Thursday, June 20, 2024

သိုၵ်းမၢၼ်ႈတင်း KIA, MNDAA ပဵၼ်ပၢင်တိုၵ်းၵၼ် ၼႂ်းၸိုင်ႈတႆးပွတ်းႁွင်ႇ ႁၢဝ်ႈႁႅင်း

Must read

ၶွင်ႇသီႇသိုၵ်းမၢၼ်ႈ ယိုတ်းမိူင်း တင်း သိုၵ်းၶၢင် KIA, သိုၵ်းၶႄႇၵဝ်ႈၵၢင်ႉ MNDAA ပဵၼ်ပၢင်တိုၵ်းၵၼ် ႁၢဝ်ႈႁႅင်း ၼႂ်းၸႄႈဝဵင်းမိူင်းပေႃႈလႄႈ မိူင်းၵူဝ်း ၸိုင်ႈတႆးပွတ်းႁွင်ႇ ၾၢႆႇသိုၵ်းမၢၼ်ႈ ဢဝ်ၶိူင်ႈမိၼ်ယိုဝ်းၸွႆႈ။

Photo: သိူဝ်ႈၶူဝ်းမၢၵ်ႇမိုဝ်ႉၸိုၼ်းယၢမ်း ၶွင်သိုၵ်းမၢၼ်ႈ ဢၼ်သိုၵ်း MNDAA တီႉလႆႈ

မိူဝ်ႈဝၼ်းတီႈ 5/1/2022 ယၢမ်းၵၢင်ၼႂ် 8 မူင်းထိုင် 11 မူင်း သိုၵ်းမၢၼ်ႈတင်း သိုၵ်းၶႄႇၵဝ်ႈၵၢင်ႉ ပဵၼ်ပၢင်တိုၵ်းၵၼ် ၼႂ်းၸႄႈဝဵင်းမိူင်းၵူဝ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ႁၢဝ်ႈႁႅင်း ၾၢႆႇသိုၵ်းမၢၼ်ႈ ဢဝ်ၶိူင်ႈမိၼ် သွင်လမ်းယိုဝ်းၸွႆႈ ၼႆယဝ်ႉ။

- Subscription -

ၵူၼ်း မိူင်းၵူဝ်း လၢတ်ႈတီႈၽူႈတွႆႇႁွၵ်ႈဝႃႈ – “ပၢင်တိုၵ်းၼႆႉ ပဵၼ်တၢင်းဝၢၼ်ႈၽွင်းသႅင်ၼၼ်ႉၶႃႈ ၾၢႆႇသိုၵ်းမၢၼ်ႈ ၸႂ်ႉၶိူင်ႈမိၼ်သွင်လမ်း သေ ယိုဝ်းၸွႆႈ မွၵ်ႈ 4 ၵမ်းၼႆႉ။ လႆႈငိၼ်းသဵင်ၵွင်ႈ၊ မၢၵ်ႇလူင်တႅၵ်ႇႁႅင်းၶႃႈဢေႃႈ။ သဵင်မၢၵ်ႇလူင်တႅၵ်ႇၼႆႉ ၶႂ်ႈမီးမွၵ်ႈ 20 ၵမ်းၼႆႉၶႃႈ ဢၼ်ၶဝ်ပွႆႇ”- ဝႃႈၼႆ။

Photo: သိူဝ်ႈၶူဝ်းမၢၵ်ႇမိုဝ်ႉၸိုၼ်းယၢမ်း ၶွင်သိုၵ်းမၢၼ်ႈ ဢၼ်သိုၵ်း MNDAA တီႉလႆႈ

လိူဝ်ၼၼ်ႉ တၢင်းၸႄႈဝဵင်းမိူင်းပေႃႈၵေႃႈ သိုၵ်းမၢၼ်ႈတင်း သိုၵ်းၶၢင် ပဵၼ်ပၢင်တိုၵ်းၵၼ် ႁၢဝ်ႈႁႅင်း မိူၼ်ၵၼ်  ။

ၵူၼ်းပိုၼ်ႉတီႈ မိူင်းပေႃႈ လၢတ်ႈတီႈၽူႈတွႆႇႁွၵ်ႈဝႃႈ -“တီႈမိူင်းပေႃႈၼႆႉ တႄႇမွၵ်ႈၵၢင်ၼႂ် 10 မူင်းၼႆႉၶႃႈ သဵင်ၵွင်ႈတႅၵ်ႇ ၸွမ်းသၼ်လွႆ။ ၼႂ်းဝဵင်း တႄႉ ဢမ်ႇပဵၼ်ၶႃႈ။ ပဵၼ်သိုၵ်းမၢၼ်ႈတင်း သိုၵ်းၶၢင်ၶႃႈဢေႃႈ။ လွင်ႈမၢတ်ႇၸဵပ်းလူႉတၢႆ တင်းသွင်ၾၢႆႇတႄႉ ဢမ်ႇလႆႈႁူႉၸွမ်းၶႃႈ”- ဝႃႈၼႆ။

တႄႇဢဝ် လိူၼ်ၵျုၼ်ႊ 2021 ၼၼ်ႉမႃး ၶွင်ႇသီႇသိုၵ်းမၢၼ်ႈ ယိုတ်းမိူင်း တင်း သိုၵ်းၶႄႇၵဝ်ႈၵၢင်ႉ MNDAA ပဵၼ်ပၢင်တိုၵ်းၵၼ်မႃး ႁၢဝ်ႈႁႅင်း ၼႂ်းၸိုင်ႈတႆးပွတ်းႁွင်ႇ ယူႇတီႈၾၢႆႇသိုၵ်းမၢၼ်ႈ ထႅမ်ႁႅင်းၸူးတၢင်းပွတ်းတွၼ်ႈၼၼ်ႉတၢင်းၼမ်လၢႆ မီးလွင်ႈမၢတ်ႇၸဵပ်းလူႉတၢႆၵေႃႈၼမ် ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း