ၵူၼ်းပၢႆႈၽေးသိုၵ်း တီႈဝတ်ႉၵၢင်ႉမေႃႇ သီႇပေႃႉ ႁူဝ်ၵူၼ်း 400 ပၢႆၼၼ်ႉ မႆႈၸႂ်ႁိူၼ်းယေး ၸဝ်ႈၵဝ်ႇတၢင်းၼွင်ႈ တၢင်းလင်လႄႈ မိူဝ်ႈၼႆႉဢွၼ်ၵၼ် ပွၵ်ႈၶိုၼ်း ႁိူၼ်းယေး ၵမ်ႈပႃႈၼမ်ယဝ်ႉဝႃႈၼႆ ။
ၼႂ်းဝၼ်းတီႈ 29 တင်း 31 လိူၼ်ၵျႅၼ်ႊၼိဝ်ႊရီႊ 2022 ၼႆႉ ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉ တီႈဝတ်ႉၵၢင်ႉမေႃႇ ၸႄႈဝဵင်းသီႇပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ ႁူဝ်ၵူၼ်း 400 ပၢႆၼၼ်ႉ ယူႇတီႈပူႇၵၢင်ႉ/ ပူႇႁဵင် ၶိုၼ်းမႃးႁွင်ႉပွၵ်ႈမိူဝ်းၶိုၼ်းႁိူၼ်းယေး။ ၸုမ်းယိပ်းၵွင်ႈ တိုၵ်ႉမီးယူႇ ၼႂ်းဝၢၼ်ႈသေ တႃႉ မႆႈၸႂ်ႁိူၼ်းယေး လႄႈ ၵမ်ႈၼမ် ဢွၼ်ၵၼ်ပွၵ်ႈဝၢၼ်ႈၶိုၼ်း။
ၵူၼ်းပၢႆႈၽေးသိုၵ်း ဢၼ်ပၢႆႈမႃးသွၼ်ႈဝႆႉတီႈဝတ်ႉၵၢင်ႉမေႃႉ လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းဝၢၼ်ႈတႄႉ ပႆႇၶႂ်ႈမိူဝ်းၼင်ႇၵဝ်ႇ တိုၵ်ႉၵူဝ်ယူႇ။ ၵူၺ်းၵႃႈ ပူႇၵၢင်ႉ သမ်ႉမႃးၸူဝ်းၶဝ်၊ မႆႈၸႂ်ယူႇသေတႃႉ သမ်ႉၸႂ်တိတ်းႁိူၼ်းလႄႈ မိူဝ်ႈဝၼ်းတီႈ 29 ၼၼ်ႉ ပွၵ်ႈမိူဝ်း မွၵ်ႈ 300 ဝၼ်းတီႈ 31 ၼႆႉသမ်ႉ ပွၵ်ႈမိူဝ်း 100 ပၢႆ”– ဝႃႈၼႆ။
ယၢမ်းလဵဝ် ၸွမ်းၼႂ်းမူႇဝၢၼ်ႈ တိုၵ်ႉမီးၸုမ်းယိပ်းၵွင်ႈၵၢင်ႇ ၸၢဝ်းၶိူဝ်းတူင်ႉၼိုင်ယူႇဝႆႉ။ ၵူၼ်းပၢႆႈၽေးသိုၵ်း တၢင်းပွၵ်ႈ တၢင်းၵူဝ် ဝႃႈၼႆ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း လၢတ်ႈတီႈၽူႈတွႆႇႁွၵ်ႈဝႃႈ – “ႁဝ်းၶႃႈ မႆႈၸႂ်ၵူၼ်းပၢႆႈၽေး ၶႃႈဢေႃႈ ငဝ်းလၢႆးၼႂ်းပိုၼ်ႉတီႈ ၵေႃႈပႆႇယဵၼ်တႄႉတႄႉလႄႈ ၵူဝ်ၶဝ်လႆႈပၢႆႈမႃးၶိုၼ်းထႅင်ႈပွၵ်ႈၵမ်း 2 ၵူၺ်းဢေႃႈ”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ပၢႆႈဢွၵ်ႇမႃးသွၼ်ႈဝႆႉတီႈဝတ်ႉၵၢင်ႉမေႃႉၼႆႉ ပဵၼ်ၵူၼ်းဝၢၼ်ႈ ၼႂ်းဢိူင်ႇၼမ်ႉသိမ်ႇ၊ ဢိူင်ႇၼႃးမူၼ်း လႄႈ ဢိူင်ႇၼမ်ႉဢုၼ်ႇ (ၵုင်းၼိဝ်ႉ) ၸိူဝ်းၼႆႉ လႆႈပၢႆႈ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ