ၾၢႆႇပၢႆးယူႇလီ ပႂ်ႉၵူတ်ႇထတ်းတၢင်းပဵၼ်ပၼ်ၵူၼ်းဝၢၼ်ႈၵူၼ်းမိူင်း ၸိူဝ်းၵႂႃႇမႃးၸွမ်းသဵၼ်ႈတၢင်းလႄႈ လၢႆလၢႆတီႈၼႂ်းဝဵင်းၵဵင်းတုင် ဢမ်ႇႁၼ်ၵူၼ်းၸပ်းၶူဝ်ႊဝိတ်ႉမႂ်ႇ လႆႈ ဝူင်ႈၼိုင်ႈယဝ်ႉ ဝႃႈၼႆ။
တႄႇဢဝ် ဝၼ်းတီႈ 17-21/1/2022 ၶၢဝ်းတၢင်း 4 – 5 ဝၼ်းမႃးၼႆႉ ၼႂ်းၸႄႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း ဢမ်ႇမီးၵူၼ်းပဵၼ်ၶူဝ်ႊဝိတ်ႉမႂ်ႇ၊ ၸိူဝ်းၸပ်းၶူဝ်ႊဝိတ်ႉသေ ငဝ်းလၢႆးဢမ်ႇပေႃးႁၢႆႉႁႅင်းၵေႃႈ ယူႇႁိူၼ်းႁၵ်ႉသႃတူဝ်၊ ႁွင်ႉမေႃယႃ မႃးသမ်းၶဵမ်ပၼ်တီႈႁိူၼ်းလႆႈပဵၼ်တၢင်းၵၢၼ်ယဝ်ႉ ၵူၼ်းၼုမ်ႇၵဵင်းတုင်ၵေႃႉၼိုင်ႈလၢတ်ႈၼင်ႇၼႆ။
“တီႈၵဵင်းတုင်တႄႉ တေလႆႈဝႃႈ ၵူၼ်းၸပ်းတၢင်းပဵၼ်လူတ်းယွမ်းလူင်းမႃးတႄႉတႄႉၶႃႈဢေႃႈ။ ဢမ်ႇထူပ်းႁၼ် ၵူၼ်းတိတ်းၸပ်း မီးသၢမ်သီႇဝၼ်းၼႆႉယဝ်ႉ။ ၵူၺ်းၵႃႈ ႁၢႆမူတ်းယဝ်ႉ ၼႆၵေႃႈ ဢမ်ႇၸႂ်ႈၼင်ႇၵဝ်ႇ။ မၢင်ၵေႃႉ ႁူႉတူဝ်ဝႃႈပဵၼ် ဢမ်ႇယူႇလီၼႆၵေႃႈ ႁၵ်ႉသႃၵုမ်း တူဝ်ယူႇဝႆႉတီႈႁိူၼ်းၵမ်းလဵဝ်။ ႁွင်ႉမေႃယႃၵႂႃႇတူၺ်းပၼ် ယူတ်းယႃပၼ်တီႈႁိူၼ်းလႆႈၵမ်းသိုဝ်ႈ ။ မိူဝ်ႈဢွၼ်တၢင်းဢမ်ႇလႆႈၶႃႈ။ ၵမ်းၼႆႉတႄႉ ၶဝ်ႈပဵၼ်တၢင်းၵၢၼ်ယဝ်ႉ။ ၵူၺ်းၵႃႈ တေလႆႈသဵင်ႈငိုၼ်း ပၼ် ၵႃႈယူတ်းယႃ တႃႇၼိုင်ႈၵေႃႉ တီႈတႅမ်ႇသုတ်း 6 မိုၼ်ႇတေႃႇဝၼ်း”- ၵူၼ်းၼုမ်ႇ ၵဵင်းတုင် လၢတ်ႈၼႄၼင်ႇၼႆ။
ၵူၺ်းၵႃႈ မိူဝ်ႈဝူင်ႈပူၼ်ႉမႃး ၾၢႆႇဢႅဝ်ႇယဵမ်ႈတွင်ႈတဵဝ်းတိုၵ်ႉၸတ်းႁဵတ်းပွႆးမွၵ်ႇၵွၼ် တီႈလွႆမူၺ် ယဝ်ႉၵူၺ်းလႄႈ သင်ဝႃႈၵူၼ်းမိူင်းၵဵင်းတုင် ယူႇမဝ်ၵိၼ်မၢင်တႄႉ ၸၢင်ႈတိတ်းၸပ်းၵၼ်လႆႈၶိုၼ်းယူႇ – ထဝ်ႈဝၢၼ်ႈထဝ်ႈၼႃး ၵူၼ်းၵဵင်းတုင်ၵေႃႉၼိုင်ႈလၢတ်ႈၼင်ႇၼႆ။
ၼႂ်းၸႄႈဝဵင်းၵဵင်းတုင်ၼႆႉ တႄႇဢဝ် ဝၼ်းတီႈ 29/6/2021 မႃး တေႃႇထိုင် ဝၼ်းတီႈ 20/1/2022 ၼႆႉ ၵူတ်ႇထတ်းႁၼ် ၵူၼ်းတိတ်းၸပ်းၸိူဝ်ႉ မႅင်းၶူဝ်ႊဝိတ်ႉ 19 တင်းမူတ်းမီးၵႂႃႇ 6,543 ၵေႃႉ၊ ယႃၶႅၼ်း 5,575 ၵေႃႉ၊ လူႉတၢႆ 92 ၵေႃႉလႄႈ တိုၵ်ႉယူတ်းယႃဝႆႉ 10 ၵေႃႉ သိုဝ်ႇၶၢဝ်ႇၼႂ်း ပိုၼ်ႉ တီႈ ၵဵင်းတုင် ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ