ၵၢင်ပီ ႁၢင်ပီ 2021 ၼႆႉ သိုၵ်း SSPP တင်း RCSS တိုၵ်းၵၼ် တေႃးၵၼ်လႄႈ ၵူၼ်းမိူင်း ၼႂ်းၸႄႈဝဵင်းမိူင်းၵိုင် ႁူဝ်ၵူၼ်း ႁိမ်း 600 ၵေႃႉ ဢၼ်ပၢႆႈၽေးပၢင်တိုၵ်း မႃးသွၼ်ႈယူႇႁိမ်းသၢပ်ႇဝဵင်း ၸွမ်းဝိႁၢရ်ဝတ်ႉဝႃးၸိူဝ်းၼၼ်ႉ ယင်းပႆႇႁတ်းပွၵ်ႈ ဝၢၼ်ႈၶိုၼ်း။
ဝၼ်းတီႈ 23/12/2021 ၼႆႉ တီႈဝတ်ႉၵုင်းၸူင်၊ ပၢင်ႇၵေႇတု၊ ဝတ်ႉဝဵင်းငိုၼ်း လႄႈ ဝၢၼ်ႈႁူၺ်ႈဢွၼ်ႇ ၼႂ်းၸႄႈ ဝဵင်းမိူင်းၵိုင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ၼၼ်ႉ ၵူၼ်းပၢႆႈၽေးတင်းမူတ်းမီးႁူဝ်ၵူၼ်း 577 ၵေႃႉ လင်ႁိူၼ်း 209 လင် ပႆႇႁတ်းပွၵ်ႈၶိုၼ်း ႁိူၼ်းယေး ၸဝ်ႈၵဝ်ႇၶိုၼ်း။
ၵူၼ်းမိူင်းၵိုင် လၢတ်ႈတီႈၽူႈတွႆႇႁွၵ်ႈ ဝႃႈ -“ပၢင်တိုၵ်းတႄႉ ယဵၼ်လူင်းယဝ်ႉသေတႃႉ သိုၵ်းတႄႉ တိုၵ်ႉတူင်ႉၼိုင် ယူႇဝႆႉၸွမ်းၼႂ်းမူႇဝၢၼ်ႈ။ ၵွပ်ႈၼႆ ၵူၼ်းပၢႆႈၽေးသိုၵ်းတႄႉ ပႆႇႁတ်းပွၵ်ႈမိူဝ်းၶိုၼ်း”- ဝႃႈၼႆ။
ၵူၼ်းပၢႆႈၽေးသိုၵ်း ဢၼ်ၵိုတ်းဝႆႉ ႁိမ်း 600 ၵေႃႉၼၼ်ႉ တီႈဝတ်ႉၵုင်းၸူင် ပဵၼ်ၵူၼ်းဝၢၼ်ႈၽႃလၢမ်း ႁူဝ်ၵူၼ်း 82 ၵေႃႉ ၸၢႆး 46 ၵေႃႉ၊ ယိင်း 36 ၵေႃႉ လင်ႁိူၼ်း 40 လင်။ ဝၢၼ်ႈၼႃးမူၼ်း 36 ၵေႃႉ ၸၢႆး 14 ၵေႃႉ၊ ယိင်း 22 ၵေႃႉ၊ လင်ႁိူၼ်း 11 လင်။ ဝၢၼ်ႈပႅၵ်ႇ 57 ၵေႃႉ ၸၢႆး 24 ၵေႃႉ၊ ယိင်း 33 ၵေႃႉ လင်ႁိူၼ်း 16 လင်။ ဝၢၼ်ႈပၢင်ႇၵေႇတုသမ်ႉ ပဵၼ် ၵူၼ်း ဝၢၼ်ႈၵုင်းလႅင်းပၢႆႈမႃးယူႇဝႆႉ ႁူဝ်ၵူၼ်း 225 ၵေႃႉ လင်ႁိူၼ်း 87 လင် ။
တီႈဝတ်ႉဝဵင်းငိုၼ်းသမ်ႉ ပဵၼ်ၵူၼ်းဝၢၼ်ႈမိူင်း၊ ၼႃးၽွၵ်းလႄႈ ပၢင်ႇၼွင် တင်းမူတ်းႁူဝ်ၵူၼ်း 164 ၵေႃႉ၊ ၸၢႆး 70 ၵေႃႉ လႄႈ ယိင်း 94 ၵေႃႉ လင်ႁိူၼ်း 50 လင်။ တီႈဢိူင်ႇႁူၺ်ႈဢွၼ်ႇသမ်ႉ ပဵၼ်ၵူၼ်းဝၢၼ်ႈႁူဝ်ၶၢႆး ႁူဝ်ၵူၼ်း 13 ၵေႃႉ လင် ႁိူၼ်း 5 ၵေႃႉ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ