Friday, March 29, 2024

ၵူၼ်းၸပ်းၶူဝ်ႊဝိတ်ႉ လူတ်းယွမ်းလူင်း၊ ၵၢတ်ႇလူင် ဝဵင်းၵျွၵ်ႉမႄး တႄႇပိုတ်ႇၶိုၼ်း

Must read

မိူဝ်ႈၼႆႉ ဝၼ်းတီႈ 22/12/2021 ၵၢတ်ႇလူင် ဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ  ၶိုၼ်းပိုတ်ႇပၼ်ၵူၼ်းသိုဝ်ႉၶၢႆၸၢႆႇၵၼ် မိူၼ်ၵဝ်ယဝ်ႉ – ဝႃႈၼႆ။

Image: ၵူၼ်းပိုၼ်ႉတီႈ/ ၵၢတ်ႉၵျွၵ်ႉမႄး

တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းတိတ်းၸပ်းၵၼ်ႁၢဝ်ႈႁႅင်းလႄႈ ၵၢတ်ႇၵျွၵ်ႉမႄး  လႆႈပိၵ်ႉဢိုတ်း မႃးမီးၶၢဝ်းတၢင်း  လၢႆလၢႆလိူၼ်၊ ဝၢႆးၼၼ်ႉ ၶိုၼ်းပိုတ်ႇပၼ်တင်းၶၢဝ်းယၢမ်း ၊ ယၢမ်းလဵဝ်တႄႉပိုတ်ႇပၼ်တင်းပိုၵ်းယဝ်ႉ ၵူၼ်းၶၢႆၼႂ်းၵၢတ်ႇၵေႃႉၼိုင်ႈလၢတ်ႈၼင်ႇၼႆ။

- Subscription -

 “ၸႂ်ႈၶႃႈဢေႃႈ တႄႇပိုတ်ႇမိူဝ်ႈၼႆႉၶႃႈ မိူဝ်ႈၵူႈပွၵ်ႈ ပိုတ်ႇၼိုင်ႈဝၼ်းလႂ် ၼိုင်ႈၶိုင်ႈၸိူင်ႉ ၼၼ်ၵူၺ်း။ မိူဝ်ႈၼႆႉတႄႉ ပိုတ်ႇတင်း မူတ်းၶႃႈယဝ်ႉ။ ၸဵမ်ၵၢတ်ႇၵၢင်ၶမ်ႈ ၸိူဝ်းၼႆႉၵေႃႈ ပိုတ်ႇဢေႃႈ။  တႃႇၵူၼ်းၶၢႆၶူဝ်းၼႂ်းၵၢတ်ႇတႄႉ ၸူမ်းဢေႃႈ ၼေႃႈ။ ၵူၺ်းၵႃႈ ပၢႆးယူႇလီၵေႃႈ တေလႆႈၾၢင်ႉႁင်းၽႂ်မၼ်းၼၼ်ႉၶႃႈၼႃႇ။ ၵူၼ်းႁႃၵိၼ်လဵင်ႉတွင်ႉ ဝၼ်းလႂ်ဝၼ်းၼၼ်ႉတႄႉ    တေလႆႈၾၢင်ႉတႄႉတႄႉဝႃႈဝႃႈၶႃႈဢေႃႈ”-  ဝႃႈၼႆ။

 ပေႃးၸပ်းတၢင်းပဵၼ်မႃး တႃႇယူတ်းယႃဢမ်ႇငၢႆႈလႄႈ ႁႂ်ႈၾၢင်ႉတူဝ်ႁင်းၽႂ်မၼ်းလီလီ ၵူၼ်းၶၢႆၼႂ်းၵၢတ်ႇ ၼၼ်ႉလၢတ်ႈ ထႅင်ႈၼင်ႇၼႆ။

Image: ၵူၼ်းပိုၼ်ႉတီႈ/ ၵၢတ်ႉၵျွၵ်ႉမႄး

“ၵွပ်ႈပိူဝ်ႈဝႃႈ ဝၢၼ်ႈမိူင်းၵေႃႈ ဢမ်ႇယဵၼ် လွင်ႈၵႂႃႇမႃးၵေႃႈ ဢမ်ႇတဵမ်ထူၼ်ႈ။ လွင်ႈၵူတ်ႇထတ်းတၢင်းပဵၼ်ၵေႃႈ ဢမ်ႇမီး ယဝ်ႉ ပေႃးဝႃႈ ပဵၼ်မႃးၼႆ လႆႈဢဝ်ငိုၼ်းၼႂ်းထွင်းၸဝ်ႈၵဝ်ႇသေ ယႃၵူၺ်း။ တႃႇပိူၼ်ႈတေမႃးတူၺ်းထိုင် လုမ်းလႃး မိူၼ်မိူဝ်ႈဢွၼ်တၢင်းတႄႉ တေဢမ်ႇမီးယဝ်ႉ။ ၶႂ်ႈသင်ႇ ထိုင်ၵူၼ်းမိူင်းႁဝ်းဝႃႈ ႁႂ်ႈၾၢင်ႉတူဝ်ၸဝ်ၵဝ်ႇ ႁင်းၽႂ်မၼ်း ႁႂ်ႈသႂ်ႇၽႃႈတူမ်းသူပ်းၵၼ် ပေႃးဝႃႈ ထိုင်ႁိူၼ်းယဝ်ႉၵေႃႈ သုၵ်ႈလၢင်ႉမိုဝ်းၵမ်းလဵဝ်”-  ဝႃႈ ၼႆ။

တၢင်းပဵၼ်ၶူဝ်ႊဝိတ်ႉ 19 ၽႄႈလၢမ်းၼႂ်းၸႄႈဝဵင်းၵျွၵ်ႉမႄးပွၵ်ႈၵမ်းယဝ်ႉမႃးၼႆႉ ႁၢဝ်ႈႁႅင်း၊ တၢႆၼမ် လွင်ႈလုမ်းလႃး ယူတ်းယႃ ၵေႃႈဢမ်ႇလႆႈတဵမ်ထူၼ်ႈ၊ ၾၢႆႇပၢႆးယူႇလီၵေႃႈ ဢမ်ႇၸတ်းၵၢၼ်ယူတ်းယႃလႄႈဢွၵ်ႇၶၢဝ်ႇပၼ်လႆႈတႅတ်ႈတေႃး၊ ၵွပ်ႈၼႆ ၵူၼ်းၸပ်းတၢင်းပဵၼ်မီးၵႃႈႁိုဝ် ၊ လူႉတၢႆၵႃႈႁိုဝ်  ယႃၶႅၼ်းၵႃႈႁိုဝ်ၼႆ ဢမ်ႇမီးသဵၼ်ႈမၢႆတႅတ်ႈတေႃး။  ယၢမ်းလဵဝ်ၵေႃႈ ၵူၺ်းႁူႉဝႃႈ ၵူၼ်းပဵၼ်လူတ်းယွမ်းလူင်း  ၼႆၵူၺ်း ၵူၼ်းပိုၼ်ႉတီႈၵျွၵ်ႉမႄးလၢတ်ႈ။

ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ

- Subscription -
- SHAN's Apps -spot_img

ၶၢဝ်ႇလိုၼ်းသုတ်း