Friday, March 29, 2024

ၸဝ်ႈႁၢၼ်ႉၶမ်းတီႈဝဵင်းၼမ်ႉတူႈၺႃးၸူၼ် လႆႈၶမ်းၵႂႃႇတႃႇၵႃႈၶၼ် 400 သႅၼ်ပျႃးပၢႆ

Must read

ၸဝ်ႈၶွင်ႁၢၼ်ႉၶၢႆၶမ်း ၵေႃႉၼိုင်ႈတီႈဝဵင်းၼမ်ႉတူႈ ၺႃးၵူၼ်းၸူၼ်ဢဝ်ငိုၼ်းလႄႈၶမ်းမၼ်းၸၢႆး လူႉသုမ်းတႃႇၵႃႈၶၼ်မွၵ်ႈ 400 သႅၼ်ပျႃးပၢႆ ၸဝ်ႈၶွင်ႁၢၼ်ႉၶမ်း  မၢတ်ႇၸဵပ်း ဝႃႈၼႆ။

ဝဵင်းၼမ်ႉတူႈ

မိူဝ်ႈဝၼ်းတီႈ 29/12/2021 ယၢမ်းဝၢႆးဝၼ်းမွၵ်ႈ 4 မူင်းပၢႆ ၽူႈယိင်းၵေႃႉၼိုင်ႈ ၸဝ်ႈၶွင်ႁၢၼ်ႉၶမ်းၼႂ်းၵၢတ်ႇ ၺႃးၵူၼ်း 2 ၵေႃႉၸူၼ်ႁိမ်ဢဝ်ငိုၼ်းလႄႈၶမ်း ၼႂ်းထူင်မၼ်းၵႂႃႇတႃႇၵႃႈၶၼ်တင်းမူတ်း 400 သႅၼ်ပျႃး၊ တီႈၼႃႈႁိူၼ်းမၼ်းၼၢင်း ဢၼ်မီးတီႈ ပွၵ်ႉပၢင်ႁၢႆး ၸႄႈဝဵင်းၼမ်ႉတူႈ ၸႄႈတွၼ်ႈၵျွၵ်ႉမႄး ၸိုင်ႈတႆးပွတ်းႁွင်ႇ။

- Subscription -

 ၵူၼ်းပိုၼ်ႉတီႈၼမ်ႉတူႈ လၢတ်ႈတီႈၽူႈတွႆႇႁွၵ်ႈဝႃႈ -“ၽွင်းမၼ်းၼၢင်းပိၵ်ႉႁၢၼ်ႉသေ ပွၵ်ႈႁိူၼ်းၼၼ်ႉ မီးၵူၼ်းၶီႇရူတ်ႉၶိူင်ႈ မႃးၸွမ်းလင်မၼ်း 2 ၵေႃႉ။ ၽွင်းထိုင်ၼႃႈႁိူၼ်း မၼ်းတိုၵ်ႉလူင်းရူတ်ႉၶိူင်ႈ တေၶဝ်ႈႁိူၼ်းမၼ်းၼၼ်ႉ ၵူၼ်း 2 ၵေႃႉၼၼ်ႉၵွင်ႈၸမ်ႈ ၸူၼ်ဢဝ်ၶမ်းၼႂ်းထူင်မၼ်းၵႂႃႇ။ လႆႈၵႂႃႇတင်းငိုၼ်းတင်းၶမ်းၼႆၶႃႈ။ ၸဝ်ႈႁၢၼ်ႉၶမ်းၼၼ်ႉ တီႈမိုဝ်းမၼ်းလႆႈမၢတ်ႇၸဵပ်း ၼႆဢေႃႈ”- ဝႃႈၼႆ။

ၵူၼ်း သွင်ၵေႃႉဢၼ်မႃးၸူၼ်ၼၼ်ႉ ပဵၼ်ၽူႈၸၢႆး ပဵၼ်ၵူၼ်းၶၢဝ်ႉ သႂ်ႇၽႃႈတူမ်းသူပ်း တိုဝ်းမူၵ်ႇႁူဝ်တင်းသွင်။ ၼၢင်းယိင်း ၸဝ်ႈၶွင်ႁၢၼ်ႉၶမ်းၼၼ်ႉ တေမီး ဢႃယု မွၵ်ႈ 40 ပၢႆ ဝႃႈၼႆ။

ဝၢႆးသေ ၶွင်ႇသီႇသိုၵ်းမၢၼ်ႈ ယိုတ်းမိူင်းမႃး ၶၢဝ်းတၢင်း 11 လိူၼ်ပၢႆၼႆႉ ၵူၼ်းမိူင်းႁႃၵိၼ်လဵင်ႉတွင်ႉယၢပ်ႇၽိုတ်ႇ ၵိၼ်းၸႂ် လိူဝ်ႁႅင်းမႃး ၼႂ်းၸႄႈ ဝဵင်းၼမ်ႉတူႈ မီးၽူႈလၵ်ႉၵူၼ်းၸူၼ်လိူင်ႇ ယဝ်ႉၵေႃႈ ယႃႈမဝ်းၵမ် ပၢင်တေႃႇလွင်း ၸိူဝ်းၼႆႉၵေႃႈ ၼမ်လိူင်ႇထႅင်ႈ ၼႆယဝ်ႉ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း