝၢၼ်ႈ တိူဝ်ႉၺႃးၵူၼ်းထဝ်ႈ ၸၢႆးဢႃယု 70 ပၢႆ လူႉတၢႆ ၵေႃႉၼိုင်ႈ ၼၢင်းယိင်းဢွၼ်ႇ ဢႃယု 14 ပီ ၵေႃႉၼိုင်ႈလႄႈ ၽူႈၸၢႆး ၵေႃႉၼိုင်ႈ လႆႈမၢတ်ႇၸဵပ်း။
ၵူၼ်းမိူင်းပၢႆး လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ သိုၵ်းမၢၼ်ႈၶဝ် ယိုဝ်းၸဵမ်ၸဝ်ႉၶႃႈယဝ်ႉ။ ယိုဝ်းၵႂႃႇတၢင်းဝၢၼ်ႈ ၵႃႇၽူး(ကဖုရွာ) ၶႃႈ။ တၢင်းၼၼ်ႉ ဢမ်ႇမီးၸုမ်း PDF လူး ၶဝ်တေယိုဝ်းႁဵတ်းသင်။ မၢၵ်ႇလူင်တႅၵ်ႇသႂ်ႇ ထဝ်ႈၸၢႆး ဢႃယု 70 ပၢႆ ၵေႃႉၼိုင်ႈ လူႉတၢႆ။ ယဝ်ႉၵေႃႈ မၢတ်ႇၸဵပ်းၸွမ်းထႅင်ႈသွင်ၵေႃႉ။ ႁိူၼ်းယေးၸိူဝ်းၼႆႉၵေႃႈ လူႉၵွႆၼမ်ၶႃႈဢေႃႈ”- ဝႃႈၼႆ။
ၼႂ်းဝူင်ႈဝၢင်ႈၼႆႉ တပ်ႉသိုၵ်းမၢၼ်ႈ ဢဝ်ၶိူင်ႈမိၼ်ယိုဝ်းသိုၵ်း၊ ၶိူင်ႈမိၼ်မႅင်းဝီႈ ၸိူဝ်းၼႆႉ ပိုတ်းယိုဝ်းမၢၵ်ႇလူင်သႂ်ႇၼႂ်း ဝဵင်းမိူင်းပၢႆး ။ မၢၵ်ႇ ဢၼ်ယိုဝ်းသႂ်ႇၼၼ်ႉ ပဵၼ်သႅၼ်း 120 မမ၊ 80 မမ လႄႈ ၵွင်ႈလူင် ၸိူဝ်းၼႆႉ။
ၽူႈၶဝ်ႈၸုမ်း PDF မိူင်းပၢႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ -“သိုၵ်းမၢၼ်ႈၸၵၸ ၸႂ်ႉဢဵၼ်ႁႅင်းသိုၵ်းတင်းၼမ်။ ၸႂ်ႉၵွင်ႈ လူင် ၸိူဝ်းၼႆႉ ယိုဝ်းႁၢဝ်ႈႁႅင်းၶႃႈယဝ်ႉ။ ၸွမ်းၼင်ႇ ပိူင်ၵၢၼ်သိုၵ်းမီးၼၼ်ႉ ပေႃးပဵၼ်သိုၵ်းၼႂ်းမိူင်းၼင်ႇၵၼ် တေဢမ်ႇလႆႈၸႂ်ႉၶႃႈလူး။ ၶဝ်တိုၼ်းဢမ်ႇထွမ်ႇ ဢမ်ႇၸွမ်း ၶႃႈ။ ဢဝ်မႃးၸႂ်ႉမူတ်းဢေႃႈ” – ဝႃႈၼႆ။
ယၢမ်းလဵဝ် ပၢင်တိုၵ်းဢၼ်ပဵၼ်ယူႇတၢင်းမိူင်းပၢႆးၼႆႉ ဢဵၼ်ႁႅင်းဢမ်ႇငၢမ်ႇၵၼ်လႄႈ ၸုမ်း PDF တိုၵ်ႉလူဝ်ႇတၢင်းၸွႆႈထႅမ်ထႅင်ႈ တင်းၼမ် ဝႃႈၼႆ။
တၢင်းမိူင်းပၢႆးၼႆႉသိုၵ်းမၢၼ်ႈ ယိုဝ်းသိုၵ်းၵူၺ်းဢမ်ႇၵႃး ႁဵတ်းၶဵၼ်တေႃႇၵူၼ်းမိူင်းပႃးထႅင်ႈ။ ၽဝ်ႁိူၼ်းယေးၵူၼ်းဝၢၼ်ႈ၊ တီႉမတ်ႉၵူၼ်းဝၢၼ်ႈ။ ပေႃႉထုပ်ႉၶႃႈႁႅမ်ၵူၼ်းမိူင်းတၢႆၸွမ်းဢမ်ႇယွမ်း 10 ၵေႃႉယဝ်ႉလႆႈႁူႉၼင်ႇၼႆ။
