မိူဝ်ႈၼႆႉ ဝၼ်းတီႈ 17/1/2022 ယၢမ်းၵၢင်ၼႂ် မွၵ်ႈ 9 မူင်းပၢႆ ၵူၼ်းၼႂ်းဢိူင်ႇၼမ်ႉဢုၼ်ႇ ဢၼ်မီးၾၢႆႇၸဵင်ႇၸၢၼ်းဝၼ်းတူၵ်း ဝၢၼ်ႈၵၢင်ႉမေႃႉ ဢွၼ် ၵၼ်ပၢႆႈၽေးသိုၵ်းမႃးသွၼ်ႈတီႈၵျွင်းၽြႃးၵၢင်ႉမေႃႉ ၸႄႈဝဵင်းသီႇပေႃႉ ထႅင်ႈႁူဝ်ၵူၼ်း 50 ပၢႆ ပၢင်တိုၵ်းပဵၼ်ႁိမ်းၸမ်ဝၢၼ်ႈ ႁၢဝ်ႈႁႅင်း ။
ၵူၼ်းသီႇပေႃႉ လၢတ်ႈတီႈၽူႈတွႆႇႁွၵ်ႈဝႃႈ -“ၸႂ်ႈၶႃႈဢေႃႈ မိူဝ်ႈၼႆႉ ၵၢင်ၼႂ် မႃးႁွတ်ႈထိုင်ထႅင်ႈ 50 ပၢႆ ပဵၼ်ၵူၼ်းၼႂ်း ဢိူင်ႇၼမ်ႉဢုၼ်ႇ ၵုင်းၼိဝ်ႉၶႃႈ။ ၶဝ်ပၢႆႈဢွၵ်ႇမႃး မိူဝ်ႈဝႃးတင်းၶိုၼ်းယဝ်ႉၶႃႈ ယွၼ်ႉသဵၼ်ႈတၢင်းယၢပ်ႇၼႃႇဢႃးလႃးလႄႈ ဢမ်ႇႁွတ်ႈထိုင်လႆႈသေ လႆႈၵိုတ်းၼွၼ်းလိုဝ်း ၸွမ်းၼႂ်းတူင်ႈၼႃးပိူၼ်ႈ။ မိူဝ်ႈၼႆႉ ၵၢင်ၼႂ် ၸင်ႇမႃးထိုင်။ မၢင်ၸိူဝ်းၵေႃႈ လႆႈၵႂႃႇႁပ်ႉဢဝ်ၸွမ်းတၢင်း။ မိူဝ်ႈဝႃး ႁဝ်းလႆႈဢဝ်ၵႃးၵႂႃႇႁပ်ႉမႃး 4 လမ်းၶႃႈ။ မိူဝ်ႈၼႆႉသမ်ႉ ၶဝ်ဢဝ်ထူဝ်ႈႁပ်ႉမႃးၶႃႈဢေႃႈ”- ဝႃႈၼႆ။
ပၢင်တိုၵ်းဢၼ်ပဵၼ်ယူႇ ၼႂ်းမိူင်းတႆးၼႆႉ တေပဵၼ်ထႅင်ႈႁိုင်ၵႃႈႁိုဝ် ။ ၵူၼ်းပၢႆႈၽေးသိုၵ်းတေလႆႈယူႇသဝ်း တီႈၵျွင်းထႅင်ႈ ၵႃႈႁိုဝ်ပႆႇႁူႉလႆႈလႄႈ လွင်ႈၶဝ်ႈၼမ်ႉတၢင်းၵိၼ်/ ၶွင်ၵိၼ်ယႅမ်ႉလႄႈ ၽႃႈႁူမ်ႇၶူဝ်းၼွၼ်း ၶူဝ်းဢုၼ်ႇ ၸိူဝ်းၼႆႉတႄႉ တိုၼ်းတေလူဝ်ႇထႅင်ႈ တင်းၼမ် ၵူၼ်းသီႇပေႃႉလၢတ်ႈ။
“ၵူၼ်းပၢႆႈၽေး ႁွတ်ႈမႃးထိုင်တီႈၼႆႈ ၵမ်ႈၼမ်ဢမ်ႇလႆႈသင်မႃး၊ လႆႈမႃးၵေႃႈ ဢမ်ႇၸေးၶႃႈ။ ၶွင်ပၢႆႈၼႅတ်ႈပၢႆႈမႆႈၼႃႇၼေႃ။ သင်ဝႃႈ ၵူၼ်းၼမ်မႃး ၶၢဝ်းယၢမ်းယူႇၵေႃႈ ႁိုင်ထႅင်ႈတႄႉ လႆႈမႆႈၸႂ်ဝႆႉၶႃႈဢေႃႈ တႃႇၶဝ်ႈၼမ်ႉတၢင်းၵိၼ်/ ၽၵ်းၶဵဝ်။ မိူဝ်ႈလဵဝ် ႁူဝ်ၵူၼ်းမီး ၸမ် 450 ၵေႃႉ မၼ်းၵေႃႈ ဢမ်ႇငၢႆႈၶႃႈ ၼိုင်ႈဝၼ်းလႂ် 3 တႃႇ။ ယဝ်ႉၵေႃႈ မိူဝ်ႈလဵဝ်ၼႆႉ ယႃႈယႃ ၵႄႈၼၢဝ် ၵႄႈဝတ်း ၸိူဝ်းၼႆႉ လူဝ်ႇတင်းၼမ်ၶႃႈ။ လုၵ်ႈဢွၼ်ႇဢမ်ႇယူႇ လီၵေႃႈ မီးၼမ်ၶႃႈဢေႃႈ တီႈၼႆႈ”- ၵူၼ်း သီႇပေႃႉ သိုပ်ႇလၢတ်ႈၼႄၼင်ႇၼႆ။
ယွၼ်ႉပၢင်တိုၵ်း ၼႂ်းၵႄႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းမိူင်းတႆးၼင်ႇၵၼ် ပိုတ်းယိုဝ်းၵၼ် မႃးႁၢဝ်ႈႁႅင်းသေ တႄႇဢဝ် ဝၼ်းတီႈ 7/1/2022 ၼႆႉမႃး ၵူၼ်းပၢႆႈၽေးသိုၵ်း တၢင်းဢိူင်ႇၼမ်ႉသိမ်ႇ၊ ၼႃးမူၼ်း၊ ၵုင်းၼိဝ်ႉ ၸိူဝ်းၼႆႉ ဢွၼ်ၵၼ်ပၢႆႈ ဢွၵ်ႇ မႃး ဢမ်ႇထၢတ်ႇ ႁၢၼ်ႉတေႃႇထိုင်ဝၼ်းတီႈ 17 ၼႆႉ တိုၵ်ႉပၢႆႈဢွၵ်ႇမႃးယူႇၵူႈဝၼ်း တေႃႇထိုင်ယၢမ်းလဵဝ် တီႈဝတ်ႉၵၢင်ႉမေႃႇၼႆႉ မီးၵူၼ်းပၢႆႈၽေးသိုၵ်းၵႂႃႇ မွၵ်ႈ 450 ၵေႃႉ။
