ၶွင်ႇသီႇသိုၵ်းမၢၼ်ႈ ယိုဝ်းၵွင်ႈၾၢႆႇလဵဝ် ၼႂ်းၸႄႈဝဵင်းၵူတ်ႉၶၢႆ

မိူဝ်ႈၼႆႉ ဝၼ်းတီႈ 22/12/2021 ယၢမ်းၵၢင်ၼႂ် မွၵ်ႈ 9 မူင်း ၶွင်ႇသီႇသိုၵ်းမၢၼ်ႈ ယိုတ်းမိူင်း လၢမ်းလိမ်းယိုဝ်းၵွင်ႈ ၾၢႆႇလဵဝ် ၵႂႃႇၵူႈႁူးၵူႈတၢင်း ၼႂ်း ၸႄႈဝဵင်းၵူတ်ႉၶၢႆ ၸႄႈတွၼ်ႈမူႇၸေႊ ၸိုင်ႈတႆးပွတ်းႁွင်ႇ။  

ၵူၼ်းၵူတ်ႉၶၢႆ လၢတ်ႈတီႈၽူႈတွႆႇႁွၵ်ႈဝႃႈ – “ပဵၼ်သိုၵ်းမၢၼ်ႈ ယိုဝ်းၶႃႈဢေႃႈ။ လႆႈငိၼ်းယိုဝ်းၾၢႆႇလဵဝ်ၵူၺ်းၶႃႈ။ မွၵ်ႈ 7-8 ၵမ်းၼႆႉ။ ယိုဝ်း ၵႂႃႇတၢင်းဝၢၼ်ႈပၢင်ႇ၊ ဝၢၼ်ႈႁူၺ်ႈၶူၵ်ႉ ၸိူဝ်းၼႆႉၶႃႈဢေႃႈ”- ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 18/12/2021 ၼၼ်ႉၵေႃႈ တီႈႁိမ်းၵဵတ်ႉၵဵပ်းငိုၼ်း ( Asia World တူဝ်းၵဵတ်ႉ) တၢင်းၶဝ်ႈဢွၵ်ႇ ဝဵင်းၵူတ်ႉၶၢႆ ၼၼ်ႉၵေႃႈ မီးလွင်ႈပိုတ်း ယိုဝ်းၵၼ် ႁၢဝ်ႈႁႅင်းသေ မၢၵ်ႇလူင်တူၵ်းတႅၵ်ႇ တိူဝ်ႇသႂ်ႇၵူၼ်းႁဵတ်းၵၢၼ်တီႈၼၼ်ႈ လႆႈမၢတ်ႇၸဵပ်းၸွမ်းသွင်ၵေႃႉ ၼႆယဝ်ႉ။

ၼႂ်းလိူၼ် သွင်လိူၼ်ၼႆႉမႃး ၼႂ်းၸႄႈဝဵင်းၵူတ်ႉၶၢႆၼႆႉ  သိုၵ်းမၢၼ်ႈတင်း တပ်ႉသိုၵ်းၶၢင် KIA  ၵႆႉပိုတ်းယိုဝ်းၵၼ်ၶိူဝ်းယႂ်း ၼႆယဝ်ႉ။