ၵူၼ်းပၢႆႈၽေးသိုၵ်း တီႈမိူင်းၵိုင် ႁူဝ်ၵူၼ်းမွၵ်ႈ 150 ပႆႇပွၵ်ႈႁိူၼ်းယေး ငဝ်းလၢႆးၼႂ်းပိုၼ်ႉတီႈ ပႆႇမီးလွင်ႈၼိမ်ယဵၼ် တိုၵ်ႉမီးသိုၵ်း သိူဝ် တူင်ႉၼိုင်ၵႂႃႇမႃးယူႇ ၼႂ်းထိူၼ်ႇႁိမ်းဝၢၼ်ႈ။
ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈပၢင်ႇလိူၼ်သီႇ/ ဝၢင်းထၢတ်ႈမူၺ်ႇတေႃႇလႄႈ ၸွမ်းႁိူၼ်းယေးပီႈၼွင်ႉၽႂ်မၼ်း ၼႂ်းပွၵ်ႉ/ ယွမ်ႇ ၼႂ်း ၸႄႈဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၸဵမ်မိူဝ်ႈ ႁူဝ်လိူၼ် ၵျႅၼ်ႊၼိဝ်ႊရီႊ တေႃႇထိုင် ယၢမ်းလဵဝ် ၶၢဝ်းတၢင်းၸမ် 2 လိူၼ် ႁူဝ်ၵူၼ်းမွၵ်ႈ 150 ပႆႇႁတ်းပွၵ်ႈႁိူၼ်းယေး ။ ၼႂ်းပိုၼ်ႉတီႈ တိုၵ်ႉ မီးသိုၵ်းတူင်ႉၼိုင်ၵႂႃႇမႃး၊ ၾၢႆႇၼိုင်ႈ ၵူဝ်ယဵပ်ႇၺႃးမၢၵ်ႇ ၽွင်းၵႂႃႇမႃးႁႃၵိၼ်လဵင်ႉတွင်ႉ၊ ပိူင်လူင် ၵူဝ်ၺႃးၵဵပ်းသိုၵ်း။
ၵူၼ်း မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “တီႈမိူင်းၵိုင်ၼႆႉ ယၢမ်းလဵဝ် ၵူၼ်းပၢႆႈၽေးသိုၵ်း တေမီးမွၵ်ႈ 150 ။ ပႆႇ ႁတ်းပွၵ်ႈႁိူၼ်း ၊ ယွၼ်ႉမီးၶၢဝ်ႇဝႃႈ ၵူဝ်လႆႈႁဵတ်းမေးသိုၵ်း၊ ၵူဝ်ၺႃးၵဵပ်းသိုၵ်း၊ ပေႃးမိူဝ်းတူင်ႉၼိုင်သမ်ႉ ဢမ်ႇသၢင်ႇတေႃႇ ၵူဝ်ယဵပ်ႇၺႃးမၢၵ်ႇ၊ ထိုင်ယၢမ်းလဵဝ် သိုၵ်းတင်း 2 ၸုမ်း တိုၵ်ႉတူင်ႉၼိုင် ယူႇဝႆႉၼႂ်းပိုၼ်ႉတီႈ ႁိမ်းၸမ်ဝၢၼ်ႈ”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ၵိုတ်းဝႆႉတီႈမိူင်းၵိုင်ၼႆႉ ၵမ်ႈၼမ်ပဵၼ်ၵူၼ်းၼႂ်းဢိူင်ႇၼႃးမူၼ်းလႄႈ ဢိူင်ႇလုၵ်းတွင်း။ ဢၼ်ပၢႆႈမႃးသွၼ်ႈဝႆႉတီႈ ပၢင်ႇပွႆးလိူၼ်သီႇ ႁူဝ်ၵူၼ်းတေမီးမွၵ်ႈ 60 ပဵၼ်ၵူၼ်းဝၢၼ်ႈၽႃလမ်။ ဢၼ်ယူႇၸွမ်းႁိူၼ်းယေး ပီႈၼွင်ႉၽႂ်မၼ်း ၼႂ်းပွၵ်ႉ/ ယွမ်ႇတႄႉ ၵမ်ႈၼမ် ပဵၼ်ၵူၼ်းၼုမ်ႇ ဢွၼ်ႇယိင်းၸၢႆး ၸိူဝ်းၼႆႉ။
“ၵူၼ်းပၢႆႈၽေးသိုၵ်း ဢၼ်ပၢႆႈယူႇဝႆႉ ၸွမ်းႁိူၼ်းယေးပီႈၼွင်ႉတႄႉ ၵမ်ႈၼမ် ပဵၼ်ၵူၼ်းၼုမ်ႇ ဢွၼ်ႇယိင်းၸၢႆး ။ လႄႈ ၵူၼ်းထဝ်ႈ ၵူၼ်းၶၢဝ်ႉ။ ၵူၼ်းသႅၼ်းပၢၼ်ၵၢင်ၵမ်ႈၼမ်ၶွၼ်ႈၵၼ်ယူႇဝႆႉပဵၼ်တီႈ။ ”- ၵူၼ်း မိူင်းၵိုင် သိုပ်ႇ လၢတ်ႈၼႄၼင်ႇၼႆ။
ၵၢင်ႉၵႄႇဝၢၼ်ႈဢိူင်ႇ ႁွင်ႉၶိုၼ်းပွၵ်ႈယူႇႁိူၼ်းသေတႃႉ ၵူၼ်းပၢႆႈၽေးသိုၵ်း ၵမ်ႈၽွင်ႈ ၵူဝ်ဢမ်ႇလွတ်ႈၽေး၊ ႁႃၵိၼ်လဵင်ႉတွင်ႉယၢပ်ႇလႄႈ ပၢႆႈၵႂႃႇႁဵတ်းၵၢၼ်မိူင်းႁိမ်းႁွမ်း ၵေႃႈမီး။ ပိူင်လူင်ၵူဝ်မိူဝ်းယဵပ်ႇၺႃးမၢၵ်ႇ။
ၵူၼ်းၼုမ်ႇ မိူင်းၵိုင် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈလဵဝ် သူၼ်ၼႆႉ ပႆႇႁတ်းၵႂႃႇတူၺ်း။ ၵူဝ်ယဵပ်ႇၺႃးမၢၵ်ႇ၊ သိုၵ်းတိုၵ်ႉတူင်ႉ ၼိုင်ၵႂႃႇမႃးယူႇႁိမ်းဝၢၼ်ႈ။ တေႃႈလဵဝ်သမ်ႉ ပဵၼ်ၶၢဝ်းတီႇၽဵဝ်ႈႁႆႈ ၽၼ်းၽိုၼ်း။ ၵူၺ်းၵႃႈတိုၼ်းဢမ်ႇႁတ်းၵႂႃႇ တီႇ ၸုတ်ႇၽဝ် မီးလွင်ႈတၢင်းယၢပ်ႇ ၸိူင်ႉၼႆ ၶႃႈဢေႃႈ”- ဝႃႈၼႆ။
တႄႇဢဝ် ႁၢင်လိူၼ်ၻီႊသႅမ်ႊပိူဝ်ႊ 2021 ၼၼ်ႉမႃး RCSS လႄႈ ၸုမ်းဢူၺ်းလီပွတ်းႁွင်ႇ ပိုတ်းယိုဝ်းၵၼ်ႁၢဝ်ႈႁႅင်း ၼႂ်းၸႄႈဝဵင်းမိူင်းၵိုင် လႄႈ တုမ်ႉတိူဝ်ႉၵူၼ်းမိူင်းပိုၼ်ႉတီႈ လႆႈပၢႆႈယၢၼ်ႁိူၼ်းယေး ၼပ်ႉႁူဝ်ႁဵင်၊ ဢၼ်ပၢႆႈႁွတ်ႈထိုင်ၽႅဝ် ၼႂ်းၸႄႈဝဵင်းလၢႆးၶႃႈၵေႃႈ မီး ထႅင်ႈတင်းၼမ်။
