ၵူၼ်းမိူင်းၼႂ်း ၸႄႈဝဵင်းသီႇပေႃႉ ဢွၼ်ၵၼ်ၵႂႃႇမႃးတူင်ႉၼိုင်ၶိုၼ်းမိူၼ်ၵဝ်ႇ ဢမ်ႇပေႃးသႂ်ႇၸႂ်ၼိူဝ်လွင်ႈႁႄႉၵင်ႈ တၢင်းပဵၼ်ၶူဝ်ႊဝိတ်ႉ 19 ၵူၼ်းၼုမ်ႇၵမ်ႈၽွင်ႈလၵ်ႉလွမ်မႆႈၸႂ် ၵူဝ်ၸိူဝ်ႉမႅင်းတၢင်းပဵၼ် ၽႄႈလၢမ်းႁၢဝ်ႈႁႅင်းၶိုၼ်း။
ၵူၼ်းၼုမ်ႇ ၽူႈတူင်ႉၼိုင် ၼႂ်းတူင်ႇဝူင်းတႆး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ယၢမ်းလဵဝ် တီႈသီႇပေႃႉၼႆႉ ဢွၼ် ၵၼ်ယူႇၵႂႃႇၶိုၼ်းမိူၼ်ၵဝ်ႇ ယဝ်ႉ ဢမ်ႇသႂ်ႇၽႃႈတူမ်းသူပ်းသင်။ ဢမ်ႇမီးဢီႈသင်ႁႄႉႁၢမ်ႈယဝ်ႉ။ မိူၼ်ဢမ်ႇမီး တၢင်း ပဵၼ်သင်၊ ဢမ်ႇၵူဝ်သင်ၵႂႃႇၸိူင်ႉၼၼ်ယဝ်ႉ။ ၵူၺ်းၵႃႈ လီမႆႈၸႂ်ယူႇ တၢင်ႇဝဵင်းတၢင်ႇမိူင်းၵေႃႈ ပိူၼ်ႈတိုၵ်ႉ ပဵၼ် ၵၼ်ႁၢဝ်ႈႁႅင်းယူႇလႄႈ သင်ပဵၼ်လႆႈတႄႉ ႁႂ်ႈဢွၼ်ၵၼ်သႂ်ႇၽႃႇတူမ်းသူပ်း ႁႄႉ ၵင်ႈတၢင်းပဵၼ် ၵၼ်ၽွင်ႈဢေႃႈ ယႃႇယူႇမဝ်မၢင်ၵၼ်ႁႅင်းၼႃႇၽႅဝ် ၼင်ႇႁိုဝ် တေဢမ်ႇပဵၼ်မႃးႁၢဝ်ႈႁႅင်းထႅင်ႈၼၼ်ႉ”- ဝႃၼႆ။
တၢင်းပဵၼ်ၶူဝ်ႊဝိတ်ႉ 19 ပွၵ်ႈၵမ်းသၢမ် ၼႂ်းၸႄႈဝဵင်းသီႇပေႃႉ ဢၼ်ပဵၼ်ပူၼ်ႉမႃးႁၢဝ်ႈႁႅင်းၼႆႉ မၢင်ႁိူၼ်း၊ မၢင်ဝၢၼ်ႈ ပဵၼ်တၢင်းႁိူၼ်းယေး တၢင်းဝၢၼ်ႈ ၸိူဝ်းၼႆႉၵေႃႈ ယၢမ်ႈမီးမႃး။ ၵျွၵ်ႉမႄး သီႇပေႃႉ လႃႈသဵဝ်ႈၸိူဝ်းၼႆႉ မီးၶၢဝ်ႇဝႃႈ ၵူၼ်းၸပ်းတၢင်းပဵၼ်ၶူဝ်ႇဝိတ်ႉ လူႉတၢႆၼမ်လိူဝ်ပိူၼ်ႈၼႂ်းၸိုင်ႈတႆး။ ယၢမ်းလဵဝ် တၢင်းပဵၼ်ၶူဝ်ႊဝိတ်ႉ 19 လူတ်းယွမ်းလူင်းယဝ်ႉဝႆႉၼႆသေတႃႉၵေႃႈ တေပႆႇတမ်းၸႂ်လႆႈတင်းမူတ်း ။ ၾၢႆႇၼိုင်ႈၵူၼ်းပၢႆႈၽေးသိုၵ်းၵေႃႈတိုၵ်ႉၶၢင်ႉၶမ် မီးဝႆႉၼႂ်းဝဵင်းဢမ်ႇယွမ်း 500 ၵေႃႉ။ လီမႆႈၸႂ်ပၼ်ပႃးတႃႇပၢႆးယူႇလီၶဝ် ၵူၼ်းသီႇပေႃႉလၢတ်ႈၼင်ႇၼႆ။
“ၵမ်ႈၼမ် တေဢွၼ်ၵၼ်ပွင်ႇၸႂ်ဝႃႈ ယၢမ်းလဵဝ် ပဵၼ်ၶၢဝ်းၵတ်း ပဵၼ်ဢႆ ပဵၼ်ၼၢဝ် ၶေႃးၸဵပ်း ၸိူဝ်းၼႆႉ မိူၼ်ယၢမ်ႈပဵၼ် မႃးၵူႈပွၵ်ႈၼၼ်ႉၵူၺ်းလႄႈ ဢွၼ်ၵၼ်ယူႇမဝ်မၢင်ၵၼ်မႃး ။ ၵွပ်ႈၼႆ ပဵၼ်သင်မႃးၵေႃႈ ႁႂ်ႈဢွၼ်ၵႅတ်ႇၶႄႁႄႉၵင်ႈ တၢင်းပဵၼ်ၵၼ် ႁႂ်ႈသႂ်ႇၸႂ်တၢင်း ပဵၼ်ၼႆႉ ဝႆႉပဵၼ်ပိူင်လမ်ႇလွင်ႈၽွင်ႈ ” ၵူၼ်းၼုမ်ႇ ၼႂ်းတူင်ႇဝူင်းတႆး သိုပ်ႇလၢတ်ႈတိုၵ်းသူၼ်း ၼႄၼင်ႇၼႆ။
တၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈဝဵင်းသီႇပေႃႉ ပွၵ်ႈၵမ်းသၢမ်ၼႆႉ တင်းမူတ်းမီးၵူၼ်းၸပ်းတၢင်းပဵၼ် မီးလၢႆၵေႃႉ တၢႆလၢႆၵေႃႈ ၸိူဝ်းၼႆႉ ၾၢႆႇသိုၵ်းမၢၼ်ႈ သင်ႇႁၢမ်ႈပိုၼ်ၽႄႈၶေႃႈမုၼ်းပဵၼ်တၢင်းၵၢၼ်လႄႈ တေႃႇထိုင်ယၢမ်းလဵဝ် ဢမ်ႇလႆႈႁူႉႁူဝ်ႁုပ်ႈတႅတ်ႈတေႃး ။ ၵူၺ်းၵႃႈၽူႈၸွႆႈထႅမ် ၸုမ်းပရႁိတ သီႇပေႃႉလၢတ်ႈဝႃႈ ယၢမ်းလဵဝ်တႄႉၵူၼ်းၸပ်းတၢင်းပဵၼ်လူတ်းယွမ်းလူင်းယဝ်ႉဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ