ၼႂ်းၸႄႈဝဵင်းၵဵင်းတုင်ၸိုင်ႈတႆးပွတ်းဢွၵ်ႇၼၼ်ႉ   ၵူၼ်းတိတ်းၸပ်းၶူဝ်ႊဝိတ်ႉ 19 ၼႂ်းဝၼ်းလဵဝ် ၶိုၼ်းမီးထိုင် 24 ၵေႃႉ ပဵၼ်ဢၼ်ၼမ်သုတ်း ၼႂ်းပီ 2022 ၼႆႉ။

မိူဝ်ႈဝႃး ဝၼ်းတီႈ 21/2/2022  ၼႂ်းဝၼ်းလဵဝ် တီႈၵဵၵ်ႉ/ လၢၼ်ႇၼမ်ႉပုင်ႇ ၵဵင်းတုင် တၢင်းဢွၵ်ႇၵႂႃႇၸူးဝဵင်းတႃႈၶီႈလဵၵ်း ၼၼ်ႉ ၵူတ်ႇထူပ်းႁၼ် ၵူၼ်းၸပ်းတၢင်းပဵၼ်ၶူဝ်ႊဝိတ်ႉ 24 ၵေႃႉ ။  

ၵူၼ်းၼုမ်ႇ ၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈယဝ်ႉၶႃႈ  တီႈၵဵၵ်ႉ/ လၢၼ်ႇၼမ်ႉပုင်ႇ  ၼၼ်ႉၵူၺ်း ထူပ်းႁၼ် 24 ၵေႃႉ ၵမ်းလဵဝ်။ မိူဝ်ႈလဵဝ် လႆႈငိၼ်းဝႆႉတႄႉ တီႈၵၢတ်ႇ လူင် ၵဵင်းတုင်ၵေႃႈ ပေႃးလိူၼ်ၼႆႉသဵင်ႈ တေလူတ်းယွၼ်ႇလွင်ႈၵူၼ်းၶွၼ်ႈတုမ်ၵၼ် ၼႆၶႃႈဝႃႈ တေႁဵတ်းႁိုဝ်တႄႉပႆႇ ႁူႉ”- ဝႃႈၼႆ။

ယၢမ်းလဵဝ်သမ်ႉ  ပဵၼ်ၶၢဝ်းၵိၼ်ၶၢဝ်းလူႇ၊  ပွႆးၶၢမ်ႇသၢင်ႇ/ ၸၢင်း၊ ပၢင်ၶႅၵ်ႇ၊ ၶိုၼ်ႈႁိူၼ်းမႂ်ႇ  ၸိူဝ်းၼႆႉ ၸတ်းႁဵတ်း   ၵိုၼ်းၶွၼ်ႈဢမ်ႇထၢတ်ႇလႄႈ ၸင်ႇဝႃႈ မီးၵူၼ်းတိတ်းၸပ်းတၢင်းပဵၼ်မႃးၶိုၼ်းၼမ်။

 ၵူၼ်းၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ၶၢဝ်းၼႆႉ ပဵၼ်ၶၢဝ်းလူႇတၢၼ်း ႁဵတ်းပွႆးလၢမ်း ၸွမ်းၾိင်ႈထုင်ႉၵူၼ်းပိုၼ်ႉတီႈၼၼ်ႉၼႃႇ။ ပွႆးပၢင်ၶႅၵ်ႇ၊ ၶၢမ်ႇသၢင်ႇ/ ၸၢင်း ၸိူဝ်းၼႆႉ ၶႂ်ႈဝႃႈ မီးၵူႈဝၼ်း၊ ၼိုင်ႈဝၼ်း  မီးပဵၼ်ႁူႉၵႃႈလၢႆပၢင်၊ မိူဝ်ႈဝၼ်းတီႈ 19 ပူၼ်ႉ မႃးၼႆႉၵူၺ်း ၼႂ်းၵဵင်းတုင်ၼႆႉ ပေႃးပဵၼ်ပွႆးလၢမ်းၵႂႃႇၵူႈတီႈၶႃႈယဝ်ႉ။ လႆႈငိၼ်းဝႃႈတႄႉ လင်ဝၼ်းတီႈ 20 ၼႆႉၵႂႃႇ လွင်ႈႁဵတ်းပွႆးလၢမ်း ၸိူဝ်းၼႆႉ ႁႂ်ႈ လူတ်းၽွင်ႈၼႆၶႃႈဝႃႇ   ၼင်ႇႁိုဝ် တၢင်းပဵၼ်တေဢမ်ႇၽႄႈလၢမ်းႁႅင်းၼၼ်ႉၶႃႈၼႃႇ”- ဝႃႈၼႆ။

တၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈဝဵင်းၵဵင်းတုင်ၼႆႉ တႄႇဢဝ် ဝၼ်းတီႈ 29/6/2021 မႃး ႁၢၼ်ႉတေႃႇထိုင် ဝၼ်းတီႈ 21/2/2022 ၼႆႉ မီးၵူၼ်း တိတ်းၸပ်း ၸိူဝ်ႉမႅင်း တင်းမူတ်း 5,775 ၵေႃႉ၊ လူႉတၢႆ 92 ၵေႃႉ၊ ယႃၶႅၼ်း 6,521 ၵေႃႉလႄႈ တိုၵ်ႉယူတ်းယႃဝႆႉ 62 ၵေႃႉ  ၶၢဝ်ႇပိုၼ်ႉတီႈ ဢွၵ်ႇဝႆႉၼင်ႇၼႆ။