မိူဝ်ႈၼႆႉ ဝၼ်းတီႈ 4/2/2022 ယၢမ်းၵၢင်ၼႂ် 9 မူင်း သိုၵ်းတဢၢင်း TNLA ၶီႇရူတ်ႉၵႃးၶဝ်ႈဝဵင်းမႃးလၢႆလၢႆလမ်း ဝႅတ်ႉၵၢတ်ႇၼမ်ႉၶမ်း ၶဝ်ႈၸႅၵ်ႇဝႂ်ၵဵပ်းၶွၼ်ႇၼႂ်းၵၢတ်ႇ ၵူၼ်းၼမ်ႉၶမ်းတူၵ်းၸႂ်တိုၼ်ႇသၢၼ်ႈဢွၼ်ၵၼ်ပွၵ်ႈႁိူၼ်း။
ၵူၼ်းၼမ်ႉၶမ်း ယူႇႁိမ်းၵၢတ်ႇၵေႃႉၼိုင်ႈလၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၼႆႉ ၵၢင်ၼႂ်မွၵ်ႈ 9 မူင်း သိုၵ်းတဢၢင်း ၶဝ်ႈဝဵင်းၼမ်ႉၶမ်းဢေႃႈ။ ၶဝ်ၶဝ်ႈမႃးၵူႈႁူးၵူႈတၢင်းဢေႃႈ။ ၵူၼ်းၶဝ်ၼမ်ၼႃႇၶႃႈ။ ဢွၼ်ၵၼ်ၵႂႃႇဝႅတ်ႉၵၢတ်ႇဝႆႉဢေႃႈ။ ၵူၼ်းၶဝ်ၸႅၵ်ႇဝႂ်ၵဵပ်းၶွၼ်ႇပၼ်ၵူႈႁၢၼ်ႉဢေႃႈ။ၵူၼ်းၼႂ်းၵၢတ်ႇၵေႃႈတူၵ်းၸႂ်ၼႅတ်ႈပိၵ်ႉၽၵ်းတူႁၢၼ်ႉၶၢႆၶူဝ်း ၶႃႈဢေႃႈ”- ဝႃႈၼႆ။
ၵူၼ်းသိုၵ်း TNLA ၵမ်ႈၽွင်ႈၵေႃႈ ပၼ်ႇၸွမ်းၵၢင်ဝဵင်းၼမ်ႉၶမ်း။ ဢၼ်တိုၵ်ႉပႂ်ႉဝႆႉၼွၵ်ႈဝဵင်း ၸွမ်းလွႆၸိူဝ်းၼၼ်ႉၵေႃႈမီးတင်းၼမ်။ တေႃႇထိုင်ၶၢဝ်းယၢမ်း 10 မူင်းၶိုင်ႈၵၢင်ၼႂ်ၼႆႉ သိုၵ်းတဢၢင်းယင်းပႆႇဢွၵ်ႇမိူဝ်းၶိုၼ်း ဝႃႈၼႆ။
ၾၢႆႇၼိုင်ႈလိူၼ်ပူၼ်ႉမႃးဝၼ်းတီႈ 4 သိုၵ်းတဢၢင်း ဢၼ်မႃးၵဵပ်းၶွၼ်ႇၼႂ်းၵၢတ်ႇၼမ်ႉၶမ်း 2 ၵေႃႉၺႃးယိုဝ်းတၢႆ။ ဝၢႆးၼၼ်ႉထႅင်ႈဝၼ်းၼိုင်ႈ သိုၵ်းတဢၢင်းလႄႈသိုၵ်းမၢၼ်ႈပဵၼ်ပၢင်တိုၵ်းၵၼ်တီႈဝဵင်းၼမ်ႉၶမ်း။ မိူဝ်ႈၼႆႉပဵၼ်ဝၼ်း 1 လိူၼ်တဵမ်တဵမ်။ သိုၵ်းတဢၢင်းၶိုၼ်းၶဝ်ႈမႃးပဵၼ်ၾုင်ပဵၼ်ၵႄလႄႈ ႁဵတ်းႁႂ်ႈၵူၼ်းမိူင်းတူၵ်းၸႂ်။
တၢင်းၶဝ်ႈဝဵင်းၼမ်ႉၶမ်းၵေႃႈ မီးတပ်ႉသိုၵ်းမၢၼ်ႈ၊ မီးတပ်ႉပလိၵ်ႈယူႇသေတႃႉ သိုၵ်းတဢၢင်း TNLA ဢဝ်ဢဵၼ်ႁႅင်း ၶဝ်ႈတဝ်ဝဵင်းၼမ်ႉၶမ်လႆႈလွတ်ႈလႅဝ်း။ သမ်ႉပၢႆမႃးၵဵပ်းၶွၼ်ႇထိုင်ၼႂ်းၵၢတ်ႇထႅင်ႈလႄႈ ႁဵတ်းႁႂ်ႈၵူၼ်းမိူင်းဢမ်ႇမီးလွင်ႈႁူမ်ႇလူမ်ႈ။