ၼႂ်းၸႄႈဝဵင်းတူၼ်ႈတီးလႄႈ လႃႈသဵဝ်ႈ ၶိုၼ်းမီးၵူၼ်းၸပ်းတၢင်းပဵၼ်ၶူဝ်ႊဝိတ်ႉ 19 ၸိူဝ်ႉၽၼ်းဢူဝ်ႊမီႊၶရွၼ်ႊ ၵူၼ်းမိူင်းတူၵ်းၸႂ်ၾၢင်ႉယူႇၾၢင်ႉၵိၼ်။
ၼႂ်းဝၼ်းဝႃႊလႅၼ်ႊထၢႆႊ ဝၼ်းတၢင်းႁၵ်ႉမိူဝ်ႈဝႃး ဝၼ်းတီႈ 14/2/2022 တီႈဝဵင်းလႃႈသဵဝ်ႈ ၵူၼ်းၸပ်းတၢင်းပဵၼ်ၶူဝ်ႊဝိတ်ႉ ၶိုၼ်းပုင်ႈၶိုၼ်ႈထိုင် 18 ၵေႃႉ ၵူၼ်းလႃႈသဵဝ်ႈၵေႃႉၼိုင်ႈလၢတ်ႈ။
“ မိူဝ်ႈဝႃးယၢမ်းၵၢင်ၼႂ် ၵူၼ်းၵႂႃႇမႃးၼႂ်းဝဵင်းၼမ်လႄႈ ၾၢႆႇပၢႆးယူႇလီ တင်ႈလၢၼ်ႇ/ၵဵတ်ႉ ပႂ်ႉၵူတ်ႇထတ်း ။ ထူပ်းႁၼ်ၵူၼ်းၸပ်းတၢင်းပဵၼ်မီး 14 ၵေႃႉ ။ ၽိူဝ်ႇထိုင်ယၢမ်းၵၢင်ဝၼ်းမႃး တီႈႁူင်းယႃလူင်လႃႈသဵဝ်ႈၼၼ်ႉ ၶိုၼ်းၵူတ်ႇထတ်းႁၼ်ထႅင်ႈ ၵူၼ်းလႃႈသဵဝ်ႈ 2 ၵေႃႉ ၊ ၼမ်ႉတူႈ ၵေႃႉ႞ သီႇပေႃႉ ၵေႃႉ႞ ။ ႁူမ်ႈတင်းမူတ်း ၵူတ်ႇထတ်းႁၼ်ၵူၼ်းၸပ်းတၢင်းပဵၼ် 18 ၵေႃႉၶႃႈဢေႃႈ ”- ၽူႈၸၢႆးၵူၼ်းလႃႈသဵဝ်ႈ ဢၼ်ၸွႆႈထႅမ်တူင်ႇဝူင်းၵူၼ်းၼၼ်ႉလၢတ်ႈတီႈၽူႈတွႆႇႁွၵ်ႈၼင်ႇၼႆ။
မိူဝ်ႈဝႃးၼႆႉ တီႈဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်းၵေႃႈ ဢဝ် မႆႉ RDT ၵူတ်ႇထတ်းပၼ်လုၵ်ႈႁဵၼ်း တီႈႁူင်းႁဵၼ်းၸၼ်ႉသုင်မၢႆ 7 ႁၼ်ၵူၼ်းၸပ်းတၢင်းပဵၼ် မီး 17 ၵေႃႉ တီႈလုမ်းၽွင်းငမ်းၸႄႈဝဵင်းတူၼ်ႈတီး ပိုၼ်ၽၢဝ်ႇ။
တီႈဝဵင်းတူၼ်ႈတီးၼႆႉ ၸဵမ်မိူဝ်ႈ တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်း ႁွပ်ႈသၢမ်ပူၼ်ႉမႃးၼၼ်ႉၵေႃႈ ၵူၼ်းတိတ်းၸပ်းလႄႈလူႉတၢႆၼမ်။
ၼႂ်းၶၢဝ်းတၢင်း 3-4 လိူၼ်ၼႆႉ သိုၵ်းမၢၼ်ႈ ဢမ်ႇသႂ်ႇၸႂ်လွင်ႈၵူတ်ႇထတ်းတၢင်းပဵၼ်ၶူဝ်ႊဝိတ်ႉ 19 ။ ၵူႈၸႄႈဝဵင်းၼႂ်းၸိုင်ႈတႆး ၵူၼ်းတိတ်းၸပ်းတၢင်းပဵၼ်မီးယူႇၵူႈဝၼ်းသေတႃႉ တင်းမူတ်းမီးၵႃႈႁိုဝ် လူႉတၢႆၵႃႈႁိုဝ်ၼႆ သိုၵ်းမၢၼ်ႈဢမ်ႇပိုၼ်ၽၢဝ်ႇလႄႈဢမ်ႇလႆႈႁူႉ။
တၢင်းပဵၼ်ၶူဝ်ႊဝိတ်ႉ ၸိူဝ်ႉၽၼ်းဢူဝ်ႊမီႊၶရွၼ်ႊၼႆႉ ၸပ်းငၢႆႈ ၽႄႈလၢမ်းဝႆး၊ ၵူၺ်းၵႃႈပေႃးသမ်းၶဵမ်ၶူဝ်ႊဝိတ်ႉ 2 ၶဵမ်ယဝ်ႉတႄႉ ဢမ်ႇထိုင်တီႈလႆႈမႆႈၸႂ်၊ ၵူၺ်းၵႃႈၵေႃႈဢမ်ႇထုၵ်ႇလီယူႇမဝ်မၢင် မေႃယႃယိင်း ၾၢႆႇပၢႆးယူႇလီ တီႈႁူင်းယႃလူင်တူၼ်ႈတီး လၢတ်ႈၼင်ႇၼႆ။