ၵူၼ်းပၢႆႈၽေးသိုၵ်း တီႈၸႄႈဝဵင်းသီႇပေႃႉ ဢၼ်မႃးမီးတီႈၵျွင်းၽြႃးၵၢင်ႉမေႃႇၼၼ်ႉ မႆႈၸႂ်ႁိူၼ်းယေးသူၼ်ႁႆႈၼႃးလႄႈ ဢွၼ်ၵၼ်ပွၵ်ႈၶိုၼ်းၽွင်ႈယဝ်ႈ ။
ဝၼ်းတီႈ 19/1/2022 ၵူၼ်းဝၢၼ်ႈၼမ်ႉသိမ်ႇ၊ ပုင်ႇၽၼ်း၊ သူၼ်ဢွႆႈ ဢၼ်ပၢႆႈၽေးသိုၵ်းမႃးသွၼ်ႈဝႆႉ တီႈဝတ်ႉၵၢင်ႉမေႃႇ ၸႄႈဝဵင်းသီႇ ပေႃႉ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇၼၼ်ႉ ဢွၼ်ၵၼ်ပွၵ်ႈၶိုၼ်း ႁိူၼ်းယေးၽႂ်မၼ်းယဝ်ႉ ယွၼ်ႉမႆႈၸႂ် ႁိူၼ်းယေး သူၼ်ႁႆႈၼႃးၵၼ် ၼႆ ယဝ်ႉ။
ၽူႈၸွႆႈထႅမ် ၵူၼ်းပၢႆႈၽေးသိုၵ်း ၸႄႈဝဵင်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃးတႄႉ ၵူၼ်းဝၢၼ်ႈၼမ်ႉသိမ်ႇ သူၼ်ဢွႆႈ ပုင်ႇၽၼ်း ၸိူဝ်း ၼႆႉတႄႉ မိူဝ်းၽွင်ႈယဝ်ႉ။ ၵိုတ်းၼမ်ႉဢုၼ်ႇၵုင်းၼိဝ်ႉ ၸိူဝ်းၼႆႉတႄႉ ပႆႇၸၢင်ႈမိူဝ်း ပိုၼ်ႈတီႈၼၼ်ႈသမ်ႉ မၼ်းပဵၼ်တီႈဢၼ်သိုၵ်းၶဝ် ၶဵင်ႈၶႅင်ၵၼ်ဝႆႉ ပဵၼ်တီႈလႅၼ်ၶႅၼ်ႈ သီႇပေႃႉ – ၵျွၵ်ႉမႄး ၸပ်းၵၼ်”- ဝႃႈၼႆ။
ပၢင်တိုၵ်းၼႂ်းၵႄႈ RCSS လႄႈ SSPP ပဵၼ်ႁႅင်းႁိမ်းဝၢၼ်ႈဢိူင်ႇတီႈလႅၼ်ၶႅၼ်ႈ သီႇပေႃႉ ၵျွၵ်ႉမႄး ၊ ၵူၼ်းမိူင်းပၢႆႈၽေးသိုၵ်းမႃးသီႇပေႃႉၸဵမ်မိူဝ်ႈႁူဝ်လိူၼ်ၵျႅၼ်ႊၼိဝ်ႊရီႊၼႆႉ။
ဝၼ်းတီႈ 19 ယၢမ်းၵၢင်ၼႂ် သိုၵ်း RCSS တင်း ၸုမ်းဢူၺ်းလီပွတ်းႁွင်ႇ ပဵၼ်ပၢင်တိုၵ်းၵၼ်ထႅင်ႈ ၼႂ်းထုင်ႉၼမ်ႉသိမ်ႇ ၵႄႈၵၢင် သီႇပေႃႉ – ၵျွၵ်ႉမႄး ၸႄႈဝဵင်းသီႇပေႃႉ ၼႆယဝ်ႉ။
