မိူဝ်ႈၼႆႉ ဝၼ်းတီႈ 11/1/2026 ဝၼ်းပၢင်လိူၵ်ႈတင်ႈတီႈဝဵင်းယႂႃႇငၢၼ်ႇ ၸိုင်ႈတႆးပွတ်းၸၢၼ်းၼၼ်ႉ မီးၵူၼ်းၵမ်ႉထႅမ်ပႃႇတီႇသၢင်ႇသီႈ လွၵ်ႇငိုတ်ႈၵူၼ်းဝၢၼ်ႈဝႃႈ ၽႂ်ႇဢမ်ႇသႂ်ႇၶႅပ်းၵၢင်ၸႂ် တေလၢတ်ႈႁႂ်ႈသိုၵ်းမၢၼ်ႈတီႉၺွပ်း ဝႃႈၼႆ ။
ၵူၼ်းၵႂႃႇတွတ်ႈၶႅပ်းၵၢင်ၸႂ်တီႈဝဵင်းယႂႃႇငၢၼ်ႇ လၢတ်ႈၽူႈတွႆႇႁွၵ်ႈဝႃႈ -“ ၵူၼ်းတီႈႁိူၼ်းၼႆႉ ၵႂႃႇသႂ်ႇၶႅပ်းၵၢင်ၸႂ်ၵၼ်မူတ်း ၊ ၵူၼ်းပၼ်ႁႅင်းသိုၵ်းမၢၼ်ႈလၢတ်ႈဝႃႈ ႁိူၼ်းလႂ် ၽႂ်ဢမ်ႇၵႂႃႇသႂ်ႇၶႅပ်းၵၢင်ၸႂ် တေဢဝ်သဵၼ်ႈမၢႆဝႆႉသေ တေၵႂႃႇလၢတ်ႈၼႄႇသိုၵ်းမၢၼ်ႈ ၊ ႁႂ်ႈသိုၵ်းမၢၼ်ႈမႃးတီႉၼႆ ယွၼ်ႉၼၼ်ၵူၼ်းၼႂ်းဝၢၼ်ႈၵေႃႈၵူဝ်ႇသေ ၵႃႈလႆႈၵႂႃႇ။ ၸွမ်းဝၢၼ်ႈၵေႃႈသိုၵ်းမၢၼ်ႈမီးၼမ်ႁႅင်းၼႃႇ”- ဝႃႈၼႆ ။
သိုၵ်းမၢၼ်ႈယိပ်းၵွင်ႈ ဢဝ်ႁူမ်ႇလူမ်ႈ ၸွမ်းတႃႈၸွမ်းတၢင်း ၵဵတ်ႉလၢၼ်ႇ ၊ ၵျွင်းမုၼ်ၸဝ်ႈ ၊ ႁူင်းႁဵၼ်း တၢင်းသဵင်ႈ ႁဵတ်းႁႂ်ႈၵူၼ်းမိူင်း တူၵ်းၸႂ်သေၼႅတ်ႈၵႂႃႇသႂ်ႇၶႅပ်းၵၢင်ၸႂ် – ၵူၼ်းပိုၼ်ႉတီႈ လၢတ်ႈၼင်ႇၼႆ။
ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ယွၼ်ႉသိုၵ်းမၢၼ်ႈၼမ်ႁႅင်းၼႃႇ တီႈၼႂ်းဝဵင်း။ ႁဝ်းၶႃႈၵေႃႈ ၵူဝ်ပိူၼ်ႈမႃး ပွႆႇမၢၵ်ႇ။ ယွၼ်ႉၼၼ် ၵၢင်ၼႂ်ၼႆႉၼႅတ်ႈၵႂႃႇပၼ်ၵၢင်ၸႂ်ၸဝ်ႉၸဝ်ႉ ၊ ယွၼ်ႉသၢႆငၢႆ မၼ်း ဢမ်ႇလီလႄႈ ၶဝ်ၸင်ႇဢဝ်ႁူမ်ႇလူမ်ႈၸိူင်ႉၼႆ ၊ ၸွမ်းတၢင်း ၊ ၵဵတ်ႉလၢၼ် ၊ ၵျွင်းမုၼ်ၸဝ်ႈ ၊ ႁူင်းႁဵၼ်း ၸိူဝ်းၼႆႉသိုၵ်းမၢၼ်ႈပေႃးတဵမ်ၵႂႃႇမူတ်း ၊ ယွၼ်ႉၼၼ် ၵူၼ်းၵႂႃႇပၼ်ၶႅပ်းၵၢင်ၸႂ်ၵေႃႈၼမ်ၼႃႇ ၊ ၵူၺ်းၵႃႈ ဢမ်ႇႁူႉဝႃႈ တေလႆႈသႂ်ႇပၼ်ၽႂ် ၊ ဢမ်ႇၸၢင်ႈပၼ်ၶႅပ်းၵၢင်ၸႂ်တွၼ်ႈတႃႇၽႂ် – ပႃႇတီႇဢၼ်ၶႂ်ႈ လိူၵ်ႈၵေႃႈ ဢမ်ႇမီး ”- ဝႃႈၼႆ ။
တႄႇဝၼ်းတီႈ7/1/2026 မႃးသိုၵ်းမၢၼ်ႈလႄႈ ပျီႇတူႉၸိတ်ႉထႅမ်ႁႅင်းသိုၵ်းၶဝ်ႈမႃး ပႂ်ႉဝႆႉၸွမ်းႁူင်းတွတ်ႈၶႅပ်း ၵၢင်ၸႂ် ၼႂ်းဝၢၼ်ႈၼႂ်းဢိူင်ႇ-ၼိုင်ႈတီႈႁႅင်းသိုၵ်းဢမ်ႇယွမ်း 20 ၵေႃႉ – ၵူၼ်းပိုၼ်ႉတီႈလၢတ်ႈၼင်ႇၼႆ။
ၵူၼ်းၵႂႃႇပၼ်ၶႅပ်းၵၢင်ၸႂ်ၼႆႉ လႆႈလူင်းလၢႆးမိုဝ်း သၢမ်ၵမ်း ။ တီႈသဵၼ်ႈမၢႆၸိုဝ်ႈၸဝ်ႈၵဝ်ႇၵမ်းၼိုင်ႈ ၊ ပေႃး တွတ်ႈၶႅပ်းၵၢင်ၸႂ်လႆႈလူင်းလၢႆးမိုဝ်းၵမ်းၼိုင်ႈ ယဝ်ႉၵေႃႈ ပေႃးဢဝ်ၼိဝ်ႉမိုဝ်းၸုမ်ႇသီၼၼ်ႉၵေႃႈ လႆႈလူင်း လၢႆးမိုဝ်းထႅင်ႈ ၵမ်းၼိုင်ႈ ဝႃႈၼႆ ။
ဝဵင်းယႂႃႇငၢၼ်ႇ (ဝၢၼ်ႈငႂ်ႈ)ၼႆႉ ပႃးၼႂ်းပၢင်လိူၵ်ႈတင်ႈၵမ်းထီႉသွင် ။ မီးပႃႇတီႇၶဝ်ႈၶေႉၶဵင်ႇ 5 ဢၼ် ၊ ပႃႇတီႇထၼူႉ (DNDP) ၊ ပႃႇတီႇသၢင်ႇသီႈ (USDP) လႄႈ ပႃႇတီႇပဢူဝ်း (PNO) ၊ ပႃႇတီႇ ၽွမ်ႉႁူမ်ႈၸၢဝ်းၶိူဝ်း (တသၺ) ပႃႇတီႇဢွၼ်ၼမ်းၵူၼ်းမိူင်း (PPP) ၸိူဝ်းၼႆႉ။ ႁူင်းတွတ်ႈ ၶႅပ်းၵၢင်ၸႂ် မီး 40 ႁူင်း။ ဝဵင်းဝၢၼ်ႈငႂ်ႈၼႆႉ ၼႂ်းဝဵင်းမီး 3 ပွၵ်ႉလႄႈ ဢိူင်ႇသမ်ႉမီး 29 ဢိူင်ႇ မၢင်ႇဢိူင်ႇၵေႃႈမီးႁူင်းတွတ်ႈၶႅပ်းၵၢင်ၸႂ်ၼိုင်ႈႁူင်း ပေႃးဢိူင်ႇယႂ်ႇသမ်ႉ မီး 2 ႁူင်း လႆႈႁူႉၼင်ႇၼႆ ။
ပၢင်လိူၵ်ႈတင်ႈ ၵမ်းထီႉသွင်ၼႆႉ ၸႄႈဝဵင်းၸိူဝ်းတေလႆႈၸတ်းႁဵတ်းပၢင်လိူၵ်ႈတင်ႈ ၼႂ်းမိူင်းတႆး ပဵၼ် 17 ၸႄႈဝဵင်း။ မိူင်းတႆးပွတ်းၸၢၼ်း ပဵၼ်ၸႄႈဝဵင်းယႂႃႇငၢၼ်ႇ၊ ၸႄႈဝဵင်းသီႇသႅင်ႇ၊ ၸႄႈဝဵင်း ၵၢတ်ႇလေႃႉ၊ ၸႄႈဝဵင်းလွၵ်ႉၸွၵ်ႇ၊ ၸႄႈဝဵင်းၵုၼ်ႁဵင်၊ ၸႄႈဝဵင်းမိူင်းပၼ်ႇ၊ ၸႄႈဝဵင်းမွၵ်ႇမႂ်ႇ၊ ၸႄႈဝဵင်းမိူင်းၵိုင် ၊ ၸႄႈဝဵင်းလၢႆးၶႃႈ ပဵၼ် 9 ၸႄႈဝဵင်း ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ