တႄႇဢဝ် ႁၢင်လိူၼ်ၵျုၼ်ႊ 2021 မႃး ႁၢၼ်ႉတေႃႇထိုင် ႁူဝ်လိူၼ်ၵျႅၼ်ႊၼိဝ်ႊရီႊ 2022 ၼႆႉ ၼႂ်းၸႄႈဝဵင်းၵဵင်းတုင် မီးၵူၼ်းပဵၼ်ၶူဝ်ႊဝိတ်ႉၵူႈဝၼ်း မိူဝ်ႈဝႃးၼႆႉပဵၼ်ဝၼ်းႁႅၵ်ႈတီႈဢမ်ႇမီးၵူၼ်းပဵၼ်ၶူဝ်ႊဝိတ်ႉ။
“ယၢမ်းလဵဝ် ၵူၼ်းမိူင်းတႄႉ ဢွၵ်ႇႁိူၼ်းယေးၵၼ်ၼမ်ယဝ်ႉ တေဝႃႈငဝ်းလၢႆး လီၶိုၼ်ႈမႃးၼမ်ယဝ်ႉ။ ၵူၼ်းမိူင်းႁဝ်းၶႃႈ ပွင်ႇၸႂ်သေ မေႃၵုမ်းတူဝ် လုမ်းလႃးႁင်းၽႂ်မၼ်းမႃးၼမ်လႄႈ တႃႇတေၽႄႈလၢမ်းတိတ်းၸပ်းၵၼ်ႁၢဝ်ႈႁႅင်း မိူၼ်မိူဝ်ႈၵူႈပွၵ်ႈတႄႉ တေဢမ်ႇမီးယဝ်ႉ”- ၵူၼ်းၼုမ်ႇပိုၼ်ႉတီႈ သိုပ်ႇလၢတ်ႈၼင်ႇၼႆ။
ၼႂ်းၶၢဝ်းတၢင်း 6 လိူၼ်ပၢႆၼႆႉ တီႈဝဵင်းၵဵင်းတုင်ၵူတ်ႇထတ်းႁၼ် ၵူၼ်း တိတ်းၸပ်း ၸိူဝ်ႉမႅင်းၶူဝ်ႊဝိတ်ႉ 19 မီး 5,600 ပၢႆ ။ တင်ႈ ဢဝ် ႁၢင်ပီ 2021 ၼၼ်ႉမႃး ၵူၼ်းတိတ်းၸပ်း ၸိူဝ်ႉမႅင်းတၢင်းပဵၼ် ၶူဝ်ႊဝိတ်ႉ 19 လူတ်းယွမ်းလူင်းမႃးတင်းၼမ် ႁၢၼ်ႉတေႃႇထိုင် ဝၼ်းမိူဝ်ႈၼႆႉ ၵူၺ်းၵႃႈ ဢမ်ႇပႆႇတမ်းၸႂ်လႆႈ ၵွပ်ႈဝႃႈ ယူႇႁိူၼ်းယူတ်းယႃတူဝ်ၽႂ်မၼ်းၵေႃႈမီး ဝႃႈၼႆ။
ၵူၼ်းၼုမ်ႇ ၵဵင်းတုင် လၢတ်ႈတီႈၽူႈတွႆႇႁွၵ်ႈဝႃႈ – “ပေႃးထွမ်ႇၶၢဝ်ႇတႄႉ ဝႃႈဢမ်ႇမီး ၵူၼ်းတိတ်းၸပ်းတၢင်းပဵၼ် ဝႃႈၼႆသေတႃႉ ၵူၼ်း ပဵၼ်တႄႉ တိုၵ်ႉမီးယူႇ။ ၵူၺ်းၵႃႈ ယူႇၽႂ်ယူႇမၼ်းသေ ယူတ်းယႃ တူဝ်ၽႂ်မၼ်း ယူႇတီႈႁိူၼ်းယေး ၽႂ်မၼ်းၸိူင်ႉၼၼ်ၵူၺ်း။ တေဝႃႈ ၸိူဝ်ႉမႅင်းၼႆႉ ႁၢႆမူတ်းယဝ်ႉႁႃႉၼႆၵေႃႈ ပႆႇႁၢႆ ။ ပေႃးပဵၼ်ႁႅင်းၵေႃႈ ၵႂႃႇယူတ်းယႃတူဝ်တီႈႁူင်းယႃ ႁင်းၽႂ်မၼ်း ၸိူင်ႉၼၼ်ၵူၺ်း”- ဝႃႈၼႆ။
ၾၢႆႇၼိုင်ႈၵေႃႈ ပၢင်ပွႆးမွၵ်ႇၵွၼ် တီႈလွႆမူၺ် တိုၵ်ႉၸတ်းယဝ်ႉတူဝ်ႈမိူဝ်ႈဝႃးဝၼ်းတီႈ 10/1/2022 လႄႈ တၢင်းပဵၼ်ၶူဝ်ႊဝိတ်ႉတေဢမ်ႇၽႄႈမႃးၶိုၼ်းၼႆ ဢမ်ႇၸၢင်ႈဝႃႈလႆႈ။ ၵွပ်ႈၼႆ ႁိူၼ်းဢၼ်မီးၽူႈသုင်ဢႃယု(ၵူၼ်းထဝ်ႈ)တႄႉလွမ်လွမ်မႆႈၸႂ်ယူႇ ၵူၼ်းၵဵင်းတုင်ထႅင်ႈၵေႃႉၼိုင်ႈလၢတ်ႈၼင်ႇၼႆ။
ၵူၼ်းတိတ်းၸိူဝ်ႉမႅင်းတၢင်းပဵၼ်ၶူဝ်ႊဝိတ်ႉ 19 ၼႂ်းၸႄႈဝဵင်းၵဵင်းတုင် ႁၢၼ်ႉတေႃႇထိုင် ဝၼ်းတီႈ 10/1/2022 ၼႆႉ တင်းမူတ်းၵူတ်ႇထတ်းႁၼ် မီး 5,670 ၵေႃႉ၊ လူႉတၢႆ 92 ၵေႃႉ၊ ယႃၶႅၼ်း 5,553 ၵေႃႉလႄႈ တိုၵ်ႉယူတ်းယႃ 25 ၵေႃႉ သိုဝ်ႉၶၢဝ်ႇၼႂ်းပိုၼ်ႉတီႈ ၵဵင်းတုင် ဢွၵ်ႇဝႆႉၼင်ႇၼႆ။
တႄႉလွမ်လွမ်မႆႈၸႂ်ယူႇ ၵူၼ်းၵဵင်းတုင်ထႅင်ႈၵေႃႉၼိုင်ႈလၢတ်ႈၼင်ႇၼႆ။){kind=link}