ၵူၼ်းၶၢႆၶူဝ်းၼႂ်းၵၢတ်ႇလူင် ဝဵင်းၼမ်ႉၶမ်း ယၢပ်ႇၽိုတ်ႇတႃႇသႂ်ႇၶွၼ်ႇပၼ်ၸုမ်းသိုၵ်း TNLA ဢၼ်မႃးၸႅၵ်ႇဝႂ်ၼႂ်ၵႆႈၼႆႉသေဢမ်ႇၵႃး မႆႈၸႂ်ပႃးလွင်ႈႁူမ်ႇလူမ်ႈၸဝ်ႈၵဝ်ႇ။
မိူဝ်ႈၼႆႉ ဝၼ်းတီႈ 4/2/2022 ယၢမ်းၵၢင်ၼႂ် မွၵ်ႈ 9 မူင်း သိုၵ်းတဢၢင်း TNLA ဢဵၼ်ႁႅင်း 50 ပၢႆ ပႃးၵွင်ႈၸေးမိုဝ်း ၶဝ်ႈဝဵင်းၼမ်ႉၶမ်းလွတ်ႈလွတ်ႈလႅဝ်းလႅဝ်း၊ ႁွၼ်ႈထဝ်ႇတဝ်ၵၢင်ဝဵင်းသေ ၶဝ်ႈၵႂႃႇၸႅၵ်ႇဝႂ်သႂ်ႇၶွၼ်ႇ ၼႂ်းၵၢတ်ႇၼမ်ႉၶမ်း၊ လၢတ်ႈၸဝ်ႈႁၢၼ်ႉဝႃႈ ႁႂ်ႈၵပ်းၾူၼ်းၸူးတီႈဢၼ်ပႃးၼႂ်းဝႂ်ၼၼ်ႉသေတွင်ႈထၢမ်ၵႃႈၶၼ်တႃႇသႂ်ႇၶွၼ်ႇ ဝႃႈၼႆ။
ၵူၼ်းၶၢႆၵၢတ်ႇ ၼမ်ႉၶမ်း လၢတ်ႈတီႈၽူႈတွႆႇႁွၵ်ႈဝႃႈ – “ဢၼ်ၶဝ်မႃးၸႅၵ်ႇဝႂ်ၵဵပ်းၶွၼ်ႇပၼ် ၵူၼ်းၶၢႆၵၢတ်ႇၼၼ်ႉ တေပဵၼ်ၼႂ်းၵၢတ်ႇ ပွတ်းတႂ်ႈၵၢတ်ႇ ၸိူဝ်းၼၼ်ႉ။ ငိုၼ်းတႄႉ ၶဝ်ဢမ်ႇၵဵပ်းၵႂႃႇၶႃႈ။ ႁႂ်ႈၵူၼ်းၶၢႆၵၢတ်ႇ ၵပ်းၸူးတီႈမၢႆၾူၼ်းၶဝ်ၼၼ်ႉသေ ႁႂ်ႈၵႂႃႇသႂ်ႇၶွၼ်ႇတီႈၶဝ်ၼႆဢေႃႈ ။ လွင်ႈၼႆႉၼၵ်းၸႂ် ႁဝ်းၶႃႈ ၵူၼ်းၶၢႆၵၢတ်ႇတႄႉ။ ၵႂႃႇၵေႃႈၵူဝ် ဢမ်ႇၵႂႃႇၵေႃႈၵူဝ် တႃႇလွင်ႈႁူမ်ႇလူမ်ႈႁဝ်းတႄႉ”- ဝႃႈၼႆ။
ဢိင်ၼိူဝ် လွင်ႈၼႆႉ ၵူၼ်းၶၢႆၵၢတ်ႇလူင် ၼႂ်းဝဵင်းၼမ်ႉၶမ်း တႃႇ 3 ပုၼ်ႉ 2 ပုၼ်ႈတႄႉ သႂၢင်းပၼ်ယဝ်ႉ ၵိုတ်းမွၵ်ႈ 1 ပုၼ်ႈၼႆႉတႄႉ ပႆႇသႂၢင်း ၵမ်ႈၼမ် ပဵၼ်တၢင်းၼႂ်းၵၢတ်ႇ ပွတ်းတၢင်းတႂ်ႈၵၢတ်ႇ ၸိူဝ်းၼၼ်ႉ။
“ၸုမ်းဢၼ်မႃးပၼ်ဝႂ် မိူဝ်ႈၵႆႈၼႆႉ ၶဝ်ဢမ်ႇႁူႉဝႃႈ ၵူၼ်းၶၢႆၵၢတ်ႇၼႆႉ ၽႂ်သႂ်ႇၶွၼ်ႇယဝ်ႉ ဢမ်ႇသႂ်ႇၸိူဝ်းၼႆႉ ၶဝ်ႁူႉဝႃႈ တၢင်းပွတ်းတႂ်ႈၵၢတ်ႇ ပႆႇသႂ်ႇၼႆ ၵေႃႈ မႃးၸႅၵ်ႇဝႂ်ၶွၼ်ႇၶဝ်တၢင်းသၢႆၼၼ်ႉ။ ၵူၼ်းၵဵပ်းၶွၼ်ႇၶဝ် ဢၼ်ႁူႉဝႃႈၽႂ်သႂ်ႇဢမ်ႇသႂ်ႇၼၼ်ႉသမ်ႉ ထုၵ်ႇယိုဝ်းတၢႆ မိူဝ်ႈဝၼ်းတီႈ 4 လိူၼ်ပူၼ်ႉမႃးၼၼ်ႉၼႃႇ ။ၼၼ်ႉတႄႉ ႁူႉဢေႃႈ ၽႂ်သႂ်ႇပႆႇသႂ်ႇ ဢၼ်ဝႃႈၼၼ်ႉ”- ၵူၼ်းၶၢႆၵၢတ်ႇ ၼမ်ႉၶမ်းသိုပ်ႇလၢတ်ႈၼႄၼင်ႇၼႆ။
ၸဝ်ႈႁၢၼ်ႉဢၼ်ထဵင်ၶိုၼ်းဝႃႈ ယၢမ်ႈလႆႈသႂ်ႇယဝ်ႉလႄႈ ႁႂ်ႈလွတ်ႈၵၢင်းပၼ် ၼႆၼၼ်ႉၵေႃႈဢမ်ႇလႆႈ ။ တိုၼ်းတေလႆႈသႂ်ႇထႅင်ႈ ဝႃႈၼႆ။
သိုၵ်းတဢၢင်း ၶဝ်ႈဝဵင်း မႃးဝႅတ်ႉ ၵၢတ်ႇသေ မႃးၸႅၵ်ႇဝႂ်ၵဵပ်းၶွၼ်ႇၼၼ်ႉႁိုင် မွၵ်ႈၶိုင်ႈၸူဝ်ႈမူင်းၵူၺ်းသေ ၶဝ်ၶိုၼ်း ၼႅတ်ႈဢွၼ်ၵၼ် ဢွၵ်ႇဝဵင်းၵႂႃႇ။ ၸွမ်းတၢင်းလူင် တၢင်းပွၵ်ႉၵွင်းၼွင်ၸၢင်ႉၼၼ်ႉ ၸိူဝ်းၼၼ်ႉၵေႃႈ မီးရူတ်ႉၵႃးသိုၵ်းၶဝ်မႃးပႂ်ႉဝႆႉသမ်ႉပေႃးတဵမ် ၵူၼ်းပိုၼ်ႉတီႈၼမ်ႉၶမ်းလၢတ်ႈ။
တၢင်းၶဝ်ႈ တၢင်းဢွၵ်ႇဝဵင်းၼမ်ႉၶမ်းၼႆႉ မီးတပ်ႉသိုၵ်းမၢၼ်ႈ၊ ပလိၵ်ႈမၢၼ်ႈ ပႂ်ႉဝႆႉၵူႈၾၢႆႇ။ ဢၼ်သိုၵ်းတဢၢင်းဢဝ်ရူတ်ႉၶဝ်မႃးၵိုတ်းၸွတ်ႇၼၼ်ႉၵေႃႈပဵၼ်တီႈႁိမ်းတပ်ႉပလိၵ်ႈ မၢၼ်ႈၵူၺ်း။ ၵူၺ်းၵႃႈ ဢၼ်ၵူၼ်းသိုၵ်းၶဝ်ပႃးၵွင်ႈၸေးမိုဝ်းသေၶဝ်ႈဝဵင်းမႃးလႆႈလွတ်ႈလႅဝ်းၼႆႉ မိူၼ်ၶဝ်ႁူႉၵၼ် ပွင်ႇၸူးၵၼ်ဝႆႉယဝ်ႉ – ဝႃႈၼႆ။
