ပၢင်တိုၵ်းပဵၼ်ၼႂ်း ၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း မၢၵ်ႇလူင်/ မၢၵ်ႇၵွင်ႈ တူၵ်းသႂ်ႇ ၸွမ်းၵွင်းမူးဝိႁၢၼ် တီႈဝတ်ႉမႂ်ႇလူင်ငႄႉၸႅၼ်ႇ ၵူၼ်းမိူင်းတူၵ်းၸႂ် ပၢႆႈၽေးသိုၵ်းၵႂႃႇသွၼ်ႈတီႈၵျွင်းမုၼ်ၸဝ်ႈ။
ပၢင်တိုၵ်းၼႆႉတႄႇပဵၼ်မိူဝ်ႈဝၼ်းတီႈ 4/2/2022 ယၢမ်းႁူဝ်ၶမ်ႈ 5 မူင်းပၢႆ တေႃႇထိုင် 6 မူင်းၶိုင်ႈ ၼႂ်းၵႄႈဝတ်ႉမႂ်ႇလူင် ငႄႉၸႅၼ်ႇလႄႈ ဝၢၼ်ႈၼွင်ဝူဝ်း ၼႂ်းဢိူင်ႇၼွင်ဝူဝ်း ၸႄႈဝဵင်းလွၵ်ႉၸွၵ်ႇ ၸႄႈတွၼ်ႈတူၼ်ႈတီး မၢၵ်ႇ လူင်/ မၢၵ်ႇၵွင်ႈ တူၵ်းသႂ်ႇၸွမ်းၵွင်းမူးဝိႁၢၼ် လႆႈလူႉၵွႆၸွမ်းၵမ်ႈၽွင်ႈသေ ၵူၼ်းဝၢၼ်ႈ ဢွၼ်ၵၼ်ၽူင်ႉပၢႆႈမႃးသွၼ်ႈတီႈဝတ်ႉဝိႁၢၼ် ၵဝ်ႇ။
ၵူၼ်း ၼွင်ဝူဝ်း ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “တီႈဝၢၼ်ႈလႄႈ ဝတ်ႉမႂ်ႇလူင်ၼႆႉ တေယၢၼ်ၵၼ် မွၵ်ႈ 10 မိၼိတ်ႉၼႆႉ။ ၵူၼ်း ဝၢၼ်ႈဢွၼ်ၵၼ်ပၢႆႈမႃးၼွၼ်းတီႈ ဝိႁၢၼ်ၵဝ်ႇ ၶိုၼ်းၼိုင်ႈၶႃႈ ယွၼ်ႉပၢင်တိုၵ်းၼႆႉ”- ဝႃႈၼႆ။
မိူဝ်ႈၽွင်း ပဵၼ်ပၢင်တိုၵ်းၵၼ်ယူႇၼၼ်ႉ မၢၵ်ႇလူင် မႃးတူၵ်းတႅၵ်ႇ ၼႂ်းဝၢၼ်ႈၵေႃႈမီး ၊ မႃးတူၵ်းတႅၵ်ႇ တီႈႁိမ်း ဝိႁၢၼ်ၵဝ်ႇထႅင်ႈ။
“ၵူၺ်းၵႃႈ ဢမ်ႇမီးလွင်ႈတုမ်ႉတိူဝ်ႉၵူၼ်းမိူင်း မၢတ်ႇၸဵပ်း လူႉတၢႆသင်”- ၵူၼ်းၼွင်ဝူဝ်း သိုပ်ႇလၢတ်ႈၼႄၼင်ႇၼႆ။
မိူဝ်ႈၼႆႉ ဝၼ်းတီႈ 8 ယၢမ်းၵၢင်ၼႂ် မွၵ်ႈ 10 မူင်း သဵင်ၵွင်ႈတႅၵ်ႇထႅင်ႈတီႈႁိမ်းဢိူင်ႇၵျွၵ်ႉၵူႇ ၸႄႈဝဵင်းလွၵ်ႉၸွၵ်ႇၼႆႉၵေႃႈ ပဵၼ်ပၢင်တိုၵ်းၵၼ်ထႅင်ႈ ။
ၵူၼ်းပိုၼ်ႉတီႈ တၢင်းပွတ်းတွၼ်ႈၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ၸႂ်ႈၶႃႈဢေႃႈ မိူဝ်ႈၼႆႉ ယၢမ်းၵၢင်ၼႂ် မွၵ်ႈ 10 ၼႆႉ ပၢင်တိုၵ်းပဵၼ်ၵၼ်တီႈ တၢင်းႁိမ်းဝၢၼ်ႈဢိၼ်းတေႃႇလႄႈ ၵျွၵ်ႉၵူႇၼၼ်ႉၶႃႈ တေႁိုင်မွၵ်ႈ ၶိုင်ႈၸူဝ်ႈမူင်းၼႆႉ”- ဝႃႈၼႆ။
မိူဝ်ႈႁူဝ်လိူၼ်ၵျႅၼ်ႊၼိဝ်ႊရီႊ ပူၼ်ႉမႃးၼႆႉ ၵူၼ်းမိူင်းပိုၼ်ႉတီႈ ၸႄႈဝဵင်းၵျွၵ်ႉမႄး ႁူဝ်ၵူၼ်းမွၵ်ႈ 500 ဢွၼ်ၵၼ်ပၢႆႈၽေးသိုၵ်းမႃးသွၼ်ႈဝႆႉ တၢင်း ဢိူင်ႇၵဵင်းၶမ်း ၸႄႈဝဵင်းလွၵ်ႉၸွၵ်ႇၼႆႉ ယွၼ်ႉၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းမိူင်းတႆးၼင်ႇၵၼ် ပိုတ်းယိုဝ်းၵၼ် ႁၢဝ်ႈႁႅင်း။