မိူဝ်ႈၼႆႉ ဝၼ်းတီႈ 7/2/2022 ယၢမ်းၵၢင်ၼႂ် 7 မူင်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး SSPP/SSA ၸတ်းႁဵတ်း ပၢင်ၵႅဝ်ႈ ႁပ်ႉ ႁူမ်ၸူမ်းတွၼ်ႈ ပီၵွၼ်းသႅင် ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 75 ပီ တီႈႁူင်းႁဵၼ်းသိုၵ်း ငဝ်ႈငုၼ်းဝၢၼ်ႈႁႆး မီးၽူႈယႂ်ႇၵူၼ်းလူင်၊ လုၵ်ႈႁဵၼ်း၊ ၵူၼ်း ၼုမ်ႇ၊ ၸုမ်းၼၢင်းယိင်းလႄႈ ပေႃႈမႄႈၵူၼ်းမိူင်းၶဝ်ႈႁူမ်ႈတင်းမူတ်း 2,988 ၵေႃႉ။
ၵူၼ်းၼုမ်ႇ ၽူႈၶဝ်ႈႁူမ်ႈ ပၢင်ၵႅဝ်ႈ လၢတ်ႈတီႈၽူႈတွႆႇႁွၵ်ႈဝႃႈ – “ပီၼႆႉ ၸတ်းႁဵတ်းပၢင်ၵႅဝ်ႈ ၸိူင်ႉၼႆၵူၺ်းၶႃႈ ပၢင်ပွႆးတႄႉ ဢမ်ႇၸႂ်ႈၶႃႈ။ ၼႂ်းပၢင် ၵႅဝ်ႈၼႆႉ ၽူႈယႂ်ႇၵူၼ်းလူင် ဢုပ်ႇၶႆႈၼႄ ပိုၼ်းပဵၼ်မႃး ဝၼ်းၸိူဝ်ႉၸၢတ်ႈၸိုင်ႈတႆး ၶႃႈ”- ဝႃႈၼႆ။
ၼႂ်းပၢင်ၵႅဝ်ႈၼၼ်ႉ မွၵ်ႇထိုင် ၽူႈယႂ်ႇၵူၼ်းလူင်၊ ၵူႈတပ်ႉ/ ၵူႈႁွင်ႈၵၢၼ်လႄႈ ၵူၼ်းမိူင်း ၽူႈၶိုၼ်ႈႁွတ်ႈ ပၢင်ၵႅဝ်ႈ ဢဝ်တီႈယူႇ။ ႁူမ်ႈတၢင်ႇတုင်းၸိူဝ်ႉ ၸၢတ်ႈလႄႈ တၵ်ႉယမ်တုင်းၸိူဝ်ႉၸၢတ်ႈ။
ၸွမ်သိုၵ်းလူင်သိူဝ်ထႅၼ်ႈ ၽူႈၼမ်းၼႃႈထီႉ 1 SSPP/SSA မွၵ်ႇလၢတ်ႈၶေႃႈၵႂၢမ်းပိုတ်ႇပၢင်။ ၸွမ် သိုၵ်းၶုၼ်သႅင် ၵႅမ်ႁူဝ်ပဝ်ႈထီႉ 2 SSPP/SSA ၶူၼ်ႉၶႆႈၼႄပိုၼ်းဝၼ်းၸိူဝ်ႉၸၢတ်ႈၸိုင်ႈတႆး ။
မၢႆတွင်းဝၼ်းၸိူဝ်ႉၸၢတ်ႈၼႆႉသေ တႄႇဢဝ် ဝၼ်းတီႈ 1-6/2/2022 သမ်ႉ SSPP/SSA ၸတ်းႁဵတ်းပၢင်လႅၼ်ႈမၢၵ်ႇၼင်ၶႅင်ႇၵၼ် ။ မီးလုၵ်ႈႁဵၼ်းၼေႃႇတႅၼ်းၶိူဝ်း၊ ၸုမ်းၵူၼ်းၼုမ်ႇဝၢၼ်ႈႁႆး လုၵ်ႈႁဵၼ်းႁူင်းႁဵၼ်းသိုၵ်းငဝ်ႈငုၼ်း၊ လုၵ်ႈႁဵၼ်းႁူင်းႁဵၼ်းၽူႈမီး ၸၼ်ႉၸိူဝ်းၼႆႉ မႃးၶဝ်ႈႁူမ်ႈၶႅင်ႇလႅၼ်ႈၸွမ်းၵၼ်။
ဝၼ်းၸိူဝ်ႉၸၢတ်ႈၸိုင်ႈတႆး ၶွပ်ႈၶူပ်ႇ 74 ပီ ပီၵၢႆၼႆႉ ငဝ်ႈငုၼ်း ဝၢၼ်ႈႁႆး ဢမ်ႇလႆႈၸတ်းႁဵတ်းပၢင်ၵႅဝ်ႈ ယွၼ်ႉတၢင်းပဵၼ် ၶူဝ်ႊ ဝိတ်ႉ 19 ၽႄႈလၢမ်ႈႁႅင်း။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ