ၵူၼ်းဝၢၼ်ႈဢိူင်ႇႁူးသူၼ် ဢိူင်ႇပုင်းလူင် ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ယူႇၵိၼ်ယၢပ်ႇၽိုတ်ႇလႄႈသိုပ်ႇပၢႆႈလူင်းထိုင်ၸႄႈဝဵင်းလွၵ်ႉၸွၵ်ႇ ။

ဝၼ်းတီႈ 2/1/2022 ပူၼ်ႉမႃးၼႆႉ ၵူၼ်းပၢႆႈၽေးသိုၵ်း ႁူဝ်ၵူၼ်း 400 ပၢႆၼႂ်းၸႄႈဝဵင်းၵျွၵ်ႉမႄး သိုပ်ႇယၢႆႉၶၢႆႉတီႈလူင်းမႃးယူႇၼႂ်းဢိူင်ႇၵဵင်းၶမ်းၸႄႈဝဵင်းလွၵ်ႉၸွၵ်ႇ ၸိုင်ႈတႆးပွတ်းၸၢၼ်း။

လုင်းၸၢႆးလႅင်းႁၢၼ် ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၸႄႈဝဵင်းၵျွၵ်ႉမႄး ဢၼ်ၸွႆႈထႅမ်ၵူၼ်းပၢႆႈၽေးသိုၵ်းၼၼ်ႉလၢတ်ႈတီႈၽူႈတွႆႇႁွၵ်ႈဝႃႈ – “တႃႇၵႄႈလိတ်ႈပၼ်ႁႃ တႃႇႁႃၵိၼ်လဵင်ႉတွင်ႉၶႃႈဢိူဝ်ႈ။ တေသိုပ်ႇယူႇသဝ်းၵႂႃႇတီႈပၢင်သဝ်းၵူၼ်းပၢႆႈၽေးသိုၵ်းၵေႃႈ ပေႃးၶၢဝ်းယၢဝ်း သမ်ႉတေယၢပ်ႇၽိုတ်ႇတႃႇၶဝ်ႁဵတ်းၼႆၶႃႈဢိူဝ်ႈ။ ၾၢႆႇၼိုင်ႈ ပေႃးယူႇႁူမ်ႈၵၼ်ၵူၼ်းၼမ် သမ်ႉၵူဝ်တၢင်းပဵၼ်ၶူဝ်ႊဝိတ်ႉ ၼၼ်ႉၶႃႈၼႃႇ။ ပေႃးတေမိူဝ်းၶိုၼ်းတၢင်းဝၢၼ်ႈသမ်ႉပႆႇမီးလွင်ႈႁူမ်ႇလူမ်ႈ တွၼ်ႈတႃႇၶဝ် ဝႃႈၼႆၶႃႈဢေႃႈ ။ ၸင်ႇဝႃႈၵမ်ႈၽွင်ႈသိုပ်ႇၶၢႆႉၵႂႃႇယူႇတၢင်းၸႄႈဝဵင်းလွၵ်ႉၸွၵ်ႇ ”- ဝႃႈၼႆ။

တွၼ်ႈတႃႇၵူၼ်းပၢႆႈၽေးသိုၵ်းၸိူဝ်းၼႆႉတေၸၢင်ႈယူႇသဝ်းၵႄႈလိတ်ႈပၼ်ႁႃၸူဝ်ႈၶၢဝ်းၼၼ်ႉ ၾၢႆႇၸွႆႈထႅမ်ၵူၼ်းပၢႆႈၽေးသိုၵ်း ႁဵတ်းသုမ်ႉသွင်းဝႆႉပၼ်တီႈလိၼ်ၵူၼ်းမိူင်း တၢင်းၵႂၢင်ႈမီးမွၵ်ႈ 500 ဢေႊၶိူဝ်ႊၼႆႉ ၸၢႆးဢွင်ႇမျိၼ်ႉ ၽူႈၸွႆႈထႅမ်ၵူၼ်းပၢႆႈၽေးသိုၵ်းလၢတ်ႈၼင်ႇၼႆ။

“သင်ၶၸဝ်ႈလႄႈ ၽူႈမီးပုၼ်ႈၽွၼ်းဢွၼ်ဢဝ်ၵူၼ်းဝၢၼ်ႈသေ ၶၢႆႉဝႆႉၸူဝ်ႈၵႅပ်ႉၵူၺ်းၶႃႈ။ တႃႇၽုၵ်ႇသွမ်ႈ တႃႇယူႇသဝ်းတႃႇၸူဝ်ႈၵႅပ်ႉၵမ်းတႄႉ သၢင်ႇထုၵ်ႇဢေႃႈတီႈၼၼ်ႉ။”

ၵွၼ်ႇၼႃႈၵူၼ်းပၢႆႈၽေးသိုၵ်းတေၶၢႆႉလူင်းလွၵ်ႉၸွၵ်ႇၼၼ်ႉ  ၵေႃႇမတီႇႁူမ်ႈသၢင်ႈလွင်ႈငမ်းယဵၼ် သင်ၶ လႄႈၵူၼ်းမိူင်း လႆႈၵႂႃႇႁူပ်ႉထူပ်းဢုပ်ႇၵုမ် တႃႇၸွႆႈၵႄႈလိတ်ႈပၼ်ႁႃယူႇ ဝႃႈၼႆ။

“ၵႂႃႇဢုပ်ႇၵုမ်ၶဝ် ဝႃႈတေလႆႈၸွႆႈၸိူင်ႉႁိုဝ် ၸိူဝ်းၼႆႉဢေႃႈ။ သင်ဝႃႈၶဝ်ၶႂ်ႈမိူဝ်းၶိုၼ်းႁိူၼ်းၵေႃႈတေၸၢင်ႈၸွႆႈထႅမ်ပၼ်ၼၼ်ႉၶႃႈၼႃႇ။ ဢမ်ႇၼၼ် သင်ဝႃႈၶဝ်ၶႂ်ႈၶၢႆႉၵႂႃႇတီႈယူႇမႂ်ႇၼႆၵေႃႈ တေၸၢင်ႈၸွႆႈထႅမ်ၶဝ်ၼႆဢေႃႈ။ႁႂ်ႈဝႃႈ ၵႂႃႇတီႈၼၼ်ႈလႄႈၵႂႃႇတီႈၼႆႈလႄႈၼႆတႄႉဢမ်ႇလႆႈလၢတ်ႈသင်ႁင်းၶဝ်ၼင်ႇၵဝ်ႇၶႃႈ။ဢၼ်ၶဝ်ၶၢႆႉၵႂႃႇတၢင်းလွၵ်ႉၸွၵ်ႇၼႆႉၵေႃႈ ယင်းပႆႇႁူႉလွင်ႈတၢင်းတႅတ်ႈတေႃးမၼ်းၵွၼ်ႇဢေႃႈၼႆႉ”- ၸဝ်ႈသြႃႇ ၶေႇမိသ်ႉသရ လၢတ်ႈၽူႈတွႆႇႁွၵ်ႈ ၼင်ႇၼႆ။

ၵူၼ်းၸိူဝ်းၵိုတ်းဝႆႉၵေႃႈ ႁၢင်ႈႁႅၼ်းတႃႇသိုပ်ႇပၢႆႈထႅင်ႈယူႇယဝ်ႉလႄႈ ပၼ်ႁႃပၢင်တိုၵ်းၼႆႉ လီႁႂ်ႈၸဵဝ်းသုတ်းၸဵဝ်းၵိုတ်းလႆႈဝႆးဝႆးယူႇ ၸဝ်ႈသြႃႇသိုပ်ႇလၢတ်ႈထႅင်ႈၼင်ႇၼႆ။

“ ပၢင်တိုၵ်းတႄႉ ဢမ်ႇၶႂ်ႈႁႂ်ႈပဵၼ်ယဝ်ႉ။ ၶႂ်ႈႁႂ်ႈၵိုတ်းပၢင်တိုၵ်းယဝ်ႉ။ ၶႂ်ႈႁႂ်ႈဝူၼ်ႉပၼ်တႃႇၵူၼ်းဝၢၼ်ႈၵူၼ်းမိူင်းလႆႈပွၵ်ႈၶိုၼ်းႁိူၼ်းယေးဝၢၼ်ႈဢိူင်ႇဝႆးဝႆး။ ႁႂ်ႈဝူၼ်ႉၶွပ်ႈတူၺ်းထိုင် လုမ်းလႃးၵူၼ်းမိူင်းၽွင်ႈၶႃႈဢေႃႈ” ၸဝ်ႈသြႃႇၶေႇမိသ်ႉသရသိုပ်ႇလၢတ်ႈၼင်ႇၼႆ။

ၸုမ်းသိုၵ်းဢူၺ်းလီပွတ်းႁွင်ႇဢၼ်မီး SSPP , TNLA ပိုတ်းယိုဝ်းၵၼ်တင်း တပ်ႉသိုၵ်း RCSS ၼႂ်းဢိူင်ႇႁူးသူၼ် ႁၢင်ပီပူၼ်ႉမႃး ၵူၼ်းဝၢၼ်ႈပၢႆႈၽေးသိုၵ်းၶဝ်ႈဝဵင်းၵျွၵ်းမႄးၼပ်ႉႁူဝ်ပၢၵ်ႇ။ ယၢမ်းလဵဝ်တီႈၼႂ်းၸႄႈဝဵင်းၵျွၵ်ႉမႄးၼႆႉၵူၼ်းပၢႆႈၽေးသိုၵ်း တိုၵ်ႉၵိုတ်းယူႇ 400 ပၢႆ လႆႈႁူႉၼင်ႇၼႆ။