မိူဝ်ႈၼႆႉ ဝၼ်းတီႈ 23/2/2022 ယၢမ်းၵၢင်ၼႂ် မွၵ်ႈ 1 မူင်းၶိုင်ႈ တပ်ႉသိုၵ်းၵႅတ်ႇၶႄၵူၼ်းမိူင်း PDF ပွတ်းႁွင်ႇ ၶဝ်ႈလူမ်ႇယိုဝ်း သုမ်ႉပႂ်ႉယၢမ်း ၶွင်ႇသီႇသိုၵ်းမၢၼ်ႈ ၼႂ်းၸႄႈဝဵင်းၼွင်ၶဵဝ် ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ သွင်ဢွင်ႈတီႈ။
ၵူၼ်းပိုၼ်ႉတီႈ ၼွင်ၶဵဝ် လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်ၸုမ်းလႂ်မႃးယိုဝ်းတႄႉ ဢမ်ႇလႆႈႁူႉလီလီ။ မႃးယိုဝ်းယၢမ်းၵၢင်ၶိုၼ်းလိုၵ်း မွၵ်ႈ 1 မူင်း ၶိုင်ႈၼႆႉၶႃႈ။ ယိုဝ်းႁိုင် မွၵ်ႈၶိုင်ႈၸူဝ်ႈမူင်းၼႆႉၶႃႈ ပဵၼ်တီႈသုမ်ႉပႂ်ႉယၢမ်း သိုၵ်းမၢၼ်ႈ တီႈတႃႈရူတ်ႉၾႆးၶႃႈဢေႃႈ။ လႆႈငိၼ်းဝႃႈ မီးၵူၼ်းမၢတ်ႇၸဵပ်းၸွမ်း 2 ၵေႃႉ။ ၵူၺ်းၵႃႈ ဢမ်ႇထိုင်တီႈမႆႈၸႂ်ၼႆဝႃႇ”- ဝႃႈၼႆ။
လွင်ႈၼႆႉ PDF ပွတ်းႁွင်ႇ ပိုၼ်ၽၢဝ်ႇဝႃႈ ပဵၼ်ၼမ်ႉမိုဝ်းၶဝ်။ ၶဝ်ႈယိုဝ်း သုမ်ႉယၢမ်း သိုၵ်းမၢၼ်ႈ 2 တီႈ ။ မၢင်တီႈ သိုၵ်းမၢၼ်ႈ တၼ်းထွႆႇထွၼ်ဢွၵ်ႇ မၢင်တီႈသမ်ႉ ဢမ်ႇထွႆသေ သွင်ၾၢႆႇလႆႈပိုတ်းယိုဝ်းၵၼ်။ ၾၢႆႇသိုၵ်းမၢၼ်ႈ လူႉတၢႆ 1 ၵေႃႉ၊ မၢတ်ႇၸဵပ်း 4 ၵေႃႉ။ ၾၢႆႇ PDF တႄႉ လႆႈမၢတ်ႇၸဵပ်း 3 ၵေႃႉ။ ဝၢႆးၶဝ်ႈလူမ်ႇယိုဝ်းယဝ်ႉ ယင်းၽဝ် ပႅတ်ႈ ပႃးသုမ်ႉယၢမ်းၸိူဝ်းၼၼ်ႉ ဝႃႈၼႆ။
လွင်ႈပိုတ်းယိုဝ်းၵၼ် ၶမ်ႈဝႃးၼႆႉ ႁဵတ်းႁႂ်ႈၵူၼ်းမိူင်း ၼွင်ၶဵဝ် တူၵ်းၸႂ် ။
“ ယူႇယူႇသဵင်ၵွင်ႈၵေႃႈဢွၵ်ႇယၢမ်း ၵၢင်ၶိုၼ်းၸိူင်ႉၼႆ ႁဝ်းၶႃႈ တႄႉ ဢွၼ်ၵၼ်တူၵ်းၸႂ် ၶႃႈဢေႃႈ။ မိူဝ်ႈၵွၼ်ႇၼႃႈၼႆႉၵေႃႈ တီႈတူဝ်းၵဵၵ်ႉၼွင်ၶဵဝ်ၼႆႉ မီးလွင်ႈပိုတ်းယိုဝ်းၵၼ်ၼင်ႇၵဝ်ႇ။ ၵူၺ်းၵမ်းၼႆႉသမ်ႉ ၸမ်ဝဵင်းၼႃႇၶႃႈလူး။ ”- ၵူၼ်း ၼွင်ၶဵဝ် သိုပ်ႇလၢတ်ႈၼႄၼင်ႇၼႆ။
ၼႂ်းဝူင်ႈဝၢင်ႈၼႆႉၵူၺ်း တီႈဝဵင်းၼွင်ၶဵဝ် သဵင်ၵွင်ႈတႅၵ်ႇ 2 ၵမ်းယဝ်ႉလႄႈၵူၼ်းမိူင်းတူၵ်းၸႂ်ႁႅင်း။ ၾၢႆႇၼိုင်ႈၼႂ်းႁူဝ်ပီၼႆႉ လွင်ႈၶဵင်ႈၶႅင် ၵူတ်ႇထတ်းၵူၼ်းၵႂႃႇမႃးၵေႃႈ ၶိုၼ်းမီးမႃးၶိုၼ်းႁႅင်း ။