ၵူၼ်းၼုမ်ႇတႆး ၼႂ်းၸႄႈဝဵင်းၵူတ်ႉၶၢႆ 3 ၵေႃႉ ၺႃးသိုၵ်းၶၢင် KIA ၶဝ်ႈတီႉၼႂ်းႁိူၼ်းသေ ဢဝ်ၵႂႃႇႁဵတ်းသိုၵ်း ၽူႈယႂ်ႇၵူၼ်းလူင် ပေႃႈမႄႈၵူၼ်းၼုမ်ႇ ၼႂ်းဝၢၼ်ႈၼႂ်းသူၼ် ၵႂႃႇတုၵ်းယွၼ်းၵေႃႈ ဢမ်ႇပႆႇပွႆႇပၼ်ၶိုၼ်း။
မိူဝ်ႈဝၼ်းတီႈ 11/2/2022 ယၢမ်းၵၢင်ၶိုၼ်းမွၵ်ႈ 9 မူင်း သိုၵ်းၶၢင် KIA ၶဝ်ႈတီႉၵူၼ်းၼုမ်ႇ ၵူၼ်းဝၢၼ်ႈၼႃးငူး ဢိူင်ႇယုမ်းမေႃး(ယုံးမောကျေးရွာအုပ်စု) ၸႄႈဝဵင်းၵူတ်ႉၶၢႆ 3 ၵေႃႉ၊ ဢဝ်ၵႂႃႇႁဵတ်းသိုၵ်းမႂ်ႇ။ ၽူႈယႂ်ႇၵူၼ်းလူင်လႄႈ ပေႃႈမႄႈၵူၼ်းၼုမ်ႇ ၵႂႃႇတုၵ်းယွၼ်း တီႈတပ်ႉၶၢင် ယုမ်းမေႃး ၵေႃႈ ပႆႇပွႆႇပၼ်ၶိုၼ်း။
ၵူၼ်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “သိုၵ်းၶၢင် ၶဝ်ႈတီႉၽႅဝ်ၼႂ်းႁိူၼ်း ၵမ်းလဵဝ်ဢေႃႈ။ ယူႇတီႈ ၽူႈယႂ်ႇၵူၼ်းလူင် ပေႃႈမႄႈၵူၼ်းၼုမ်ႇ ၵႂႃႇတုၵ်းယွၼ်းၶဝ်ၵေႃႈ ဢမ်ႇလႆႈၶႃႈ ၶဝ်ဝႃႈ ပဵၼ်ပိူင်ၵဵပ်း သိုၵ်းၶဝ်ၼႆဝႃႇ။ ယၢမ်းလဵဝ်ၵူၼ်းၼုမ်ႇတႆး 3 ၵေႃႉ ဢၼ်ထုၵ်ႇတီႉၺွပ်းၵႂႃႇၼၼ်ႉ မီးဝႆႉတီႈတပ်ႉသိုၵ်းၶၢင် တီႈယုမ်းမေႃး ၼၼ်ႉဝႆႉၶႃႈဢေႃႈ”- ဝႃႈၼႆ။
ဢိင်ၼိူဝ် လွင်ႈၼႆႉ တၢင်းငဝ်ႈငုၼ်း ၾၢႆႇသိုၵ်းၶၢင် KIA တႄႉ ပႆႇလႆႈႁူႉၶေႃႈမုလ်းႁူဝ်ယွႆႈမၼ်း ဝႃႈၼႆ။
ၸဝ်ႈသိုၵ်းလူင်ၼေႃႇပူႇ ၽူႈၶၢၼ်ပၢၵ်ႇ KIA လၢတ်ႈတီႈၽူႈတွႆႇႁွၵ်ႈဝႃႈ – “ၶေႃႈမုလ်းႁူဝ်ယွႆႈမၼ်းတႄႉ ႁဝ်းၶႃႈ ပႆႇလႆႈငိၼ်း။ လွင်ႈၼႆႉ တေပဵၼ်ၼႂ်းပိုၼ်ႉတီႈၵူၺ်း။ ယူႇတီႈႁဝ်းၶႃႈ ဢမ်ႇၵဵပ်းသိုၵ်း ဢၼ်ဝႃႈၼၼ်ႉ ဢမ်ႇဝႃႈၼင်ႇၵဝ်ႇ။ သင်ပဵၼ်လႆႈၵေႃႈ လႅပ်ႈတေပဵၼ်တၢင်းတႂ်ႈၵူၺ်း” – ဝႃႈၼႆ။
ၵူၼ်းၼုမ်ႇတႆး 3 ၵေႃႉ ဢၼ်ထုၵ်ႇတီႉၺွပ်းၵႂႃႇၼႆႉ တေႃႇထိုင်ယၢမ်းလဵဝ် မီးၶၢဝ်းတၢင်း 4 ဝၼ်း ပႃးမိူဝ်ႈၼႆႉ ပႆႇပွႆႇ တူဝ်မႃး။
ၵူၼ်းၼုမ်ႇ 3 ၵေႃႉၼၼ်ႉ ၸိုဝ်ႈၸၢႆးသၢင်ႇလႃႉ ဢႃယု 18 ပီ၊ ၸၢႆးသၢင်ႇလႅင်း ဢႃယု 16 ပီလႄႈ ၸၢႆးသၢင်ႇယေႃႉ ဢႃယု 18 ပီ ပဵၼ်ၵူၼ်း ဝၢၼ်ႈၼႃးငူး တင်းသၢမ်ၵေႃႉ။
ၼႂ်းၸႄႈဝဵင်းၵူတ်ႉၶၢႆ ၼႆႉ မီးသိုၵ်းၶၢင် KIA သိုၵ်းလွႆ TNLA သိုၵ်းၶႄႇၵဝ်ႈၵၢင်ႉ NMDAA ။ ၵူၼ်းၼုမ်ႇၼႂ်းပိုၼ်ႉ တီႈတႄႉ မုင်ႈမွင်းသိုၵ်းတႆး ႁွတ်ႈၽႅဝ် တူင်ႉၼိုင် ၵႅတ်ႇၵင်ႈသုၼ်ႇလႆႈၶိူဝ်းတႆး ၸိူဝ်းယူႇၼႂ်းၸႄႈဝဵင်းၵူတ်ႇၶၢႆယူႇ ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ