ၵေႃႁူမ်ႈသၢင်ႈလွင်ႈငမ်းယဵၼ်သင်ႇၶႃႇလႄႈ ၵူၼ်းမိူင်းတႆး ၵေႃၽႄထုင်ႉမၢဝ်း တုၵ်းယွၼ်းထိုင် SSPP ႁႂ်ႈၸွႆႈၵႄႈပၼ်ႁႃ လွင်ႈသိုၵ်းလွႆ TNLA ၵဵပ်းၶွၼ်ႇႁၢဝ်ႈႁႅင်းပူၼ်ႉတီႈ ၼႂ်းၵၢတ်ႇလူင်ၼမ်ႉၶမ်း။

မိူဝ်ႈဝၼ်းတီႈ 14/12/2021 ၼႆႉ  ၵေႃႁူမ်ႈသၢင်ႈလွင်ႈငမ်းယဵၼ်သင်ႇၶႃႇလႄႈ ၵူၼ်းမိူင်းတႆး ၵေႃၽႄထုင်ႉမၢဝ်း တုၵ်းယွၼ်း ထိုင် ၸဝ်ႈၼႃႈတီႈလႄႈ ၽူႈၵွၼ်းသၢႆသိုၵ်းၶိုၵ်ႉတွၼ်း ထုင်ႉမၢဝ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ႁႂ်ႈၸွႆႈၵႄႈလိတ်ႈပၼ်ႁႃ လွင်ႈသိုၵ်းလွႆ TNLA မႃးၵဵပ်းၶွၼ်ႇ တီႈၼႂ်းၵၢတ်ႇလူင်ဝဵင်းၼမ်ႉၶမ်း ႁၢဝ်ႈႁႅင်းပူၼ်ႉတီႈ ၼႂ်းၸႄႈဝဵင်းၼမ်ႉၶမ်း ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ ၼႆယဝ်ႉ။

ၵူၼ်းၶၢႆႁၢၼ်ႉၶူဝ်းၵုၼ်ႇၼႂ်းၵၢတ်ႇလူင် ဝဵင်းၼမ်ႉၶမ်း ပိၵ်ႉၵၢတ်ႇၼႄၵၢင်ၸႂ်သၢၼ်ၶတ်းလွင်ႈသိုၵ်း TNLA ၵဵပ်းၶွၼ်ႇ ႁၢဝ်ႈ ႁႅင်း ၼၼ်ႉယူႇၵေႃႈ ဢမ်ႇလၢၵ်ႇလၢႆးသင်မႃး။ တိုၼ်းတေလႆႈၵႂႃႇသႂ်ႇၶွၼ်ႇပၼ်ၶဝ်တဵၵ်းငႅၼ်းမႃးထႅင်ႈလႄႈ ၵူၼ်းၶၢႆၶူဝ်း ၸင်ႇလႆႈတႅမ်ႈလိၵ်ႈတုၵ်းယွၼ်း တၢင်ႇထိုင်တီႈၵေႃ ႁူမ်ႈသၢင်ႈလွင်ႈငမ်းယဵၼ်သင်ႇ ၶႃႇလႄႈ ၵူၼ်းမိူင်းတႆး ၵေႃၽႄ ထုင်ႉမၢဝ်း မိူဝ်ႈဝၼ်းတီႈ 10/12/2021 ပူၼ်ႉမႃး ႁႂ်ႈထႅမ်ၸွႆႈၵႄႈၶႆပၼ် လွင်ႈၼႆႉ။

ၸၢႆးၶမ်းသႅင် ၼမ်ႉၶမ်း ၵူၼ်းၶဝ်ႈႁူမ်ႈၼႂ်းပၢင်ၵုမ် ၸုမ်းၶၢႆၵၢတ်ႇ လၢတ်ႈတီႈၽူႈတွႆႇႁွၵ်ႈဝႃႈ – “ၵွပ်ႈပိူဝ်ႈၵူၼ်းမိူင်းႁဝ်းၶႃႈၼႆႉ တုၵ်ႉၶႁႅင်းၼႃႇယဝ်ႉ။ ဢၼ်ၶဝ်မႃးၵဵပ်းၶွၼ်ႇၼႆႉ ဢမ်ႇၸႂ်ႈမႃး ၵဵပ်းဢိတ်းဢွတ်းၵူၺ်း။  မႃးၵဵပ်းၼမ်ႁႅင်းပူၼ်ႉတီႈ။ ယၢမ်း လဵဝ် ၵူၼ်းမိူင်းၼႆႉ ဢမ်ႇလႆႈၶၢႆၶူဝ်းလီ မိူၼ်ႁူႉ ၵၼ်ယူႇၼၼ်ႉၼႃႇ တၢင်းပဵၼ်ၶူဝ်ႊဝိတ်ႉၵေႃႈပိူင်ၼိုင်ႈ၊ ဝၢၼ်ႈမိူင်းဢမ်ႇလီ ၵေႃႈပိူင်ၼိုင်ႈ ၵူၼ်းမိူင်းဢမ်ႇလႆႈႁဵတ်းၵၢၼ်လီလီ ဢမ်ႇမီးငိုၼ်းၶဝ်ႈ ။ ၵွပ်ႈၼႆလႄႈ ၵူၼ်းၶၢႆၶူဝ်းသႅင်ႇၼႂ်းၵၢတ်ႇၸိူဝ်းၼႆႉ မႆႈၸႂ် ၶႃႈဢေႃႈ”- ဝႃႈၼႆ။

ဢၼ်သိုၵ်း TNLA မႃးၶၢၼ်းႁႂ်ႈသႂ်ႇၶွၼ်ႇၼၼ်ႉ ၵူၼ်းဢၼ်ယၢမ်ႈသႂ်ႇပၼ်ယဝ်ႉပွၵ်ႈၼိုင်ႈၵေႃႈဢမ်ႇဝဵၼ်ႉ ဢမ်ႇယွမ်းပၼ်။ ၶၢၼ်းႁႂ်ႈသႂ်ႇပၼ် ထႅင်ႈလႄႈ ၵူၼ်းမိူင်းၵိၼ်းၸႂ်ဝႃႈၼႆ။

သိုပ်ႇလၢတ်ႈဝႃႈ – “ပေႃးဝႃႈ ပၼ်ပွၵ်ႈၼိုင်ႈသေ ယဝ်ႉၵႂႃႇတႄႉ ဢမ်ႇပဵၼ်သင် ၶဝ်သမ်ႉဢမ်ႇၸႂ်ႈၸိူင်ႉၼၼ် သမ်ႉတေမႃး ၵဵပ်းယဝ်ႉၵဵပ်းထႅင်ႈၼႆႉ  ၵူၼ်းမႃးၶၢႆၶူဝ်းၼႆႉ ဢမ်ႇၸႂ်ႈ ၵူၼ်းသထေးၶႃႈလူး။   ပဵၼ်ၵူၼ်းႁႃၵိၼ်လဵင်ႉတွင်ႉ ဝၼ်းလႂ်ဝၼ်း ၼၼ်ႉ ၵူၺ်းၶႃႈၼႃႇ။ ဢၼ်မႃးၵဵပ်းၼႆႉသမ်ႉ ဢမ်ႇၸႂ်ႈဢႄႇလူင်းလူး။ ၵဵပ်းၼမ်ၶိုၼ်ႈ ၼမ်ၶိုၼ်ႈၵူႈၵမ်းလႄႈ   ပဵၼ်ဢၼ် ယၢပ်ႇၽိုတ်ႇတႃႇၵူၼ်းၶၢႆၶူဝ်းသႅင်ႇ ၼႂ်းၵၢတ်ႇတႄႉတႄႉၶႃႈဢေႃႈ”- ဝႃႈၼႆ။  

တီႈၽိုၼ်လိၵ်ႈတုၵ်းယွၼ်း  ၵေႃႁူမ်ႈသၢင်ႈငမ်းယဵၼ် သင်ႇၶႃႇလႄႈ ၵူၼ်းမိူင်းတႆး ၵေႃၽႄထုင်ႉမၢဝ်းၼၼ်ႉ တႅမ်ႈဝႆႉဝႃႈ  SSPP/SSA လႄႈ တင်း TNLA   ပဵၼ်ၸုမ်းဢူၺ်းလီၵၼ်ဝႆႉ၊ ၸွမ်းလူၺ်ႈယိူၼ်းဢၢၼ်းလႄႈ ပုၼ်ႈၽွၼ်း ဢၼ်သၢႆသိုၵ်း ၶိုၵ်ႉတွၼ်း ၶိုၼ်ႈမႃးထုင်ႉမၢဝ်းၼၼ်ႉ-  ၼႂ်းၶေႃႈထီႉ 1 ၼၼ်ႉပဵၼ်ဝႆႉဝႃႈ  တႃႇဢုပ်ႇဢူဝ်းငူပ်ႉငီႉ တင်းသိုၵ်းၸၢဝ်းၶိူဝ်း လၢႆလၢႆၸုမ်းသေ ၵႅတ်ႇၶႄပေႃႈမႄႈၵူၼ်းမိူင်း ၼႆလႄႈ –  ယၢမ်းလဵဝ် ၽွင်းၵူၼ်းမိူင်း ထူပ်းတၢင်းယၢပ်ႇၽိုတ်ႇလူၺ်ႈ လွင်ႈၵဵပ်းၶွၼ်ႇၼႆႉ ယူႇတီႈသၢႆသိုၵ်းၶိုၵ်ႉတွၼ်းထုင်ႉမၢဝ်း ၸဝ်ႈၼႃႈတီႈထုင်ႉမၢဝ်း SSPP/SSA ၶႅၼ်းတေႃးၸွႆႈထႅမ်ၵႄႈၶႆပၼ်သေၵမ်း ဝႃႈၼႆ။

“ၶႂ်ႈႁႂ်ႈတပ်ႉသိုၵ်း SSPP ၵႄႈၶႆပၼ်ႁႃလွင်ႈၼႆႉ ယွၼ်ႉဝႃႈ ၶဝ်ၵေႃႈ ပဵၼ်ဢူၺ်းလီၵၼ် ႁဵတ်းႁိုဝ်ၵေႃႈ မုင်ႈမွင်းဝႃႈ ၶဝ်တေၵႄႈၶႆ ၸွႆႈထႅမ်ပၼ် လႆႈယူႇၶႃႈ။ ၵွပ်ႈၼႆလႄႈ ၸင်ႇႁဵတ်းလိၵ်ႈသေ တၢင်ႇၸူးတီႈၵေႃႁူမ်ႈသၢင်ႈငမ်းယဵၼ် ၶဝ်ၸဝ်ႈသိုပ်ႇတၢင်ႇပၼ် တီႈ SSPP ၼႆၶႃႈဢေႃႈ”- ၸၢႆး ၶမ်းသႅင် သိုပ်ႇလၢတ်ႈၼႄၼင်ၼႆ။

ယၢမ်းလဵဝ်ဢၼ် TNLA မၵ်းၶၢၼ်းၵဵပ်းၶွၼ်ႇၼႆႉ  ပေႃးပဵၼ်ႁၢၼ်ႉၶၢႆပႃ/ ပူ၊ ႁၢၼ်ႉၶၢႆၶူဝ်းယွႆႈ ႁၢၼ်ႉလဵၵ်ႉ ၸိူဝ်းၼႆႉ မိူဝ်ႈၵူႈပွၵ်ႈ  ၵဵပ်း 3-4 မိုၼ်ႇ  ယၢမ်းလဵဝ် ၵဵပ်း 7-8 သႅၼ်။ ပေႃးပဵၼ်ႁၢၼ်ႉၶၢႆၶူဝ်းၵုၼ်ႇယႂ်ႇလူင် ၸိူဝ်းၼႆႉသမ်ႉ ၵဵပ်း 70 သႅၼ်ၶိုၼ်ႈၼိူဝ်။ ပေႃးပဵၼ်ႁၢၼ်ႉၶၢႆၶမ်း၊ ၶၢႆၾူၼ်း ၵႃႈၶၢၼ်ယႂ်ႇ ၸိူဝ်းၼႆႉသမ်ႉ ၵဵပ်း 100 သႅၼ် ၶိုၼ်ႈၼိူဝ်  ။

ဢၼ်လိူဝ်ၸႂ်ႁႅင်းသမ်ႉ ပေႃးပဵၼ်ၵူၼ်းမီးႁၢၼ်ႉၶၢႆၵိုၵ်းႁိူၼ်းလႄႈႁၢၼ်ႉၶၢႆၼႂ်းၵၢတ်ႇ – ၵေႃႈလႆႈသႂ်ႇ ပၼ်တင်းတႃႇ သွင်ႁၢၼ်ႉ။ ယွၼ်းႁႂ်ႈလူတ်းယွၼ်ႇပၼ်ႁႂ်ႈလႆႈသႂ်ႇဢၼ်လဵဝ် တီႈလဵဝ်ၼႆၵေႃႈဢမ်ႇလႆႈ ၵူၼ်းၼမ်ႉၶမ်းၶၢင်းပွင်ႉၼင်ႇၼႆ။

TNLA ၼႆႉ မိူဝ်ႈၵူႈပွၵ်ႈ   ၵဵပ်းၶွၼ်ႇၸွမ်းႁၢၼ်ႉၶၢႆၶူဝ်းယႂ်ႇလူင်ၵူၺ်း၊  ယၢမ်းလဵဝ်  ၸဵမ်ႁၢၼ်ႉလဵၵ်ႉႁၢၼ်ႉဢွၼ်ႇ ႁၢၼ်ႉ ယႂ်ႇလူင် ၸိူဝ်းၼႆႉ ၵဵပ်းၵူႈႁၢၼ်ႉ  ၵူၼ်းၶၢႆႁၢၼ်ႉၵိုၵ်းႁိူၼ်း ဝဵင်းၼမ်ႉၶမ်းၵေႃႉၼိုင်ႈလၢတ်ႈ။

ၵွပ်ႈၼႆလႄႈ ၵူၼ်းၶၢႆၶူဝ်းၵုၼ်ႇ ၼႂ်းၵၢတ်ႇလူင်ဝဵင်းၼမ်ႉၶမ်း ၸင်ႇႁူမ်ႈၵၼ်သေ ၼႄၵၢင်ၸႂ်သၢၼ်ၶတ်းတေႃႇသိုၵ်းလွႆ TNLA မႃး ယွၼ်ႉၵဵပ်း ၶွၼ်ႇႁၢဝ်ႈႁႅင်းပူၼ်ႉတီႈသေ တႄႇဢဝ် ဝၼ်းတီႈ 11-18/12/2021 ဢွၼ်ၵၼ်ပိၵ်ႉဢိုတ်းႁၢၼ်ႉၶၢႆၶူဝ်းၽႂ်မၼ်းသေ ထိုင်မႃး ဝၼ်းတီႈ 19/12/2021 ၼႆႉ ၸင်ႇၶိုၼ်းပိုတ်ႇၶၢႆ ၶိုၼ်း  ။

ယၢမ်းလဵဝ် ၸုမ်းယိပ်းၵွင်ႈၵၢင်ႇ ဢၼ်ၵဵပ်းၶွၼ်ႇယူႇ ၼႂ်းၸႄႈဝဵင်းၼမ်ႉၶမ်းၼႆႉ ပဵၼ်သိုၵ်းလွႆ TNLA, သိုၵ်းၶၢင် KIA, သိုၵ်းဝၢၼ်ႈႁႆး SSPP လႄႈ ႁွင်ႈၵၢၼ်ၾၢႆႇလိူမ်ႈလႆႇ လူင်ပွင်ၸိုင်ႈမၢၼ်ႈ ၸိူဝ်းၼႆႉ။