ၸုမ်းပရႁိတ လၢႆလၢႆၸုမ်း ၼႂ်းၸိုင်ႈတႆးပွတ်းႁွင်ႇလႄႈတင်းပွတ်းၸၢၼ်း ထုၵ်ႇၸုမ်းယိပ်းၵွင်ႈၵၢင်ႇ  ၼႂ်းပိုၼ်ႉတီႈ ၼႄးဝႃႈ ဢဝ်ၶူဝ်းၶွင်ၵႂႃႇၸွႆႈ ၸုမ်းသိုၵ်းၾၢႆႇၼႆႉ ၾၢႆႇၼၼ်ႉ ၼႆသေ ႁႄႉႁၢမ်ႈ၊ ၶတ်းၶႂၢင် ဢမ်ႇပၼ်ၵႂႃႇၸွႆႈထႅမ် ၵူၼ်းပၢႆႈၽေး။

ၸုမ်းပရႁိတ ဢၼ်တေလုၵ်ႉတၢင်းလၢႆးၶႃႈ၊ မိူင်းၵိုင် ၵႂႃႇႁႃၸွႆႈၵူၼ်းၺႃးၽေးသိုၵ်း ၼႂ်းပိုၼ်ႉတီႈ ဢၼ်ပဵၼ်ယူႇ တၢင်း ၸဵင်ႇႁွင်ႇ ဝၼ်းဢွၵ်ႇ မိူင်းၵိုင်၊ ၸုမ်းဢၼ် လုၵ်ႉတၢင်းထုင်ႉမၢဝ်းႁႃလူင်းမႃးၸွႆႈ တၢင်းသီႇပေႃႉၵျွၵ်ႉမႄး ၸိူဝ်းၼႆႉ ႁူပ်ႉ တၢင်းယၢပ်ႇ။

“ပိူၼ်ႈတႄႉ ႁႃငိုၼ်းၼွၵ်ႈမိူင်းသေ မႃးၸွႆႈၶိူဝ်းပိူၼ်ႈၶိုၼ်း၊ ႁဝ်းၼႆႉသမ်ႉ ၸူၵ်းၼႂ်းထွင်းတႆး ႁဝ်းသေ ၵႂႃႇႁႃၸွႆႈၵၼ်၊ ႁဝ်းၼင်ႇၵၼ် သမ်ႉတိုၵ်ႉမႃးႁႄႉႁၢမ်ႈၵၼ်ၶိုၼ်းထႅင်ႈ။ ၸုမ်း႞ၵေႃႈၼႄးဢဝ်ၵႂႃႇၸွႆႈ ထႅင်ႈၾၢႆႇ႞ သေ ႁႄႉႁၢမ်ႈႁဝ်းၶႃႈ တင်းသွင်ၾၢႆႇယဝ်ႉၶႃႈ ”–  ဝႃႈၼႆ။

ဢၼ်ၺႃးႁႄႉ ႁၢမ်ႈၼၼ်ႉ ဢမ်ႇၵွမ်ႉၵႃႈ ၸုမ်းပရႁိတ ပႃးၸဵမ်ၸုမ်းသင်ၶၸဝ်ႈ၊ ၸုမ်းၵူၼ်းၼုမ်ႇၸိူဝ်းၼႆႉဝႃႈၼႆ။

ၵႃႈၵွၼ်ႇပူၼ်ႉမႃး ၵူၼ်းတၢင်းၼမ်ႉၶမ်း၊ မူႇၸေႊ ထုင်ႉမၢဝ်း ၵဵပ်းၶူဝ်းၶွင် ၽႃႈႁူမ်ႇၶူဝ်းၼွၼ်း ၶွင်ၵိၼ် ၶွင်ယမ်ႉ ဢဝ်လူင်းၵႂႃႇၸွႆႈ ထႅမ် ၵူၼ်းပၢႆႈၽေးသိုၵ်းတၢင်းသီႇပေႃႉၵျွၵ်ႉမႄး – ၾၢႆႇၼိုင်ႈ သမ်ႉဝႃႈ လႆႈၶၢဝ်ႇ ဢဝ်ၵႂႃႇၸွႆႈထႅမ် ၾၢႆႇၼိုင်ႈ။

ၵူၼ်းတၢင်းပၢင်လူင် လၢႆးၶႃႈ မိူင်းၵိုင် ၶိုင်ဢဝ်တၢင်းၵိၼ်တၢင်းယမ်ႉ ၽႃႈႁူမ်ႇၶူဝ်းၼွၼ်း ၵႂႃႇႁႃႈၸွႆႈၵူၼ်းပၢႆႈၽေး ၼၼ်ႉၵေႃႈထုၵ်ႇ ၸုမ်းယိပ်းၵွင်ႈၵၢင်ႇၸုမ်းၼိုင်ႈ ႁႄႉႁၢမ်ႈ ဢမ်ႇပၼ်ဢဝ်ၵႂႃႇ ႁႂ်ႈပၼ်တီႈၶဝ်ဝႆႉ – ဢမ်ႇပၼ်ၵႂႃႇႁူပ်ႉ ၵူၼ်းပၢႆႈၽေးသေ ႁႂ်ႈလႆႈၸွႆႈထႅမ်ၵမ်းသိုဝ်ႈ ၸိူဝ်းၼႆႉမီးမႃးၶိူဝ်းယႂ်း။