ၵူၼ်းပၢႆႈၽေးသိုၵ်းဢၼ်မႃးမီးဝႆႉတီႈၵျွင်းပိတၵၢတ်ႈ ဝဵင်းတူၼ်ႈတီးၼၼ်ႉ မီးမႄႈပုမ်လူင်ၸမ်ၵိူတ်ႇ 4 ၵေႃႉ ယၢပ်ႇၽိုတ်ႇငိုၼ်းတွင်းတႃႇၵိူတ်ႇလဵင်ႉလုၵ်ႈ။
မေႃယႃ ဢၼ်တူၺ်းထိုင် ၵူၼ်းပၢႆႈၽေးသိုၵ်း တီႈဝဵင်းတူၼ်ႈတီး လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းပႃးတွင်ႉ ဢၼ်လုၵ်ႉတီႈၵျွၵ်ႉမႄးမႃး မီး 3 ၵေႃႉ၊ ဢၼ်လုၵ်ႉတီႈတၢင်းလွႆၵေႃႇမႃး မီးၵေႃႉၼိုင်ႈ တင်းမူတ်းမီး 4 ၵေႃႉ။ ယၢမ်းလဵဝ် ယၢပ်ႇၽိုတ်ႇၵႃႈၸႂ်ႉၸၢႆႇ တႃႇၵိူတ်ႇလုၵ်ႈလႄႈ ၶိုၼ်ႈႁူင်းယႃ ၸိူဝ်းၼႆႉ။ သင်ဝႃႈ လုၵ်ႈဢွၼ်ႇၵိူတ်ႇမႃးယူႇလီ မႄႈလုၵ်ႈဢွၼ်ႇၵေႃႈယူႇလီၼႆ ၵိူတ်ႇမႃးငၢႆႈလူမ်ႈၸိုင် တေသဵင်ႈငိုၼ်း 6 သႅၼ် ထိုင် 8 သႅၼ်။ သင်ဝႃႈ လုၵ်ႈဢွၼ်ႇၵိူတ်ႇမႃးယဝ်ႉပဵၼ်လိူင် ဢမ်ႇယူႇလီၸိုင် တေလႆႈသိုပ်ႇၶိုၼ်ႈႁူင်းယႃထႅင်ႈသေ တေသဵင်ႈမွၵ်ႈ 10 သႅၼ်ၼႆႉ ”– ဝႃႈၼႆ။
ၽွင်းသိုၵ်းမၢၼ်ႈ ယိုတ်းမိူင်းမႃးၼႆႉ ၽူႈႁၢပ်ႇၵၢၼ်လူင်ပွင်ၸိုင်ႈ ၸိူဝ်းပဵၼ်မေႃယႃ ၸိူဝ်းၼႆႉၵေႃႈ ဢွၼ်ၵၼ်ႁဵတ်း CDM လႄႈ ယၢမ်းလဵဝ် မေႃယႃ တီႈႁူင်းယႃလူင်ပွင်ၸိုင်ႈၵေႃႈ ဢမ်ႇၵုမ်ႇထူၼ်ႈ။ ယွၼ်ႉၼၼ် တႃႇၵူၼ်းဝၢၼ်ႈ တေၵႂႃႇၵိူတ်ႇလုၵ်ႈတီႈႁူင်းယႃလူင်ပွင်ၸိုင်ႈ ၼၼ်ႉ မီးလွင်ႈယၢပ်ႇၽိုတ်ႇ ။
“ဢၼ်တေၵႂႃႇၵိူတ်ႇတႄႉ တေပဵၼ်ႁူင်းယႃ Private (ႁူင်းယႃသုၼ်ႇတူဝ်) ၸိူင်ႉၼၼ် ယၢမ်းလဵဝ် တႃႇတေၵႂႃႇႁူင်းယႃ လူင်ပွင်ၸိုင်ႈၶဝ်သမ်ႉ တေဢမ်ႇပေႃးၶႅမ်ႉလႅပ်ႈ ။ လွင်ႈတူၺ်းထိုင်ၵေႃႈ ဢမ်ႇပေႃးၶႅမ်ႉ။ မေႃယႃၶဝ်ၵေႃႈ ဢမ်ႇၵုမ်ႇထူၼ်ႈ။ ပေႃးၵိူတ်ႇလုၵ်ႈလူၺ်ႈလၢႆးထမ်ႇမတႃႇ(ယူဝ်းယူဝ်း) တႄႉ တေသဵင်ႈငိုၼ်းမွၵ်ႈ 6 သႅၼ်ၼႆႉ။ ပေႃးၽႃႇၵိူတ်ႇတႄႉ တေသဵင်ႈမွၵ်ႈ 8 သႅၼ် ထိုင် 10 သႅၼ်ၼႆႉ”- မေႃယႃ ဢၼ်တူၺ်းထိုင် ၵူၼ်းပၢႆႈၽေး သိုၵ်း တီႈဝဵင်းတူၼ်ႈတီး သိုပ်ႇလၢတ်ႈၼႄ ၼင်ႇၼႆ။
ပေႃးပဵၼ်ပၢင်တိုၵ်းသိုၵ်းသိူဝ်မႃးၼႆၸိုင် ၵမ်ႈၼမ် ဢၼ်လႆႈပၢႆႈၽေးသိုၵ်းၼႆႉ တေပဵၼ်ၵူၼ်းထဝ်ႈ၊ မႄႈလုၵ်ႈဢွၼ်ႇ၊ လုၵ်ႈဢွၼ်ႇလႄႈ မႄႈပႃး တွင်ႉ (မႄႈမၼ်း) ၸိူဝ်းၼႆႉ တင်းၼမ်။ ယွၼ်ႉၼၼ်လႄႈ ၽွင်းပၢႆႈၽေးသိုၵ်းယူႇၼႆႉ ၼင်ႇႁိုဝ် မႄႈလုၵ်ႈဢွၼ်ႇ၊ မႄႈပႃးတွင်ႉၶဝ် ပေႃးတေမီးတၢင်း ၵိၼ်ဢႃႇႁႃႇရလႄႈ တႃႇတူၺ်းထိုင်ပၢႆးယူႇလီၼၼ်ႉ တိုၵ်ႉလူဝ်ႇတၢင်းၸွႆႈထႅမ် ထႅင်ႈတင်းၼမ် ၼႆယဝ်ႉ။
