ဝၼ်းတီႈ 23/1/2022 ပူၼ်ႉမႃးၼႆႉ ၼၢင်းယိင်းၵေႃႉၼိုင်ႈ ဢႃယု 28 ပီ ၺႃးၶႃႈႁႅမ်တၢႆ ဝႆႉၼိူဝ်ၵႃး တီႈႁိမ်းဝၢၼ်ႈၼိမ် ဢိူင်ႇႁႃႈဝၢၼ်ႈ ၸႄႈဝဵင်းၵေးသီး ယၢၼ်ၵႆဝဵင်းမွၵ်ႈ 1 လၵ်း ။
ၵေႃႉပဵၼ်မႄႈ ၵေႃႉၺႃးၶႃႈႁႅမ်တၢႆၼၼ်ႉ လၢတ်ႈတီႈၽူႈတွႆႇႁွၵ်ႈဝႃႈ – “ႁဵတ်းသင်လႄႈ ထုၵ်ႇၶႃႈႁႅမ်တၢႆ ဢၼ်ဝႃႈၼၼ်ႉ ပႆႇလႆႈ ႁူႉလွင်ႈတၢင်းမၼ်း။ မိူဝ်ႈၽွင်းႁဝ်းၶႃႈၵႂႃႇၽႅဝ်တီႈၼၼ်ႈၵေႃႈ မၼ်းၼၢင်းပေႃးတၢႆဝႆႉယဝ်ႉ။ ထုၵ်ႇပၢတ်ႇၶေႃးၶႃႈႁႅမ်တၢႆဝႆႉၼိူဝ်ၵႃး။ ယွၼ်ႉသင် ၵွပ်ႈ သင်လႄႈ ထိုင်တီႈပေႃးလႆႈၶႃႈႁႅမ်ၵၼ်တၢႆၸိူင်ႉၼႆၼႆႉ ဢမ်ႇလႆႈႁူႉလွင်ႈတၢင်းမၼ်းၶႃႈ”- ဝႃႈၼႆ။
ၵူၼ်းႁၢႆႉဢၼ်မႃးၶႃႈႁႅမ် တၢႆမၼ်းၼၢင်းၼၼ်ႉ ပဵၼ်ၽႂ်လုၵ်ႉလႂ်မႃး ၶႃႈႁႅမ်တၢႆယွၼ်ႉသင် ယင်းပႆႇႁူႉ။
ၵူၼ်း ၵေးသီး ၵေႃႉၼိုင်ႈ လၢတ်ႈတီႈၽူႈတွႆႇႁွၵ်ႈဝႃႈ – “ တိူင်ႇ လၢတ်ႈတီႈပလိၵ်ႈမၢၼ်ႈၵေႃႈ ဢမ်ႇႁဵတ်းသင်ပၼ်လႆႈ။ ၶဝ်မႃးတူၺ်းတူဝ်တၢႆ ၵူၺ်း ဢမ်ႇၵူတ်ႇထတ်းသင်ပၼ်။ ”- ဝႃႈၼႆ။
ပေႃႈမႄႈပီႈၼွင်ႉၵေႃႉၺႃးၶႃႈႁႅမ်တၢႆတႄႉ ၶႂ်ႈလႆႈလွင်ႈပဵၼ်ထမ်း။ ႁႂ်ႈတီႉၵေႃႉႁဵတ်းၽိတ်းၼၼ်ႉပၼ်ႁႂ်ႈလႆႈ၊ ႁႂ်ႈလႆႈႁူႉလွင်ႈႁူႉတၢင်းမၼ်းလီလီ တုၵ်းယွၼ်းလၢတ်ႈၼင်ႇၼႆ။
